Home

Neys vom Daag

Mitdailige us em Joor 2018

aggdualisiert
23.02.2018
Und scho wiider isch s verbyy 23.02.2018  

No drey kalte, aber dodaal droggene Dääg isch d Fasnacht 2018 scho wiider verbyy. Es isch wunderscheen gsii.

Jetzt goot s an s Butzen und Uffruumme, me kaa noon e weeneli in de Fottene schwelge und sich uf e Bummel fraie, die Junge geen am 4., Stamm und Duubeschlaag am 11. Meerze. Und am glyyche Daag im ene Joor isch denn wiider Moorgestraich!

Moorgestraich 19.02.2018  

Es isch wunderscheen gsii. Nit zvyyl Stau und nit allze kalt, aber vyyl Blitzlichter und gaischtig under-, derfir schaufänschtermässig iiberbeliechteti Gschäft. Halt schaad...

Uf jeede Fall hämmer im Archiv jetz alli drey Dybli-Zeedel und laufend neyi Fottene.

E scheeni Fasnacht 18.02.2018  

Hit mit em Yypfyffen isch es ändlig richtog loos gange. Mer wintschen allne e wunderscheeni Fasnacht 2018!

Fasnachts-GV 17.02.2018  

Es isch e glungenen Oobe gsii, mit vyyl Informatione zer Ladäärne, drfir umso weeniger zem Damburmajor. Und drnoo isch gheerig yydrungge woorde...

Noon e weeneli Adminischdradyyvs 16.02.2018  

D Bummel-Aamäldig nit vergässe. Dr Doodle-Lingg isch per Email verschiggt woorde.

Die ney Götti-/Gotte-Lyschte isch verschiggt, lueget, wär fir wär ney zueschtändig isch.

Yystimmig 12.02.2018  

Mer feen aa mit dr Fasnachtsbrichterstattig. Im Archyyv git s efangs d Rädäbäng-Yydääg vo de Junge, vom Stamm und vom Duubeschlag, glyy kemme denn au die eerschte Fottene und d Zeedel.

Nit ganz esoo stimmig sind d Wätterussichte, aber die händ in de letschte Dääg jo jeede Daag wiider eppis anders gsait, drum nämme mer s, wie s kunnt.

No siibe Dääg - letschti Aarbete 11.02.2018  

Am Määntig und am Mittwuch isch dr Käller ab de siibeni offe fir alli, wo no eppis am Goschdym wänd baschtle, s Kopfladäärnli wänd richte ooder sunscht no eppis wänd hälfe.

Am Mittwuch isch denn ab den achti auch no die letscht freywillig Iebigsstund mit meh gmietlig als ieblig...

Väärslibrinzle 23.01.2018  

Fir scheeni Ladäärneväärsli muess me au scheen brinzle. S Event-Team laadet yy uf e Frytig, 9. Hoornig, ab de siibeni im Käller. Wär nit ka koo, schiggt syyni Väärsli an Obmaa.

Goschdym-Baschtle 23.01.2018  

Mer sind fascht fertig. Es git no ai Termyyn am Donnschtig, 25. Jänner, ab de siibeni. Wär bis denne nooni fertig isch, het die letschte Gläägehaite am Mittwuch und Samschtig vor dr Fasnacht.

Fasnacht in Kaiseraugscht 23.01.2018  

Am Samschtig, 10. Hoornig, git s e weeneli en anderi Maarschiebig: Mer machen alli - Jungi Garde, Stamm und Duubeschlag – mit an d Fasnacht in Kaiseraugscht. Dräffpunggt isch am 13:00h in dr Schalterhalle vom Baanhoof SBB.

Doo sind alli Detailaagoobe.

Last-Minute-Fasnacht wird 10 Joor 21.01.2018  

Zem 10. Mool git s die beliebti Last-Minute-Fasnacht vo dr Junge Garde. Fir e gringen Unkoschtebyydraag biete mer alle Maitli und Buebe d Meegligkait, vom Moorgestraich bis zem Bummel bi unsere Junge Fasnachtsluft go schnubbere.

Aamäldeschluss isch am 11. Hoornig!

Abschluss vom Offizielle 14.01.2018  

Ganz häärzlig Gratulatioon an d Marina Suter, wo dr Pfyffer-Finaal uf em vierte Blatz – numme ganz gnabb vor em Podäscht – abgschlosse het. Näggscht Joo wiider!

Und grad noonemool 13.01.2018  

Au im SoloDuo ziend d Marina und dr Basil im SoloDuo in Finaal! Sensationell!

Jetz simmer gspannen uf hit zoobe, am halber siibeni goot s loos im Groosse Saal vom Volggshuus.

(fascht) in Finaal! 12.01.2018  

Geschtert zoobe het d Marina souverän s Tigget fir dr Finaal vo de Ainzelpfyffer gleest. Und Dyblipfyffer-Grubbe wär um ai Hoor au no fasch in Finaal, si händ dr undanggbaar, aber sensationäll viert Blatz erraicht. Häärzligi Gratulatioon an alli!

Offizielli Dybli 11.01.2018  

Hit staartet rund um s Volggshuus s Offizielle Bryysdrummlen und -pfyffe. Au disjoor sind diväärsi Dybli derbyy und fraie sich uf e reegi Understitzig us em Saal.

   Do, 11.01., 20:50 (Kartäusersaal)  Corinne (Pfyffer ainzel, Staartnummere 512)
Do, 11.01., 21:38 (Wettstaisaal)  Jlena (Pfyffer ainzel, Staartnummere 529)
Do, 11.01., 21:46 (Wettstaisaal)  Marina (Pfyffer ainzel, Staartnummere 533)
Do, 11.01., 22:57 (Wettstaisaal)  Dyblifyffer (Pfyffer Grubbe, Staartnummere 757)
Fr, 12.01., 20:15 (Groosse Saal)  Marina & Basil (SoloDuo, Staartnummere 951)
Fr, 12.01., 20:39 (Unionssaal)  Corinne & Jüffi (SoloDuo, Staartnummere 964)
Fr, 12.01., 20:47 (Groosse Saal)  Jlena & Samuel (SoloDuo, Staartnummere 967)
Fr, 12.01., 23:05 (Groosse Saal)  Dyblipfyffer & -dambuure (Gmischti Grubbe, Staartnummere 858)
Mr wintschen alle vyyl Erfolg!