Neys vom Daag

Hit isch die ney Blaggedde '06 vereffentligt woorde. Si zaigt e Basler Kopf, wo an de scheenschte drey Daag d Fasnachtsgedangge uusequille. Entsprächend haisst s Motto denn au "Drei Daag offe" (fir Gugge-n-und Männerglygge-n-in dr Variatioon mit "bs" vor em "offe" ;-). D Bryyse sinn glych wie letscht Joor (Kupfer 7.–, Silber 14.–, Gold 45.–, Bijou 100.–). Wär s gnau mecht wisse, kaa uff dr Homepage vom Comité Bildli aaluege-n-und Details noochelääse.

D Blaggedde-Uusgoob isch am Samschtig, 7. Jänner. Dr Dybli-Käller isch denn ab de zääni demoorge-n-offe. Bitte dien vorhär no Eyri Bstellige-n-an s Blaggedde-Team schigge (z.B. an die ney Email-Adrässe).

Jetz git s kai zrugg me. D Schwelger hänn d Yylaadig fir dr 14. Jänner 2006 verschiggt (doo nomool als PDF). D Dailnaam isch jo bekanntlig fir dr Stamm und die Junge-n-obligadoorisch (vgl. Reglemänt), aamälde muess me sich bis speetischtens am 7. Jänner (also an dr Blaggedde-Uusgoob).

Mit em Wiehnachtsässe moorn zoobe (Diireffnig am siibeni, Bächer mitnää) schliesse mer s Dybli-Joor 2005. Dr näggscht Termyyn isch denn am 7. Jänner 2006 im Dybli-Käller mit dr Blaggedde-Uusgoob, Goschdyymbaschtle-n-und Kopfladäärnlimoole.

Mer wintsche scheeni Wiehnacht und e guete Rutsch!

Mer kenne hit zoobe dr FCB-Match im Käller luege. Dr Vordrab und d Aafänger scho vo Aafang aa, Pfyffer und Dambuure halt numme die zwaiti Halbzyt (d Iebigsstunde finde normaal statt).

Noo dr Sujet-Bräsentation goot jetz s grosse Sammle, Naiie-n-und Baschtle loos. Doo git s ney detaillierti Hiiwyys, nadyyrlig numme fir d Mitgliider, mer wänn no nyt verroote ...

An dr Sujet-GV sinn wie all Joor au wiider Waale-n-aagstande. Mer gratuliere im

D Yylaadig fir d Sujet-GV kunnt demnäggscht! Do scho e Vorabinfo:

S git e themaatischi Yyfierig. Fir die drifft me sich scho am 18:20h (Ort wird no bekannt gää). Wär deert mecht drbyy syy, mäldet sich bitte so schnäll wie meeglig bi dr Sujet-Obfrau Nadja.

Die aigedlig GV findet denn am 20:00h im Rest. Clipper an dr Flughaafeschtrooss 61 statt. Deert wird s Sujet bräsentiert und mr wääle dr Dambuurmajor und dr Zugchef.

Wär als Dambuurmajor oder Zugchef kandidiere mecht, mäldet sich bim Vizeobmaa Claude, dr Obmaa isch nämmlig anderwyttig bsetzt säll Oobe.

Im Mitgliiderberyych isch jetz au dr aggduell Källerdienschtblaan uffgschalte. Wenn de nimm waisch, wenn dy Yysatz isch, drno hesch jetz kai Ussreed me.

Us aggduellem Aaloss falle d Iebigsstunde fir dr Stamm am Mittwuch, 16. Novämber, us. Wär mecht, ka im Käller dr Match ko luege. Saaleffnig isch am siibeni zoobe.

Uffgrund vom kuurzfrischtige Bstelligstermyyn fir Drummeli-Billjee isch dr Vizeobmaa yygschprunge. Me kaa iim ab sofort Bstelltalon no bis zem 10. Novämber (yydräffend) schigge. Doo findsch d Kontaggdaagoobe vom Claude.

D Homepage vo de Dambuure-n-isch zrugg in Schoss vom Stamm. Me findet si ney under "www.basler-dybli.ch/tambouren". Inhaltlig wird si wytterhii vo unserem Oberdrummelcheffinschdruggdr bedrait.

In dr näggschte Dybli-Zyttig isch dr Bstell-Talon fir d Drummeli-Billjee 2006. Laider het sich d Zyttig e bitz verspeetet (si wird moorn verschiggt), doorum kamme dr Talon au doo als PDF aabelaade und usfille.

Dr Talon muess bis speetischtens am Fryttig, 4.  Novämber, bim Obmaa yydräffe (Abgää am Pfyffer-Ässe zellt nimm!).

Achtung! S Pfyffer-Ässe-n-isch uff dr 4. Novämber 2005 verschoobe woorde.

Gratulation an s Lampe-Team. Es het als eerschts e-n-ussfierlig Pflichteheft (34 Sytte!) fabriziert und uff d Homepage gstellt. Zuesätzlig git s au e detaillierte Plaan, wie d Ladäärne fir die nägscht Fasnacht rächtzyttig uffbaut wird.

Das isch jetz e Stailvorlaag an die andere Teams, au entsprächendi Doggumänt z erstelle-n-und an Webmaster zem Uffschlate z schigge.

E jeede soll am näggschte Mittwuch (28. Septämber) dr Bächer in d Iebigsstund mitnää.

Geschtert isch unsere Provider offebaar gsteert woorde, drum het me-n-au unseri Homepage nit immer kenne-n-erraiche. Jetz sott alles wiider funggtioniere. Details findsch doo.

S Archyyv-Team isch schwär am schaffe. Unterdesse sinn no mee Zeedel online und me kaa jetz au dr aaggduelli Stand mitverfolge.

Wär no eppis waiss oder gar Unterlaage kaa zer Verfiegig stelle, mäldet sich bitte glyy bim Archyyv-Team.

Mir hänn an dr letschte Teamleaderversammlig beschlosse, kai Bapyyr-Iebig mit Aamäldetalon me z mache. Dr Obmaa goot mit dr Lyschte-n-umme-n-und wird alli perseenlig interwiuue.

Im Mitgliiderberyych kaa e jeede dr aggduelli Stand vo de-n-Aamäldige aaluege-n-und sy Yydraag iiberpriefe.

Gmäss mindliger Uskunft vom Comité kaa me auf fir s Drummeli 2006 wiider glyych detailliert Billjee bstelle wie letscht Mool. In dr näggschte Dybli-Zyttig kunnt dr Bstell-Talon, Yysändeschluss isch ca. aafangs Novämber, Billjee-Uusgoob isch am 7. Jänner (geege Barzaalig).

Am Donnschtig am finf ab zwai zmidaag isch dr Jim Sveninho Knöpfli, Sohn vo dr Nicole und em Sven, Brueder vo dr Nausikka, uff d Wält koo. Är isch 3170g schwäär und 47cm grooss. Häärzligi Gratulation!

S Allschwyler Dorffescht isch verbyy und dr Basler Dybli Raase-Deppich wiider versorgt. D Organisation het tadellos funggtioniert. E häärzligs Danggscheen an d Claudia und dr Claude vom OK und an alli, wo mitghulfe-n-und mitdrungge hänn.

Dr Drummelimarsch 2007 stoot fescht. Är wird dr Glygge-n-am näggschte Mittwuch noo de-n-Iebigsstunde vorgstellt (im Pfyffer-Zimmer). Bis denne blybt s noo-n-e Ghaimnis ... (fagglet die Burg ab!)

Im Mitgliiderberyych het s underdesse-n-e Huffe neyi Rubrigge: Statute, GV-Bschliss, Mitgliider-Lyschte, Adräss-Eddigedde, Email-Verzaichnis und im Momänt au e glains Quiz, wo brieft wird, eb me d Ghaimnis vom Boschtversand begriffe het.

Au zem Källerdienscht git s jetz detaillierti Informatione. D Dienscht-Lyschte wird uffgschalte, sobald s Källerteam si mr git.

Underdesse hänn sich fascht alli in e Team yygschriibe. Die letschte baar sinn an dr Teamleader- und Vorstandssitzig vom letschte Zyschtig yydailt woorde. Die beträffende Daame-n-und Heerre wäärde vo iirem neye Teamleader informiert.

Fir jeedes Team git s e-n-aigeni Sytte-n-uff dr Homepage. Deert findet me im Momänt numme-n-e glaini Beschryybig und d Lyschte mit de Team-Mitgliider. D Idee wär aber, ass jeedes Team sich gnau vorstellt und au allfälligi Doggumänt publiziert (die geen denn nämmlig nie me verloore ...). Also: schryybet loos und schigget alles an Webmaster.

S'Dorffescht in Allschwil ruggt immer neecher. Ass mir an unserem Stand au vyyli Gescht kenne begriesse, bittet s OK Eych, dr Flyer meegliggscht brait z straie (grad ans ganze Adrässebuech wytter schigge).

Nämmed Eyri Frinde, Bekannte, Aarbetskolleege, Joggeli-Sitzblatznoochbere (z.B. noo-n-em Match am Samschtig), Bekanntschafte us em Drämmli und iiberhaupt alli, wo-n-Iir kennet, mit an unsere Stand. Mr hoffe uff e groosse-n-Umsatz!

Die "letschte Wyysige" (Yysatzblaan) usw. bikemme Dr mit separaater Boscht.

Es griesst fir s OK

dr Claude

PS: M sueche fir am Fryttig und am Sunntig (Uff- und Abbau) immer no-n-e greessers Transporterli. E Faarzyyg z miete wurd vermuetlig vyl vom erwirtschaftete Gwinn wiider ufffrässe.

Scho finf Mool hämmer uns ze verschiidene glatte-n-Aaloss droffe, doch bim säggste-n-und letschte het uns dr FCB e Strich dur d Rächnig gmacht: Wil die maischte-n-ainewääg im Joggeli wäärde sy, findet moorn zoobe au dr zwait Grillplausch vo däm Joor nit statt.

Mer dräffe-n-uns drumm eerscht am näggschte Mittwuch wiider in de-n-Iebigsstunde.

Dr Grillplausch hit zoobe-n-isch abgsait. Unsere Grillblatz-Chef draut em Wätter nit ganz. Mir dräffe-n-uns drumm wie immer am achti bim Schuelhuus.

Mer hänn unseri Homepage e bitz erneyeret. D Yygangs-Sytte-n-isch ney und s Layout sott jetz bi allne besser uusgsee. In de maischte Rubrigge kamme-n-uff dr lingge Sytte ney Detail uuswääle.

Ganz iiberarbaitet isch dr Mitgliider-Beryych, wo s jetz nit numme d Adräss-Lyschte etc. het, sondern au fir jeedi Gruppierig und jeedes Team e-n-aigeni Sytte. Wär s Passwort nimm waiss, frogt bim Webmaster nooche. Däm dailt me-n-au mit, wenn bi epperem eppis nit funggtioniert oder koomisch uusgseet.

Ney het jeedi Funggtion in dr Glygge e-n-aigeni Email-Adrässe "...@basler-dybli". Emails deert aane wäärde denn grad an die zueständig(e) Persoon(e) wytterglaitet. E Lyschte mit allne findsch uff dr Kontaggd-Sytte.

OK. D GV isch umme. Uffqualmendi Rauchzaiche hämmer mit eme glaine, unbestrittene (;-) Beschluss besyttigt, bevor s zem e greessere Flechebrand uusgaartet isch.

Mer deerfe zwai neyi Daame-n-im Vorstad begriesse: D Leandra Marti isch als neyi Seggredäärin gwäält woorde und d Nadja Studer wird jetz au offiziell d Gschigg vo dr Junge Garde laite. Häärzligi Gratulation zer Waal!

Nit vergässe. Am Fryttig, 27. Mai, isch d Generalversammlig (Yylaadig als PDF). Mer feen pinggtlig am halber achti aa. Aggdyvmitgliider, wo nit kenne koo, mälde sich bitte vorgängig bim Obmaa ab.

Die ney Homepage vo dr Junge Garde isch uffgschalte. D Nicole het doo e scheeni Sytte uff d Bai gstellt. Gratulation!

Es isch wiider emool e-n-Iiberaarbaitig am due. Nääbe-n-em Repariere vo dr Yygangssytte (Microsoft und Apple kenne-n-offebaar immer no kaini transparänte PNG-Bilder aazaige ...) isch dr Archyyv-Beryych in Vorberaitig, zem all die neye-n-alte Sache z bräsentiere, wo am Archyyvhogg (20. April) zämmedrait wäärde (drumm mien im Momänt au d Fottene vom Stamm-Bummel und em Schyy-Weekend no waarte). Parallel drzue wird denn au die Jungi Garde in unser Syschteem integriert.

PS: Es hänn sich e baar beklaggt iiber d Schrift vo unserer Homepage. Mir mache do gar kaini Vorschrifte, d Daarstellig hängt ganz elai drvoo ab, was im Browser (Mozilla, Firefox, Safari, Konqueror, Opera, Camino, Galeon oder schlimschtefalls gar Internet Explorer) yygstellt isch. E jeede kaa sich s also sälber aabasse, wie-n-är mecht.

Dr Rolf Wichtermann wird bekanntlig nimm als JG-Obmaa zer Verfiegig stoo. Interymsmässig isch dr Stamm-Vizeobmaa Claude Pellmont yygsprunge-n-und grad mit ere offizielle Email-Adrässe uusgrischtet woorde. Als designierti Noofolgerin stoot an dr GV d Nadja Studer zer Waal. Mer wintsche-n-iire und dr Junge Garde e guete Start.

Die findet bekanntlig am Fryttig, 27. Mai, statt (aafangs Mai wäärde d Yylaadige verschiggt). Speetischtens denn, oder scho an dr Pfyffer- (27. April) bzw. Dambuure-Sitzig (22. April) kenne mer unseri 12 (!!) Neymitgliider offiziell begriesse.

Dr Nicola fiert uff dr Dambuure-Homepage immer no e-n-Umfroog, weele neye Marsch d Glygge-n-in däm Joor mecht in s Répertoire uffnää (ändgiltig entschaide dien denn d Pfyffer- und Dambuure-Chefs zämme mit de-n-Inschdruggdoore). Die, wo nooni hänn, solle doch bitte no go abstimme!

Saukalt isch es gsii und s het gschneyt wie scho lang nimm. Zem Gligg kaa me-n-im Zolli als in ains vo de Hyyser sich go uffweerme. Und drotz allem isch es wunderbar gsii. Die eerschte Fottene kaa me-n-im Archyyv aaluege.

Die Aggtion geschtert isch e volle-n-Erfolg gsii. Alli Hälfer hänn e wunderbaare Noomidaag erläbbt. Mer hänn e Huffe neyi Dybli und au alt bekannti Gsichter kenne begriesse. Es isch aifach dr Plausch gsii. Fottene vo däm Aaloss git s bim Guido Studer und nadyyrlig au in unserem Archyyv.

Unseri Wäärbeaggtion kunnt langsam in Faart. D Tram-Oldtimer-Fans hänn uff iirer Homepage scho e Lingg uff unseri Veraastaltig gsetzt, und dr Guido Studer kunnt ko Fottene mache.

Moorn goot dangg unserem Prässespezialischt Dominik au no e Prässemäldig an die lokaale Meedie-n-uuse. Hoffentlig brichtet denn au die aint oder anderi Zyttig driiber.

Mir sueche-n-allewyl no Pfyffer, Dambuure-n-und Vordräbler. Mer mache au disjoor wiider e Pfyfferkurs fir Erwaggseni.

Du kennsch uns villicht vo Frinde-n-und Verwandte, bisch gar scho am Zyschtig bi uns yygschtande-n-oder hesch unser Inseraat gsee. Denn kumm doch an s Yyschryybe am 2. Meerz im Dybli-Käller. Du kasch Di nadyyrlig zeerscht au uff dr Homepage vorinformiere.

D Zyt isch vyl z schnäll verflooge, d Fasnacht isch laider scho wiider verbyy. Gniesse kaa me numme no d Erinnerige, uffgfrischt im Fotti-Album.

Fir unseri Drämmli-Aggtion git s jetz e-n-aigeni Informations-Sytte, mit em gnaue Haltestelle-Faarblaan.

Es isch wiider emool herrligg gsii. D Schneeflogge hänn dr Himmel beläbbt, die maischte Kopfladäärnli hänn brennt und e greessere Stau het s au kaine ghaa. Soo, wie s sott syy. Nadyyrlig kaa me-n-au scho die eerschte Impressioone uff dr Homepage gniesse.

S het gschifft und gschneyt und isch saukalt gsii, und drotzdäm mecht me dä Aaloss nit misse, will ... am näggschte Daag isch Moorgestraich. Die eerschte Fottene und d Zeedel vom Stamm und dr Junge Garde sinn online.

Unseri Jungi Garde macht disjoor am Samschtig, 26. Hoornig, e bsunderi Aggtion zem Aawäärbe von neye Dybli. S faart e Sonderdrämmli dur d Innestadt, wo Kinder kenne Drummle-n-und Piccolo kenneleere. Im Käller liige Flyer uff, wo d Detail und dr Faarblaan druff sinn. Glyy git s au e Sondersytte do uff dr Homepage.

Dr ney Rädäbäng isch duss. Voll Fraid luegt me sofort, was iiber die aigeni Glygge stoot, und denn das: Statt unserem aggduelle Sujet isch das vo vor drey Joor abdruggt ("Dr letscht Furz"). Es syg e Kommunikationspanne zwische-n-em Comité und dr Druggerey bassiert. Und mer syyge au nit die ainzige, die Junge vor dr Seibi syyge-n-eebefalls bedroffe. Kurzum doo halt dr Yydraag, wie s hätt solle sy: