Neys vom Daag

Mer wintsche-n-alle scheeni Feschtdääg und e gute Rutsch!

Jä, dä dänggwiirdig Oobe-n-isch umme. Alli, wo-n-en verbasst hänn, kenne-n-im Album e baar Impressione gniesse. Wär het no mee luschtigi Fottene? Bitte schigget si an s Archyyv.

Im Mitgliiderberyych sinn die neyschte Informatione vom Sujet-Team. Doo grad scho die wichtigschte Termyyn:

Laarvenaabasse: 5.12. & 12.12. vo 19:00-22:30h

Baschtle: 13.12. & 14.12. ab 18:00h

Goschdyymuusgoob: ab 5.12. jeede Mittwuch.

D Dybli-Dambuure hänn uff drummelinfos.blogspot.com e neyi Website. Deert findet me vo alle-n-Inschdruggder (Jungi Garde-n-und Stamm) alles rund um d Iebigsstunde-n-und Huusuffgoobe. Also bitte reegelmässig konsultiere.

Im Weekend hämmer d Sujet-GV abghalte. Drbyy sinn dr Michi als bewäärte Zugchef und dr Niggi als neye Dambuurmajor gwäält woorde. Häärzligi Gratulation.

Au unser Sujet '08 isch bräsentiert woorde, wo mer doo nadyyrlig no nit wänn verroote. D Mitgliider, wo d Sujet-GV verbasst hänn, kenne s im Mitgliiderberyych noochelääse.

Wie jeedes Joor: Die Junge geen an d Mäss und dr Stamm goot mit. Me drifft sich am viertel vor siibeni uff em Glooreblatz vor dr Migrosbangg.

Jetz wird s lansam ärnscht. Dr Dyli-Oobe am 1. Dezämber schtoot vor dr Diir. Alli blaane-n-und Iebe wie wild fir iire-n-Uffdritt. Drbyy sott me d Aamäldig nit vergässe: Schigget dr Talon bis speetischtens am 15. Novämber yy und vergässet nit, au alli Frinde, Verwandti und Bekannt yyzlaade.

Dr Roger Sigrist, unser langjäärige Kinschtler (diväärsi Stammladäärne und Gstaltig vo Drummeliuffdritt und Zugsgoschdyym) und aggdyve Dambuur (underdesse bi de Schwelger), het jetz sy aige Fasnachtsatelier zem Dolgge ereffnet.

Bruuchsch e neyi Laarve-n-oder mechtsch e-n-alti ney moole losse, suechsch e Fasnachtshelge oder Entwiirf fir e Goschdyym, hesch e Ladäärnli zem Moole usw., denn findsch alles bim Roger, wo Dir bi alle kinschtlerische-n-Aaliige mit syyner Erfaarig und sym unverkennbare Stiil sicher kaa wytterhälfe. Lueg aifach emool yyne ....

Am näggschte Mittwuch (15.8.) mache mer e Brainstorming fir s Sujet '08. Mer dräffe-n-uns ab em viertel ab nyyni im Käller (d Iebigsstunde geen numme bis am nyyni, dr Vordrab isch au drbyy). E jeede bringt glatti Idee-n-und gueti Luune mit. S Sujet-Team wird deert au iiber die wyttere Blään zer Laarve-n-und Ladäärne brichte.

Dasch jetz scho s vierte Mool, ass mer us wättertechnische Grind e-n-Aaloss mien absaage (soovyl zer Kliimaerweermig ...). Also, kai Grilliere hit zoobe, mer gsän uns am näägschte Mittwuch wiider in de-n-Iebigsstunde.

Zem 30. Geburtsdaag vo dr Eva und au grad zer Verloobig mit em Martin gämmer am 25. Auguscht e Ständeli (17:30, Sandweg 57 in Allschwyl, s' Dybli und z' Basel).

Au in däm Joor mache mer amme Lotto-Match mit, und zwor am 11. & 12. Oggdoober. S kunnt e jeede zem Yysatz, Vordritt hänn die, wo s letscht Joor verbasst hänn. D Aamäldige nimmt dr Tom entgeege.

Was letscht Joor e glatti Sach gsii isch, diemmer nadyyrlig wiiderhoole: Am Sunntig, 12. Auguscht, geen alli Wasserratte-Dybli uff Thun und faare mit em Gummibeetli uff dr Aare-n-uff Bärn. Alli Details git s im Flyer und aamälde kaa me sich bim Obmaa.

Jetz längt s mit dr eewige-n-Angscht vor em Wätter. Mr risggiere s hit zoobe-n-und geen in d Grien 80 go Minigolf spiile (Dräffpunggt am siibeni). Wenn denn doch noo-n-e Gwitter kunnt, kenne mer immer no go .... (das mache mr denn spontaan ab).

Dr Petrus will nit. Mer dräffe-n-uns hit zoobe (d Zytte blyybe glyych) drum alli diräggt im Dybli-Käller.

D Struggduur vom Archyyv isch iiberaarbaitet woorde. Me kaa jetz uff dr lingge Sytte bequeem dur die ainzelne-n-Yydrääg blettere. Lueg doo, wie s funggtioniert. Als näggschts sinn denn – frisch vom Staatsarchyyv – neyi Yydrääg (Rädäbäng und Zeedel) vo aafang 70er Joor in dr Pipeline. Und glyy wird s au fir die ainzelne Joor e Prässespiegel gää.

Soo dr Petrus will, kenne mer zämme mit dr Junge Garde-n-am näggschte Mittwuch noo vyyle Joor ändlig wiider emool dr Vorsummerfeerie-Abschlussgrillblausch in Scheenebuech abhalte. Dräffpungt isch an dr Bushaltstell Im Pfyffesagg, fir die Glainschte-n-am 18:00h und fir die Eltere-n-am 18:30h. D Stammlyt kenne-n-au speeter koo (aifach d Strooss linggs duruff bis zem Waldrand, lueg uff em Bläänli). E jeede bringt sy Ässe-n-und Dringge sälber mit.

Wenn s Wätter wiider nit sott mitmache, drnoo findet s ganze-n-aifach im Dybli-Käller statt (im Zwyyfelsfall Tel. 1600 oder doo uff dr Homepage luege). D Iebigsstunde falle-n-in jeedem Fall uus.

Alli Junge kenne sich no bis zem 6. Juli 2007 fir s Iebigs- und Sujetweekend aamälde. Uff em Flyer sinn alli Details und dr Aamälde-Talon.

D Zwischerundi isch in däm Joor laider au d Ändrundi gsii. Zwai "gnabbi" Unentschiide hänn nit fir dr eerschti Grubbeblatz glängt (neyschti Fottene nadyyrlig im Album). Mer hänn uns denn halt mit emme kiele Bier dreeschtet und wintsche jetz dr Patricia in iirem Uffstiigsspiil uff dr Schitzematte vyl Erfolg: Hopp, Patricia!

Mit zwai Mannschafte (d Samba-Dybli bi de Schutter und d Friidens-Dybli bi de Gmischte) hämmer unseri wunderscheene neye Lyybli uusgfiert. Mindischtens bi de Friidens-Dybli het s gwiirgt: Mer hänn alli drey Grubbe-Spiil dyttlig gwunne-n-und kemme moorn in d Zwischerundi. D Samba-Dybli sinn laider numme dailwyys erfolgryych gsii. Eerschti Bilder het s im Album.

An dr GV het me sich kenne-n-in d Team-Lyschte-n-yydraage. Wär das verbasst het (das sinn bis jetz all die uff dääre Lyschte), soll sich so glyy wie meeglig bim Obmaa mälde.

Moorn zoobe offeriert s beriemte Starkochduo Sonja & Gilbert im Dybli-Käller e wunderbaare Wurtschtsalaat mit (feynem unsrigem oder ney au siessem ;-) Bier. Voorreservatione zwäggs Yykaufskoordination sinn uusdrigglig erwintscht; sunscht gilt: s het, solang s het.

Doo no die letschte-n-Informatione zem Handball-Grimpeli (11. Juni): Dräffpunggt isch am säggsi zoobe-n-uff dr Sandgruebe. Mr hänn denn vier Mätsch à 14 Minute dusse-n-uff em Raase. Falls mer wytter kääme, drnoo wääre mer denn am Fryttig noonemool im Yysatz. Mitbringe: S iiblige Duurnzyg (mir hänn unseri Dybli-Tshirts drbyy) und e Saggäld fir eppis z Dringge-n-und vom Grill.

Im Archyyv hämmer jetz e Bricht vom Hans Räber iiber d Glygge-Grindig im Joor 1964 und iiber d Entwigglig bis zem Jubilääum 1989, nadyyrlig isch au sy beriemts Inseraat im Baslerstab vorhande.

Doo sinn die eerschte Highlights vo-n-ere dänggwiirdige Generalversammlig geschtert zoobe:

- Dr Claude Pellmont und dr Tom Ledermann sinn s neye Obmaa/Vize-Gspann, wo d Gschigg vo dr Gylgge in d Händ hänn gnoo. Häärzligi Gratulation zer glanzvolle Waal.

- Dr Dybli-Käller isch ab sofort rauchfrey. Uusnaame git s numme no an dr Fasnacht und bi Vermietige.

Noo langem rächne-n-und ummeschiebe hämmer jetz ändlig die definidyyvi Ranglyschte mit de zää beschte Blaggedde-Verkaifer vom Stamm. Wär brieffe mecht, ep me sich näggscht Joor no mee in s Zyyg muess leege, findet d Lyschte uff dr Sytte vom Blaggede-Team.

Jetz hämmer d Yylaadig fir die 25. oordentligi Generalversammlig vom 1. Juni 2007 verschiggt. Eleggdroonisch Aggdyyvi kenne s ganz au doo als PDF aaluege. Aggdyvmitgliider, wo nit kenne koo, mälde sich vorhär bim Obmaa ab.

Dr Tom isch draa, e Dybli-Mannschaft fir s Handball-Grimpeli am 11. Juni zämmezsueche. Wär fit isch mäldet sich diräggt bi iim.

Jetz isch es offiziell: Dr Le Lancier wird uusegheyt und drfir leere mer s Ooremyggeli. Pagge mer s aa ...

Am 2. und am 16. Mai hämmer kaini Iebigsstunde. S Schuelhuus isch jeewyls zue, bim eerschte Mool wääge Schuelsynode und bim zwaite Mool isch s grad vor dr Uffaart.

Geschtert zoobe-n-am nyyn ab zääni isch dr Loris Emanuel Dreier, zwaite Soon vo dr Sarah und em Nicola und Brueder vom Tiziano uff d Wält koo. Är isch 3480g schwäär und 50cm gross. Häärzligi Gratulation!

Noo unserem sensationelle-n-Erfolg am Drummeli het dr Maischter-Drummel-Komponischt Nicola Dreier jetz dr Drummeltäggscht fir d Brandeburger vereffentliggt. Me kaa-n-en doo aabelaade (PDF).

Mer steen baraat fir unsere-n-Uusfluug uff Ziiri. Abfaart isch am Fryttig, 13.4., 17:00h, in dr Gaartestrooss bim Aescheblatz. Details findsch uff em Info-Blatt (PDF).

Doo isch au no d Lyschte mit de-n-Aagmäldete. Wär no kurzfrischtig uffspringe-n-und mitkoo mecht, soll sich sofort bim Obmaa mälde!

Jetz isch also au dr Bummel verbyy. Im Album kaa me nomool e baar Impressione gniesse. Fazit, s isch alles in allem e fiechti/nassi Sach gsii ...

Jetz isch alles glar: Mer faare mit em Bus, denn simmer flexyybler bim zurggkoo. Keschte sinn max. 30 Frangge, s hängt drvoo ab, wievyyl ass mitkemme. Bis jetz hänn sich scho iiber 40 Dybli gmäldet, wär au no will, sait das bis am Mittwuch em Obmaa.

Jetz kunnt d Zyt vo de vyyle Sitzige. Als eerschts isch d Lämpesitzig am Mittwuch, 21. Meerz, am achti zoobe-n-im Käller.

Am eerschte Mittwuch noo de-n-Ooschtere (18. April) sinn denn au die baide Pfyffer- und Dambuuresitzige, und zwor au am achti zoobe, wo wird no bekannt gää. Aaschliessend sitze mer denn alli no im Dybli-Käller zämme.

Dr Iebigsaafang fir Pfyffer und fir Dambuure isch denn am Mittwuch druff, nämmlig am 25. April.

Achtung! D Wiiderhoolig vom bekannte Querschitt kunnt neyerdings scho moorn zmidaag (Fryttig, 16.3., 13.45-15.20h) statt eerscht am Samschtig. Wär s also am Jung-Garde-Bummel verbasst het, muess dr Video ney programmiere. Besser wär nadyyrlig, die Duuble z Leutschebach wuurde d Eerschtusstraalig wie friener am Sunntig noo dr Fasnacht bringe (statt dä idiootisch Teeny-Krimskrams).

Und scho isch s dritte Basler Dybli Fasnachts-Drämmli Gschicht. Bi aimol mee heerrligem Wätter hämmer vyyle Maitli und Buebe kenne s Piccolo und d Drummelschleegel zaige. E baar Fottene git s nadyyrlig im Album.

Mir sind fescht bedroffe iiber dr draagisch Unfall, wo vyyl Druur und Lyyd in d Fasnachtswält vo dr VKB, aber au in unseri aigeni brocht het. Unseri Gedangge sinn jetz bi dr Familie und de Bekannte vom Laurenz. Mir wintsche us diefschtem Häärze Hoffnig und Graft in dääre dunggle Zyt.

Jetz isch si also scho wiider umme, d Fasnacht '07. S isch aimool mee wunderscheen gsii und mit unserem Sujet (v.a. mit de vyyle individuelle Reggwisyte) hämmer bi vyyle doch e blyybende-n-Yydrugg hinderloo. S Wätter het usser am Määntig au so zimmlig mitgmacht und alli Wätterfresch uff em falsche Bai verwitscht.

Die näggscht Fasnacht isch denn vom 11.-13. Hoornig 2008, bis denn kaa me jo nomool im Archyyv schwelge, wo s d Zeedel, Rädäbängyydrääg und nadyyrlig au s Album z bewundere git.

S näggscht und muetmaasslig au letscht Trummlebummle in Ziiri isch am Fryttig, 13. April (!!!). Mer blaane wiider e-n-Exkursion, drum reserviert scho mool dä Oobe. D Details kemme speeter.

Am Ladäärne-Apéro und Yypfyffe (Fottene) hämmer nomool ainigermasse drogge Wätter kenne gniesse. Hoffentlig hebbt s bis moorn demoorge ....

Alles rund um s Drummeli 2007 findsch jetz im Archyyv

Stellbroob im Leonhardschuelhuus

Dr Uffdritt mit wyttere Meedie-Hiiwyys

Rund um s Drummeli

S Drummeli 2007 het geschtert gändet. Mer hänn s alli gnosse-n-und sinn stolz, ass unsere nit ganz aifach Marsch bim Publikum und de-n-andere Glygge guet aakoo isch. Dämnäggscht git s im Archyyv denn e glaini Ruggschau.

Uffgrund vo de-n-akuute Wind- und Räägerverhältnis hämmer zer Schoonig vo unsere Drummeli-Frisuure d Marschiebig hit zmidaag abgsait und uff dr Mittwuch, 21. Hornig, verschoobe. Mer dräffe-n-uns denn alli am achti zoobe bim Joggeli-Parggblatz.

Am 10. Meerz faare mer wiider mit em Fasnachts-Drämmli! Ney leemer s Glaibasel us und pändle zwische Haiwoog und Schiffländi. Dr Faarblaan stoot au scho, jetz bruuche mer numme no vyyl Faargescht.

Noo dr hittige-n-eerschte Marschiebig het dr Dambuureninschdruggder kurzfrischtig no e separaati Drummel-Marschiebig aagsait (Gricht, er haig sich vom hittige-n-Yydrugg drzue verlaite losse, wäärde voll und ganz vehemänt zrugggwiise). Me drifft sich am Mittwuch, 21. Hoornig, am achti zoobe uff em Joggeli-Parggblatz.

Nadyyrlig isch au an dr Fasnacht dr Dybli-Käller wiider offe. Bitte verdailet unsere Flyer an Frinde, Bekannti und Verwandti.

S Fasnachtsprogramm vom Schtamm stoot und kaa jetz au als PDF uusdruggt wäärde.

D Laarve sinn friener fertig als dänggt. Me kaa si ab sofort im Dybli-Käller abhoole (amme Mittwuch oder am Samschtig, 3. Hoornig). Bim Vordraab fääle noo-n-e baar Hyybli, bitte die unbedingt bis zem Samschtig mitbringe. Fir d Pfyffer und Dambuure git s no Zuesatzhiiwyys zem Goschdyym.

Mer fraie-n-uns, an dr gmainsame Marschiebig vom 4. Hoornig (10:15h an dr Drammhaltstell Eeglisee) näb dr Junge-n-au die Alti Garde deerfe z begriesse. Zer Erinnerig: D Dailnaam isch an alle Marschiebige-n-obligadoorisch, Abmäldige sinn ainzig bim Obmaa meeglig.

S Event-Team laadet yy zem draditionelle Drummeli-Ässe. Aamälde muess me sich bis speetischtens am 31. Jänner bim Tom. Au am Ladäärne-Uffbau isch s Event-Team im Yysatz und wird uns verkeschtige.

Es sinn glaini Eraigniss, wo uff dr schlyychend Klyyma-Wandel hiiwyyse. Aggduell sinn z.B. die nit exischtierende Schneeverhältnis in Portes du Soleil, wo uns laider zwunge hänn, s Schyyweekend abzsaage. Villicht git s jo noo dr Fasnacht kurzfrischtig e Gläägehait fir e neye-n-Aalauff.

Moorn zoobe kenne mer im Käller wiider e Mittwuchs-Menü aabiete, s git Staipilz-Risotto. Voraamäldige sinn erbätte an Thömi.

Dr Blaggeddeverkauf isch erfolgryych aaglooffe. Me kaa wie allewyl bim Blaggedde-Team no noochebstelle (blaggedde@basler-dybli.ch). Au fiere mer wiider e lauffend aggdualisierti Lyschte vo de Maischterverkaifer.

Ändlig sinn unsri Uffdritts-Zytte bekannt. Mer kemme zoobe am 20:09h draa, noo dr Ari und vor de Schotte. S Detail-Programm findsch im Drummeli-Kaländer.