Home

Neys vom Daag

Mitdailige us em Joor 2004

aggdualisiert
31.12.2004
Källerdienscht 11.10.2004  

Dr ney Källerdienschtblaan isch scho lenger im Umlauf. Drotzdäm hänn sich no vyyli gar nit yygschriibe. Noochehoole kamme das an dr Sujet-GV vom näggschte Fryttig. Wär s bis denn immer no verbasst, wird vom Källerteam yydailt.

Drummeli-Billjee 07.10.2004  

In dr näggschte Dybli-Zyttig erschyynt dr Bstelltalon fir Drummeli-Billjee 2005. Wil dr Yysändeschluss scho am 21. Oggdoober 2004 isch, git s doo e-n-Online-Version (als PDF).

Drummeli-Iebe 07.10.2004  

Damit mer vor all däm Publikum, wo die Billjee kauft, au e gueti Falle mache, git s noo de Heerbschtfeerie-n-e Zusatz-Iebigsprogramm. Jewyls am Zyschtig sinn d Pfyffer im Rosshofkäller vo de Pfluderi (Dangge an Reto Wicki). Periodisch kemme deert d Dambuure mit de Drummle drzue. S Drummeli-Team wird e detaillierte Blaan verschigge, wo uuszugswyys in unser Jooresprogramm integriert isch. D Iebigsstunde-n-am Mittwuch finde als wie gwoont statt.

Zuewaggs 1 30.09.2004  

Mir deerfe zwai neyi Mitgliider in unsere Raiie begriesse. D Leandra Marti und dr Niggi Ballmer wäärde-n-ab sofort unsere Vordraab versteergge. Häärzlig willkomme! Noo de Heerbschtfeerie wäärde mer si im Käller "beguetachte" kenne.

Zuewaggs 2 30.09.2004  

Noch langem Sueche-n-isch dr Boschte vom Pfyffer-Inschdruggder wiider bsetzt. Mer begriesse häärzlig dr Roger Zehringer, wo sich uff dä schwiirig Fall mecht yylosse. Fir s Drummeli 2005 wird wytterhii dr Reto Wicki zueständig blyybe.

Dybliade zem zwaite 16.09.2004  

D Dybliade 2004 isch abgsait woorde! D Blaanig fir näggscht Joor lauft aber scho aa und gly wird au s ney Datum bekannt gää wärde.

Dybliade 02.09.2004  

Dr Urs het e-n-alti Traditioon wiider ufflääbe losse: D Dybliade isch e-n-Aaloss vom Stamm fir alli andere Gruppierige, primär nadyyrlig fir die Jungi Garde. S OK het jetzt folgendes bekannt gä:

Was:  DYBLIADE 2004 - e riise Blausch!
Wär:  Alli (Jungi, Stamm, Alti, Schwelger, usw. ;)
Wenn:  Samschtig, 18. Septämber 2004, Zyt: 14:00
Wo:  wird no nit verroote...
E glatte Samschtig Noomidaag, tolli Bryys z gwinne

und emool alli Dybli kenne leere!

glaini Programmiibersicht:

Besammlig 14:00

Start DYBLIADE 2004 14:30

Yydräffe bim Käller (Stiftsgass 9) 17:00

Rangverkindigung 18:15

aaschliessend gmietligs Zämmeheggle-n-im Glyggekäller

Es griesst s DYBLIADE-OK um dr

   Urs

Drummeli-Baschtle 02.09.2004  

Fir all die, wo s Drummeli-Baschtle-n-am letschte Samschtig verbasst hänn: Am Mittwuch git s im Käller jeewyls no d Gläägehait zem Noochehoole (no de-n-Iebigsstunde).

Drummeli-Iebe 02.09.2004  

Am Samschtig, em 30. Oggdoober, git s e ganzdäägigi Spezaaliebig, wo mer unsere Drummeli-Marsch vorwärts und ruggwärts, vo oobe-n-und vo unde, inneduure-n-und usseumme, usw. drille, bis ass uns d Oore gwaggle. Alli Dailnäämer solle sich dä Daag in dr Agända rot aastryyche! Detailaagoobe wäärde no bekannt gää.

Us em Vorstand 06.08.2004  

+++ Im Mitgliiderberyych isch d Adrässlyschte aggdualisiert und e neyi Sytte vom Vorstand uffgschalte.

+++ Nit vergässe: D Fasnachtsaamäldig muess bis Ändi Auguscht abgää wärde!

Ändi Feerie 06.08.2004  

D Summerfeerie sinn laider verbyy. Ruggbliggend hämmer jeede Mittwuch e toll Summerprogramm (ooni ai Dropfe Rääge) gnosse, em Event-Team syg häärzlig danggt. Am näggschte Mittwuch goot s mit de-n-Iebigsstunde wytter, aber halt, do isch doch no eppis ...

Champions League 06.08.2004  

Uusgrächnet wiider amme Mittwuch muess dr FCB sy eerschts Champons League-Haimspiil uusdraage. D Dambuure hänn doodrfir iiri Sonderreeglig, nämmlig s automatische Noochesitze-n-am Donnschtig druff (Details wie immer uff dr Dambuure-Homepage). Fir d Pfyffer findet d Iebigsstund normaal statt.

Summerprogramm 14.07.2004  

S isch nooni emool Halbzyt (eerscht zwai vo säggs Mittwuch hämmer im Kino und uff dr Fääri gnosse), und scho git s die eerschti Programmänderig. Laider het d Bar Rouge uusgrächnet jetz Bedriibsfeerie. Damit s kai Buff git, dräffe mer uns am 21. Juli aber drotzdäm wie aakindet am siibeni bim Mässdurm und starte vo deert in e vergnieglige-n-Iiberraschigs-Oobe. Also Ort und Zyt blyybe glych, aber uff d Uussicht miemmer dismool laider verzichte (Uffgschoobe-n-isch aber nit Uffghoobe).

Grillplausch 22.06.2004  

Achtung! Dr Grillplausch vo moorn zoobe-n-isch wääge schlächtem Wätter abgsait (wie dr Nicola brichtet). Mer dräffe-n-uns drum am achti zem e-n-improvisierte Programm bim Schuelhuus (und nämme 20 Stutz statt Piccolo und Schleegel mit).

Members only 22.06.2004  

Syt hit isch dr Mitgliiderberyych freygschalte. D Mitgliider vom Stamm hänn per Email s Passwort erfaare, wär s nooni bikoo oder scho wiider vergässe het, wändet sich an Obmaa.

Glygge-Grimpeli 21.06.2004  

Unser gmischts Team het am Sunntig e histoorische-n-Erfolg gfyyrt: Dr Vorstoos vo de Dybli in d Zwischerundi! Gratulation an alli Schutterinne-n-und Schutter, wo dooderzue byydrait hänn. S Heerre-Team isch scho am Samschtig laider am Goolverhältnis gschytteret und het aimool mee d Zwischerundi "numme ganz gnapp" verbasst.

Musigfescht 21.06.2004  

26 Dybli, wo am Sunntig im Service-Yysatz gsii sinn, kenne jetz us aigener Erfaarig bestäätige, ass d Feschtbaiz daatsächlig in ere Duurnhalle gsii isch und sich die Halle hervoorragend fir Marathonlauf- und Gwichtheeb-Iebige-n-aignet. Häärzlige Dangg fir dr Yysatz und gueti Besserig bim Uskuriere vom Musggelkaater ...

Noowuggs 16.06.2004  

Geschtert zoobe-n-am finf vor zääni isch dr Tiziano Elia Dreier, Sohn vo dr Sarah und em Nicola, uff d Wält koo. Är isch 3440g schwäär und 51.5cm gross. Härzligi Gratulation!

PS: Hoffentlig sinn jetz ändlig die nerveese Drummelstunde verbyy ...

Glygge-Grimpeli 15.06.2004  

Am Wuchenänd simmer im Schutt-Yysatz. Dr Chefcoach Dominik het uns am Samschtig uff 9:45h und am Sunntig uff 9:00h (scho!) uffbotte. Details sinn doo ersichtlig.

D Spiilzytte sinn zem Gligg esoo, ass au d Spiiler an s Hochzytsständeli und an s Musigfescht kenne koo.

Hochzytsständeli 15.06.2004  

Am Samschtig isch au s Hochzytsständeli fir d Nicole. Mer dräffe-n-is am halber zwai vor dr reformierte Kiirche-n-in Oberwyl (an dr Therwylerschtrooss 44). Répertoire: Unggle Sam und e wyttere Marsch (dä isch denn zämme mit de Schwelger).

Musigfescht in Arleshaim 15.06.2004  

Dr ganz Sunntig simmer in drey Schichte-n-am Feschtbedriib vom Kantonaale Musigdaag in Arleshaim im Service-Yysatz (in dr Meerfachduurnhalle am Schwimmbadwäg). Die, wo nooni yydailt sinn, mälde sich sofort bim Obmaa.

Neye Vorstand 15.06.2004  

An de Generalversammlige vom Stamm und de Schwelger isch e Dail vom Vorstand ney gwäält worde. Mer gratuliere ganz häärzlig:

  Claude Pellmont  Vizeobmaa Stamm
  Rolf Wichtermann  Obmaa Jungi Garde
  Caroline Kropf  Obfrau Schwelger
Scho vorhär hänn d Gruppierige zem Dail neyi Cheffe gwäält:

  Conny Martin  Pfyffercheffin
  Conny Müller-Furrer  Vordraabscheffin
Uff dr Kontaggdsytte sinn alli uffgfiert.

Homepage-Niuus 15.06.2004  

S Meedieteam isch kreftig am Archyv zämmestelle. Bald git s deert e verdiefte-n-Yybligg in d Vergangehait vo uns Dybli.

In de näggschte Dääg wird au dr Mitgliiderberyych freygschalte (die Berächtigte bikemme s Passwort per Email). Deert kamme denn d Statute, d Mitgliiderlyschte, dr Källerdienschtblaan etc. abrueffe.

Uff! Gschafft! 24.03.2004  

Neyi Harddisk lauft, alli Daate grettet, Baan frey fir e-n-Update vo dr ...

Homepage 24.03.2004  

Im Archyyv git s jetzt ney e Bricht vo dr Stamm-Fasnacht 2004 und ändlig au e Fotti-Album mit eme Huffe Bilder.

Iebigsstunde 24.03.2004  

D Iebigsstunde fir die näggscht Saison fange noo de-n-Ooschterfeerie-n-am Mittwuch, 21. April, pinggtlig am achti zoobe aa.

Was isch mit unserer Homepage los? 11.03.2004  

D Fasnacht isch umme, und aigedlig haa-n-y vorhär no alles baraat gmacht, um sofort die eerschte Fottene uffzschalte. Scheen wär s gsii.

Laider het dr Murphy zuegschlaage-n-und my Harddisk ruiniert. Ab hit lauft my Computer wiider und jetz muess y luege, was vo de Dateye no alles umme-n-isch. Hoffe mer s Bescht.

Yyschryybe 11.03.2004  

Moorn kunnt s Inseraat im Baslerstab, wo mer neyi Mitgliider im Stamm sueche und v.a. au uff d Pfyfferschuel fir Erwagseni hiiwyyse. Intressänte kenne sich bim Obmaa mälde-n-oder diräggt am näggschte Mittwuch (17. Meerz, ab de siibeni) in Käller an s Yyschryybe koo. Langdienti Stämmlerinne und Stämmler sinn nadyyrlig au willkomme.

Ständeli 11.03.2004  

Am näggschte Sunntig mache mer e-n-Iiberraschigs-Ständeli. S Event-Team het Eych scho infromiert und es hänn sich au scho vyyl aagmäldet, die wo s nooni gmacht hänn, deerfe drotzdäm au no ko.

Speziaal-Iebig 05.02.2004  

Achtung! Dr Nicola het entschiide: Us fäärnseebautechnische Grind git s hit kai Speziaal-Iebig fir d Dambuure.

Fasnachtsprogramm 05.02.2004  

Unser Fasnachtsprogramm kaa me jetz au als PDF-Datey aabelaade.

Dybli-Käller 05.02.2004  

Uff dr Käller-Sytte findsch d Effnigszyyte an dr Fasnacht und s Aagebot an Schpyys und Drangg.

Fasnacht 23.02.2004  

D Fasnacht stoot vor dr Diir. Dr letschti Faade wird verstäätet und dr letschti Dropfe Haisslyym isch am hart wäärde. Und e letscht Mool luegt me die aint oder anderi Stell in de Noote nooche. So langsam kunnt s Gribbele-n-im Buuch ...

Fasnachtsversammlig 23.02.2004  

Disjoor hämmer d Yydringgedde ze re Fasnachtsversammlig welle-n-erwyttere. Doch laider het uns dr FCB e Strich dur d Rächnig gmacht (es isch mer zwor lieber, es kemme drfir alli an Ladäärne-Apéro). Also alli FCB-ler: Dr Käller isch nadyyrlig au noo-n-em Match no offe.

Dr Drummler 23.02.2004  

Mache mr en, mache mr en nit? D Dambuure wärde wool nomool iebe miesse, dr Nicola wird uns d Detail mitdaile (lueg perioodisch uff dr Dambuure-Websytte-n-yyne).