Neys vom Daag

S Joor isch glyy umme, d Glygge het s scho mit em feyne Wiehnachtsässe (vyyle Dangg an s Event-Team) abgschlosse. Mer wintsche-n-alle scheeni Wiehnacht und e guete Rutsch in s neye Joor. Me gseet sich wiider in de-n-Iebigsstunde (ab 3. Jänner) oder speetischtens an dr Blaggeddenuusgoob (6. Jänner, ab de zääni im Käller).

S git e Termyynverschiebig: Die eerschti Drummelistellbroob in dr Schuelhuusaula isch nit am 10., sondern eerscht am 17. Jänner. Bis zue däm Daag mien d Vordrääbler iiri Hyybli und d Pfyffer iiri Oore zämmegnaiit haa und abgää, damit mer si uff d Laarve kenne montiere.

Ab sofort kaa me sich fir s Schyy-Weekend (20./21. Jänner 2007) aamälde. Mer geen uff Portes du Soleil, d Details findsch uff em Aamäldetalon.

Alli, wo sich in dr Perioode vom 16. Oggdoober 2006 bis zem 28. Auguscht 2007 nooni uff dr Källerdienschtlyschte-n-yydrait hänn, kenne das bim Guido und Thömi in de-n-Iebigsstunde-n-oder deliphoonisch bis speetischtens an dr Blaggedde-Uusgoob (6. Jänner 2007) noochehoole.

In Wiiderbelääbig vo-n-ere-n-alte Dradition wiird moorn zoobe wiider emool kocht im Käller: S git Spaghetti Bolo und Pesto. Vooramäldige zwäggs Yykaufskoordination sinn erbätte (an Thömi), sunscht: s het, solang s het.

Am Samschtig isch wiider dr Groossbasler Källerabstiig. Nadyyrlig isch au dr Dybli-Käller drbyy! Mr serviere-n-unseri feyni Ryyspfanne mit Curry-Gschnätzletem. Kumm doch verbyy und bring Frinde, Verwandti und Bekannti mit.

Im Mitgliiderberyych (de-n-andere verroote mer nadyyrligno nyt) kaa me jetz d Sujet-Bräsentation nomool aaluege.

Mer hänn zwai super Dääg in Seewe verbrocht. Was so alles gloffe-n-isch, kaa me nadyyrlig im Album noocheluege. S isch dr Blausch gsii und mer dangge-n-im OK (Sonja, Renate, Monique, Gilbert) und dr Kuchimannschaft (Pascale, Patricia, Thömu und Christian) fir dä super Aaloss.

Im Weekend isch au s Sujet '07 bräsentiert woorde (Detail git s glyy im Mitgliiderberyych), wo glaub alle mee oder weeniger gfallt. Im Michi und unserem Joker Stephan gratuliere mer zer Waal zem Zugchef bzw. Dambuurmajor.

Ab sofort kaa me (bzw. "muess me") sich in die ney Källerdienscht-Lyschte yydraage (dr Obmaa het si als drbyy). Neymitgliider solle sich jee mit eme-n-alte Haas zämme due.

D Blättli sinn underdesse verleggt, jetz goot s an s Yyruumme-n-und Montiere vo de Bängg und dr neye Bar. Das mache mer am Samschtig, 21. Oggdoober, ab de zwai zmidaag. Wär Zyt het, kunnt ko hälfe (s Drummeli-Baschtle, wo uff dää Daag agsetzt isch gsii, fallt drfir uus).

Dr Hans Gerber isch noo 19  Joor als Obmaa vo dr Alte Garde zruggdrätte. Ney isch jetz dr Heinz Huber dr "heggschti Alti". Mer gratuliere zer Waal.

S Käller-Team bruucht no dringend Lyt, wo bim Ruumme hälfe. Wär Zyt het, goot hit zoobe ab de siibeni oder am Samschtig ab de zwai in Käller go hälfe.

Alli, wo in de letschte baide Joor ney zue uns gstosse sinn, mien sich vo dr Schnyydere lo uusmässe. Si kunnt äxtra am Mittwuch, 25. Oggdoober, vom 18:00-19:30h, in s Schuelhuus. Wäm s denne nit goot, muess sälber mit iire-n-e Termyyn uusmache (Frau Schwarz, 061 361 71 85). Wär s Gfiel het, die letschte baide Joor haige Spuure an dr Figuur hinterloo, kaa freywillig au nomool goo.

An dr letschte Fasnacht hänn useri Laarve bekantlig e bitz under dr Witterig glitte. Wär mecht, ka so glyy wie meeglig sy Wragg zem Laarvemacher bringe, wo si gratis duet repariere.

Ab sofort kaa me Billjee fir s Drummeli 2007 bstelle. S Formular git s doo als PDF und isch au in dr näggschte Dybli-Zyttig. Yysändeschluss isch am 2. Novämber 2006.

Dr Dybli-Käller an dr Stiftsgass het sich jetz scho syt dr Fasnacht '03 bewäärt, was me-n-em aber au e weeneli aagseet. Drum git s jetz e glaini Uffrischig: Dr Boode wird blättlet und d Bar bikunnt e neys Gsicht. Wääge dääne-n-Aarbete blybt dr Dybli-Käller laider ab sofort bis zem 18. Oggdoober gschlosse.

Ab sofort kaa me sich bim Obmaa fir d Fasnacht aamälde. Details und dr aggduelli Stand findsch wie immer im Mitgliiderberyych.

S Weekend-Team isch scho schwär am schaffe. Jetz muess sich numme no jeede bis speetischtens Ändi Septämber aamälde (Aamäldigs-Talon). D Sujet-GV mache mer denn grad au am Samschtig zoobe-n-im Weekend.

In de näggschte Dääg git s e groosse Versand mit wyttere wichtige-n-Informatione. Bitte alles gnau lääse-n-und beachte.

Aimool mee wird dr Grillplausch hit zoobe-n-abgsait, dismool nit wääge-n-em Wätter, sondern wääge de vyyle-n-Absaage. Es schyynt, als syyge-n-alli us Angscht vor de-n-Ibigsstunde am näggschte Mittwuch wiider greftig am Drummle-n-und Pfyffe ...

S Event-Team het jetzt d Route fir d Velo-/Inline-Tour feschtglegt. Wil mer Richtig Dytschland faare (ID und Euro mitnää), dräffe mer uns am näggschte Mittwuch ney am 18:30h bi dr Drammhaltstell Eeglisee. Sott s wiider Erwaarte schlächt Wääter sy (waiss no epper, was das isch?), geemmer e Wuche speeter am 2. Auguscht.

Kurzfrischtig git s noo-n-e super Sunntigs-Blausch fir alli Wasser-Ratte. Am 23. Juli goot me-n-uff Thun und faart mit em Gummibeetli uff Bärn. Gluschtet s Di au, drnoo findsch alles Wichtige-n-im Flyer.

D Schwelger hänn e neyi Homepage und au s Geschtebuech isch wiider online. Super gmacht!

Kuurzfrischtig hämmer fir die Aagfrässene, wo am Samschtig zoobe wänn go gässle, folgendes abgmacht:

Dr Petrus isch kai Dybli: Fir hit zoobe sinn massyv Gwitter aagsait, doorum geemmer halt aimool mee nit go grilliere. Mer dräffe-n-uns zue do normaale Zytte-n-im Schuelhuus.

Hoffentlig glabbt s denn in de Summerfeerie besser. S Event-Team het wiider e super Summerprogramm uff d Bai gstellt. In der aggduelle Dybli-Zyttig und im Kaländer findet me d Detail. Mer hoffe-n-uff reegi Bedailigung.

Doo kunnt ändlig dr Bricht vom Glygge-Grimpeli. Zeerscht die schlächti Noochricht: S isch e-n-Affehitz gsii und d Schutter-Mannschaft isch wie allewyl scho in dr Vorrundi uusgschiide. Jetz aber die guet Noochricht: Unseri gmischti Mannschaft het s zem eerschte Mool in dr Gschicht nit numme-n-in d Zwischerundi gschafft, sondern isch gar in Halbfinal yyzooge. Eerscht deert simmer denn laider gschlaage woorde-n-und im Spiil um Platz 3 simmer au eerscht im Penalty-Schiesse gschytteret. Im Archyyv sinn d Fottene uffgschalte.

An dr GV isch die ney Team-Lyschte-n-uffglääge. Im allgemaine WM-Fieber hänn sich aber nooni alli yydrait. Es gilt drum folgendi Reegelig: Die, wo sich nit yydrait hänn, sinn provisoorisch in de glyyche Teams wie letscht Joor. Me kaa sich aber immer no mälde-n-und umdaile (z.B. s OK-Team bruucht no dringend Versteerggig). Im Mitgliiderberyych kaa me die aggduelle-n-Yydraagige kontrolliere.

Nääbe-n-unserer Nati z Dytschland kemme-n-au d Dybli-Kickers zem Yysatz. Am Samschtig spiilt die gmischti Mannschaft ab em halber elfi und am Sunntig d Schutter ab de viertel ab nyyni (dasch brudaal frie ...).

Hopp Dybli!

Wenn s Wätter wiider emool mitmacht, drno geemmer am letschte Mittwuch vor de Summerfeerie (28. Juni) z Scheenebuech go grilliere. Details findsch uff dr Dambuure-Homepage.

D GV isch aastandslos iiber d Biini und es het sogar glängt, no die zwait Halbzyt vom Match Pole - Ecuador z luege. Die baide Beschliss, wo mer aagnoo hänn, kamme-n-underdesse scho im Mitgliiderberyych noocheluege, s ganz Protokoll wird denn emool noo de Summerfeerie verschiggt.

Uffmerggsami Lääser hänn bemänglet, ass in dr GV-Yylaadig unseri Nummerierig duurenand koo syg. Nadyyrlig isch am 9. Juni eerscht die 24. oordendligi GV, nit scho die 25. Zer Strooff sinn drfir im Mitgliiderberyych d GV-Protokoll vo de vergangene Joor uffgschalte.

Nit vergässe, am 9. Juni isch GV (Yylaadig als PDF). Wär mecht, kunnt scho uff die säggsi, denn luege mer zeerscht dr WM-Ereffnigs-Match. D GV foot denn am achti zoobe-n-aa. Aggdyvmitgliider, wo nit kenne koo, mälde sich vorhär bim Obmaa ab.

Im Album git s ney d Fottene vom Trummlebummle und e Huffe-n-alti Fottene vom Joor 1979 aa. Kennsch Di oder e Glygge-Gspeenli naime druff?

An dr Pfyffer- und Dambuure-Sitzig hämmer beschlosse, s Drummeli-Weekend definidyyv um ai Wuche-n-uff dr 11./12. Novämber z verschiebe. An dr GV wäärde mer denn e-n-OK drfir yysetze.

D Organisation sott jetz ändlig stoo. Dr Nicola het alles im Griff und e Flyer mit alle wichtige-n-Aagoobe gmacht. Bitte mäldet Eych so schnäll wie meeglig bi iim aa.

Nääbe de vier Uffstyyger vo dr Junge Garde deerfe mer bis jetz säggs Exdäärni neyi Dybli im Stamm begriesse. E häärzligs Willkomme-n-an d Renate (P), d Sonja (P), d Tanja (T), dr Christian (P), dr Marc (T) und dr Yves (T). Me kaa sich iibrigens immer no mälde, gsuecht wäärde vor allem au no Vordräbler.

Bi dr Junge Garde kenne mer gar 12 Neymitgliider begriesse, vier drvoo wänn drummle leere, acht wooge s mit em Piccolo.

Bis jetz simmer isch scho iiber 20, wo mitkemme (me ka sich immer no bim Nicola mälde oder au kurzfrischtig no erschyyne). Mer dräffe-n-uns am 21. April am finfi zoobe in dr Schaterhalle vom Baanhof. Es wird grad no abgläärt, eb mer mit em Zug oder mit em Car faare.

Die finde baidi am 19. April am achti zoobe statt. D Dambuure dräffe sich im Pfluderi-Käller (Noodlebärg 18), d Pfyffer sinn in unserem Käller. Noo de Sitzige git s denn e gmainsams Uusblämbberle-n-im Dybli-Käller.

Achtung! D Generalversammlig isch nit am 26. Mai (dasch grad noo Uffart und doorum akuut "brugg-gfäärdet"), sondern eerscht am 9. Juni.

Am 18./19. Novämber mache mer e Drummeli-Iebigs-Weekend. Dien Eych drum dä Termyyn in dr Agända reserviere.

Vyyli hänn gmaint, es syyg e verfriete 1.-April-Scheerz, aber wenn dr Nicola eppis sait, denn maint är s immer ärnscht: Am Fryttig, 21. April, kenne (deerfe?) mer uff Ziiri go gässle! Die hänn deert soone Aaloss, wo ganz luschtig "Trummlebummle" haisst und als au Delegatione-n-us Basel mitmache. Uff dr Dambuure-Sytte und an dr Lämpesitzig git s mee Informatione.

Nit vergässe, am Sunntig isch Zytumstellig und alli Uure mien e Stund vorgstellt wäärde. Nach alter Zyt isch d Besammlig drumm scho am viertel vor nyyni!

S Fanachts-Team losst au no verlutte, me miess nyt zmoorge-n-ässe und me soll U-, 1/2-Tax und General-Abo mitnää.

Wär uns zoobe bim Gässle beglaite mecht, kaa sich uns so ab de siibeni in dr Frey Schtrooss aaschliesse.

D Lämpesitzig findet dismool eerscht am Mittwuch, 5. April, am achti zoobe-n-im Käller statt.

Fir alli sinn die eerschte-n-Iebigsstunde grad noo de-n-Ooschterfeerie. Mer dräffe-n-uns drum am 26. April im Leonhardschuelhuus.

Mer deerfe-n-au disjoor e Zuewaggs im Stamm verzaichne. Vo dr Junge Garde stosse d Nicole, d Danièle, dr Conny und dr Martin zue uns. Si wärde-n-uns traditionsgmäss am Bummel beglaite.

Au diväärsi Extärni hänn scho Inträsse bekundet, mer wäärde si glyy kenneleere. Me kaa sich iibrigens immer no mälde (Details sinn doo).

Bi wunderscheenschtem Wätter isch s Fasnachts-Drämmli uff d Route gange. Ussert ere kuurze demonschtrantische Sperrig vo dr Mittlere Brugg het alles tiptop glabbt. Mer hänn vyyli jungi Maitli und Buebe deerfe begriesse, wo s eerscht Mool e Piccolo und vor allem au Drummmelschleegel in d Händ gnoo hänn. Nadyyrlig kaa me-n-au scho die eerschte Fottene aaluege.

An dääre Stell e bsundere Gruess an d Giftschnaigge, wo uff em Glooreblatz au e-n-eerschti Leggtion gmacht und nit schlächt gstuunt hänn, wo mir mit em Fasnachts-Drämmli duuregfaare sinn.

An de näggschte baide Sunntig isch Bummel. Zeerscht die Jung Garde und druffaabe dr Stamm. Jeewyls so ca. am siibeni kemme mer die Frey Schtrooss aabe.

D Fasnacht 2006 isch umme. Mit em Schnee isch dismool alles e bitz speziell gsii und het vo alle Flexibildäät und bsundere-n-Yysatz verlangt. Aber zem Schluss hämmer alles uff dr Raiie brocht und drotzdäm drey wunderscheeni Daag erläbbt. Jetz fraie mer uns uff s Fasnachts-Drämmli und uff dr Bummel.

Au uff dr Sytte vo dr Junge Garde kaa me jetz die neyschte Fottene vo dr Fasnacht 2006 aaluege.

Hit zoobe hämmer Uusdringgede-n-im Dybli-Käller. Ab de-n-achti diemmer nomool in Erinnerige schwelge ...

S Album im Archyyv wird dääglig mit de neyschte Fottene vo dr Fasnacht aggdualisiert. Gang s go aaluege!

Do het uns dr Petrus e bsunder Fasnachtswätter bschäärt. Geschtert zoobe het s eppe-n-esoo uusgsee.

Au hit isch es nit vyl besser: Wääge de Pischteverhältnis bim Leonhards-Schulehuus miemmer dr Ladäärne-Apéro diräggt in Ruum Dybli-Käller/Peterskiirche verschiebe.

Ney git s Unser Bier im Dybli-Käller! Kumm doch an dr Fasnacht ko aastoosse ...

Alli, wo dr gmainsam Mittwuch vermisse, sinn häärzlig yyglaade, moorn zoobe-n-ab de-n-achti im Käller die letschte Blätzli z baschtle und scho mool uff d Fasnacht yyzstimme.

Au im 2006 wird s Fasnachts-Drämmli underwäggs sy, damit mer Neymitgliider fir die Jungi Garde und fir dr Stamm kenne wäärbe. Bisch intressiert, drnoo kumm uns am Samschtig, 18. Meerz, vom ains bis am finfi zmidaag ko bsueche. Mer faare uff dr Streggi Heywoog-Barfi-Märtblatz-Clarablatz-Bad. Baanhof.

Es gseet schytter uus, wemme d Prognoose uff Fasnacht Online aaluegt: Schnee, Rääge-n-und kalt.

Aber das macht uns yygflaischte Fasnächtler nyt uus, leege mer halt e Räägeschutz aa (die, wo aine bstellt hänn, kenne dä am Samschtig zoobe bezie).

D Laarve sinn fertig. Me kaa si drum zämme mit em Graage-n-am Samschtig zoobe-n-im Käller go abhoole oder noo de Marschiebige (am Sunntig und Mittwuch) mitnää.

Am Samschtig findet s groosse Ladäärne-Värsli-Brinzle statt. Wär Luscht het, kunnt ab de säggsi zoobe (oder au speeter) in Käller.

Glyy isch s esoo wyt, mer deerfe mit de Drummle-n-uuse. D Marschiebige sinn am

D Overall sinn aakoo (bis uf zwai Nr. 58, die kemme speeter nooche). Me kaa si an de Baschtel-Samschtig (z.B. am 21.1. ab de zääni) oder amme Mittwuch im Käller go bezie.

D Kopfladäärnli fir unseri Neymitgliider sinn ab sofort im Käller baraat. Bitte sprächet Eych mit em Obmaa ab fir d Iibergoob. Im Mitgliderberyych findet me ney e detaillierti Aalaitig zem Moole.

Nit vergässe: Am Samschtig isch dr letscht Termyyn, zem sich fir die diväärse-n-Ässe-n-an dr Fasnacht aazmälde. Provisoorischi Mäldige (e '?' uf dr Aamäldelyschte) wäärde-n-ooni Geegebricht automatisch definidyyv.

Mer wintsche-n-alle-n-e gutes 2006 mit vyyl Gsundhait und Gligg und Erfolg und ere scheene Fasnacht und vyylem Drummle-/Pfyffe-Iebe-n-und reeger Dailnaam an de Marschiebige-n-und erquiggligem Blaggedde-Verkauf und und und ...

Alli Fasnachtsdailnäämer mien in dr Zyt vom 20. Jänner bis zem 2. Hoornig iiri Laarve go aabasse. D Details sinn wie immer im Mitgliiderberyych.

Jetz isch au dr Aafaartsblaan zem Donnerbaum-Schuelhuus, Muttenz, verfiegbaar.

Wenn epper nit kaa koo, drnoo mäldet me sich under Aagoob vo Grind bim Obmaa bzw. bi dr Junggarde-Obfrau ab.