Home

Neys vom Daag

Mitdailige us em Joor 2002

aggdualisiert
31.12.2002
D Schwelger sinn online! 17.10.2002  

Vor ere halb Stund haa-n-y d Noochricht bikoo: D Schwelger hänn jetz au e-n-aigeni Homepage. Jetz isch d Glygge vollständig im Netz.

Intressant wird wool vor allem s Geschtebuech ...

Highlights vo dr Sujet-GV 17.10.2002  

Am letschte Mittwuch isch dr Glygge mit ere Multimediashow s Sujet 2003 voorgstellt woorde. D Uusaag isch fir e baar villicht noo-n-e bitz in de Wolgge bliibe, aber doo, in dr Effentligkait, kenne mer laider nooni mee erglääre ...

Als Zugscheffin hämmer d Andrea gwäält (Gratulation), d Waal vom Dambuurmajor isch uff Ändi Moonet verschoobe woorde, fir ass d Kandidaate nomool in sich kenne goo.

Und denn isch no iiber d Stiftsgass verhandlet woorde:

Stiftsgass-Niuus 17.10.2002  

S Projäggt isch uff em Wääg. Mit grosser Meerhait het d Glygge dr Startschuss gää. Jetz lyyt s numme no an dr Fyyrbollizei (halt nit grad die allerschnällscht) und an dr Uushandlig vo ginschtige Verdraagskonditione.

Dr Urs wird dr Umbau und d Yyrichtig koordiniere. D Nicole (Griess uff London) het sich als Källerwirtin zer Verfiegig gstellt. Dangge fir dr Yysatz. Jetz kaa jo aigedlig nyt me schieff goo.

Fotti vo dr Stiftsgass 30.09.2002  

Verdanggenderwyys het dr Urs au syyni Fottene zer Verfiegig gstellt. Wil är si grad allne per E-Mail gschiggt het, haa-n-y mer dr Uffwand gspaart, die au no in d Homepage yyzbaue ...

E neye Dybli-Käller? 29.09.2002  

Dr Urs het flyssig dr Basler-Stab studiert und isch iiber e-n-intressants Inseraat gstolperet. Was druss woorde-n-isch, gseet me-n-in dr Rubirgg Glyggekäller.

Wenn alles glappt, drnoo kenne mer am Källerabstiig villicht scho wiider mitmache ...

Goschdyym - Massnää 15.09.2002  

Mer hänn e neyi(-alti) Schnyydere, d Erika Schwarz. Drum isch am Mittwuch, 18. Septämber, fir alli Stämmler ab de-n-achti zoobe Massnää. S findet parallel zu de-n-Iebigsstunde im Leonhardsschuelhuus statt.

Wär nit koo kaa, duet mit dr Frau Schwarz (Deliphoon 061 361 71 85) sälber e Termyyn abmache.

E neyi Stammbaiz 15.09.2002  

Scho-n-e baar Baize hämmer uusbrobiert. Vor de Summerfeerie s Äxtrablatt, dr Bruuni Mutz und d Haaseburg. Letschte Mittwuch simmer in dr Börse gsii und näggscht Mool gemmer in Balthasar (Ex Stainemiili) go luege.

Speetischtens an dr Sujet-GV (16. Oggdoober) diemmer denn wääle, wo mir uns als am Mittwuch dräffe.

D Dybli in dr Champions League 15.09.2002  

S Event-Team het dänggt, mir Dybli vergraabe-n-ys vor luter Entdyschig, ass mer kai Billijee meh hänn bikoo, nit iirgednaime dehaim elai vor der Kischte, sondern mir luege die Mätsch in ere Baiz!

Details findsch im aggduelle Kaländer.

Achtung! An de baide Mittwuchsspiil vor und noo de Heerbschtfeerie sinn d Iebigsstunde-n-äxtra verschoobe woorde.

Sujet-Bummel 27.08.2002  

Am 1. Septämber dräffe sich d Aggdyvmitgliider vom Stamm am zääni uff dr Pfalz. Jeede nimmt Gueti Luune, frischi Idee, Farbschtift und Baschtelzygs (z.B. Schäär, Karton, Lyym) mit.

Im spiilerische Raame mache mer e Brainstorming, wo s Sujetteam denn druss e Sujet duet bestimme. S ganzi findet in dr Stadt und hauptsächlig im ene Glygge-Käller statt. Fir d Verpfläägig isch also gsoorgt. Fertig isch s, wenn s fertig isch (mer schetze so eppe gääge die vieri, wär friener goo muess oder no lenger will hogge blyybe, isch drotzdäm härzlig willkomme).

D Dybli griesse Schottland 27.08.2002  

Am Donnschtig, em 5. Septämber, isch in dr Stadt e groosses Fescht: s Swiss Pipeband Meeting. Wie scho im 1993 (e baar meege sich no erinnere) begriesst Basel unseri schottische Gescht mit eme Monschtermarsch vom Minschterblatz dur die Frey Strooss durabb (Répertoire: die Alte, Arabi, Feschtspiil und Ryslaifer) und em Whisky Soda uff em Märtplatz.

Mir dräffe-n-uns vor em Basler Dybli-Briefkaschte uff em Minschterblatz, Verschteerggig vo de Schwelger und dr Alti Garde isch härzlig willkomme.