Jooresabschluss |
23.12.2010 |
Geschtert hänn d Dybli s Joor 2010 mit eme super feyne Wiehnachtsässe in dr Schliessi (in dr Lange-n-Eerle) abgschlosse. Mer wintsche-n-alle scheeni Wiehnacht und e guete Rutsch in s neye Joor!
|
Blaggedde 2011 |
23.12.2010 |
Ab sofort kaa me wiider Blaggedde bstelle, ney isch unsere Maischterverkaifer Tom zueständig. D Blaggeddenuusgoob isch am Samschtig, 8. Jänner, ab de zääni im Käller. D Bryyse sinn schynts glyych wie letscht Joor (Kupfer 8.–, Silber 15.–, Gold 45.–, Bijou 100.–). Und nit vergässe: Fir jeedi verkaufti Blaggedde goot e Dail diräggt in d Glyggekasse, mer fiere drumm wiider unseri bewäärti Ranglyschte ...
|
Dybli Chlause isch abgsait |
06.12.2010 |
Ojee, d Aula im Schuelhuus wird kuurzfrischtig fir anderi Zwägg bruucht. Drum fallt d Dybli-Chlause disjoor laider uus und mer hänn am 8.12. normaali Iebigsstung in de Schuelzimmer (ooni Drummle).
|
Sujet-Bräsentation |
17.11.2010 |
Am Mittwuch, 24. Novämber, wird im Stamm s Sujet 2011 bräsentiert. D Iebigsstunde wäärde-n-e weeneli kiirzer goo und me drifft sich denn aam 21:15h im Dybli-Käller.
|
Källerabstiig |
16.11.2010 |
Am näggschte Samschtig isch s wiider so wyt: Källerabstiig in dr Groossbasler Innestadt. Und nadyyrlig sich dr Dybli-Käller drbyy. S git die beriehmt Dybli-Ryyspfanne-n-und diväärsi glaini Läggereye. Bitte machet bi Eyre Frinde, Verwandte-n-und Bekannte Wärbig fir unsere Käller, z.B. mit em Flyer.
Fir alli Dybli git s zer Yystimmig vom säggsi bis am siibeni e Häppy-Auer, wo me sich voorab drifft, zem drnoo uff d Tour z goo (lueg au uff dr Laageblaan und uff d Menü-Lyschte).
|
Neyi Homepage vo dr Junge Garde |
15.10.2010 |
Noo langer Zyt im Winterschloof het die Jung Gaarde ändlig wiider e neyi Homepage. Dr Beni het sich als neye Webmaster etabliert und grad e super Sach kreiert. Gang go luege!
|
Drummeli-Termyyn |
15.10.2010 |
S Drummeli-Team het die neye Termyyn mit Iebigsstunde, Baschtle und dr Uffdritts-Bräsentatioon bekannt gää, me findet alli im Kaländer.
|
Team-Yydailige |
16.09.2010 |
Ändlig hämmer die neye Team-Lyschte uffgschaltet. S het no zwai drey Daame-n-und Heerre, wo sich dringend sotte-n-yyschryybe, bitte dien Eych bim Obmaa mälde.
|
Quiz-Uffleesig |
01.09.2010 |
Dr Yysändeschluss fir s Summer-Quiz isch verbyy, d Uffleesig und d Gwinner wäärde-n-in dr näggschte Dybli-Zyttig bräsentiert. S Quiz blybt uns aber erhalte-n-und me kaa s immer no spiile.
|
Dybli-Zyttig und Summer-Quiz |
16.07.2010 |
Ändlig isch die ney Dybli Zyttig uff d Boscht (und hoffentlig glyy in Eyre Briefkäschte). S het wiider e Summer-Quiz dinne, d.h. aigedlig nit diräggt in dr Zyttig, aber doo uff dr Homepage. Brobier s uus! |
Summerfeerie |
23.06.2010 |
Hit isch die letscht Stund vor de Summerfeerie. Will s Wätter ändlig au langsam gmeergt het, ass es richtig Summer goot, drifft me sich statt im Schuelhuus am achti bim Yygang vom City Beach. Mer wintsche-n-alle, wo me deert nimm gseet, scheen Feerie!
|
Offiziells Bryysdrummle-n-und -pfyffe |
15.06.2010 |
Aha, jetz sich s Offizielle also nit am 17.-19. sondern ganz offiziell scho am 3.-5. Hoornig 2011. Bitte alli d Yydrääg im Kaländer korrigiere.
|
Glygge-Grimpeli-Resuldaat |
15.06.2010 |
Wow, mr sinn wiider emool erfolgryycher gsii als au scho. Souverään hämmer s mit aim Syyg und zwai Unentschiide-n-in d Zwischerundi gschafft, hänn uns aber deert denn eervoll verabschiidet. Me mungglet, ass sich dr Dybli-Goalie am Voroobe am änglische Vorbild orientiert het, was mit zue däm Resuldaat gfiert haig.
|
Glygge-Grimpeli 2010 |
09.06.2010 |
Parallel zer groosse FIFA-WM findet am Wuchenänd au die "glai Glygge-WM" statt. Mir mache disjoor wääge divvärse-n-Absänze vo männlige Stammspiiler numme mit dr gmischte Mannschaft mit. Unsere-n-eerschte Match isch am Sunntig, 09:20h, uff em Fäld 3. Mer dräffe-n-uns zem Yylaufe-n-ab de viertel vor achti uff em Blatz. Hopp Dybli!!!
|
Dybli organisiere s Offizielle! |
09.06.2010 |
Noodäm d Glygge s vorab scho uss dr BaZ het erfaare: Syt dr GV isch s jetz hochoffiziell, mir mache mit im OK vom Offizielle Bryysdrummle-n-und -pfyffe. Im Joor 2011 simmer d Mithälfer und im 2012 iibernämme mer s Rueder ganz.
Das haisst, ass sich die ganz Glygge schoo-n-emoll dr 17.-19.3.-5. Hoornig 2011 im Kaländer duet root aastryyche.
|
Neyi Mitgliider |
09.06.2010 |
Mr hänn an dr GV divvärsi Mitgliidermutatioone ghaa (dr aggduell Standd kaa me wie immer im Mitgliiderberyych nooluege). S frait is, ass mer ney folgeendi Daame (neyi Heere het s bis jetz kaini gää) im Stamm deerfe begriesse: Bi de Dambuure d Sandy (wo vo dr Junge Garde kunnt) und d Anne, bi de Pfyffer d Christina und d Giuseppina. Häärzlig Willkomme!
|
Mittwuchs-Menü |
18.05.2010 |
Moorn zoobe hämmer wiider emool internationaale Bsuech im Käller: "el Mariachi & el Presidente" mache-n-e Fiesta Mexicana und bräsentiere als Menü "Alambres Taccos". Vorreservatioone sinn erbätte bis am Mittwuch, 16:30h, an unseri baide mexikaanische Botschafter Dominik und Claude.
|
Fasnachts-Drämmli |
04.03.2010 |
Am Samschtig isch s scho wiider so wyt: S Basler Dybli Fasnachts-Drämli isch uff dr Route. Alli Hälfer dräffe sich am zwelfi bim Depot Wiiseblatz. D Faart goot denn vom ains bis am fimfi. Und was zoobe lauft, mache mer denn wiider spontaan ab.
|
Schyy-Weekend |
04.03.2010 |
Noo langer Pause git s am 27./28. Meerz wiider e Dybli-Schyy-Weekend. Mer geen uff Grindelwald. Wär sich no aaschliesse mecht, mäldet s diräggt bim Simi.
|
Und scho isch s wiider verbyy |
25.02.2010 |
D Fasnacht 2010 isch laider scho wiider verbyy. Mr hänn e wunderscheeni Zyt zämme ghaa. Nääbe "dr Brugg", em "Dynamit" und em "Läppli" wird wool au s Wätter in Erinnerig blyybe: S isch waarm gsii wie scho lang nimm und au dr ganz kuurz Rääge-/Haagel-Guss vom Mittwuch zoobe git s hoffentlig nit all Joor.
Im Momänt sammle mer alli verfiegbaare Fottene und Filmli (wär au no Materiaal kaa byystyyre, mäldet sich bim Webmaster), dr Zwischestand kaa me-n-im Fotti-Album aaluege.
Zem Uusblämbberle git s am Fryttig d Uusdringgede vom Stamm (ab de-n-achti im Käller), d Wuche druff am Samschtig s Fasnachts-Drämmli und am Sunntig dr Bummel vo dr Junge Garde und denn noonemool e Wuche druff dr Bummel vom Stamm. Und denn foot jo scho glyy wiider die ney Saison mit de-n-Ibeigsstunde-n-aa, damit mr d Zyt bis zer näggschte Fasnacht am 14. Meerz 2011 sinnvoll iiberbrugge ...
|
E scheeni Fasnacht |
21.02.2010 |
D Basler Dybli wintsche-n-alle e wunderscheeni Fasnacht 2010. Fir alli, wo nit kenne z Basel syy, hämmer wie immer unseri Zeedel vom Stamm und dr Junge Garde im Archyyv. Und nadyyrlig git s dr agduell Fotti-Service mit de neyschte Fottene. Gang go luege ...
|
Last-Minute-Fasnacht |
05.02.2010 |
S hänn underdesse scho nyyn jungi Maitli und Buebe-n-e Last-Minute-Fasnacht buecht. S Jungarde-Team losst uusrichte, ass me sich bis uff wytters immer no mälde kaa, bis dr letscht Stoff gnaiit und die letscht Laarve verdailt isch. Dr Schnäller isch dr Gschwinder ...
|
Bravo Marina |
30.01.2010 |
D Marina Suter vo unserer Junge Garde het s bim Offizielle scho wiider in Final vo de junge Pfyffer gschafft und isch deert uff em hervoorragende dritte Blatz glandet. Häärzligi Gratulation!
|
Sujet-Termyyn |
28.01.2010 |
Jetz sinn die letschte Baschteldääg feschtgleggt und d Termyyn fir s Laarvenaabasse steen au fescht. Lueg im Kaländer und kumm meegligscht vyyl ko hälfe.
|
Blaggedde-Ranglyschte |
22.01.2010 |
Jetz git s wiider die spannend Ranglyschte mit de beschte Blaggedde-Verkaifer vom Stamm. Gang go luege ung gib alles, ass au Du under d Top-Ten kunnsch.
|
Bueche-Pagge-Vorwärts Marsch! |
16.01.2010 |
S isch wiider "Last-Minute-Fasnachts-Zyt", die letscht Gläägehait fir Maitli und Buebe, im 2010 bi unserer Junge Garde Fasnacht zmache. Aamäldeschluss isch am 5. Hoornig 2010.
Und wär s verbasst, kaa jo immer no in unser Fasnachts-Drämmli koo, wo disjoor am 6. Meerz dur d Stadt kuurvt.
|
Fasnachtsprogramm |
13.01.2010 |
Ab sofort kaa dr Stamm s detailliert Fasnachtsprogramm 2010 uff dr Homepage aaluge. E glaini Iiberraschig: Mer lauffe jeewyls friener in Cortège, d Besammlig isch an baide Dääg drum scho am ains zmidaag.
|
Fasnachts-Technischs |
11.01.2010 |
S goot jetz no gnabb säggs Wuche bis zem Moorgestraich, d Vorberaitige fir s Sujet sinn am laufe. Es git fimf Baschteltermyyn fir unseri Goschdym und Reggwisyt (lueg im Kaländer), e jeede sott mindeschtens aimol ko mithälfe. Detail – au betr. Laarvenaabasse – wird s Sujet-Team am Mittwuch bekannt gää.
|
Marschiebige |
11.01.2010 |
Nadyyrlig gheert au s Marschiere zue de Fasnachts-Vorberaitige. Bekannt isch im Momänt dr Termyyn vo dr Groosse Marschiebig, zämme mit dr Junge Garde, de Schwelger und dr Alte Garde, wo am Sunntig, 31. Jänner, am zääni im Eeglisee aafoot. Dr Stamm goot druffaabe go ässe und macht denn Zmidaag noo-n-elai e zwaiti Rundi. Wytteri Marschiebigstermyyn wird dr Vorstand no bikannt gää.
Update! Jetz sinn alli Daate bekannt, mer geen jee am Mittwuch am 27. Jänner und 3. Hoornig (jee 20:10h, Eeglisee) und d BSFIDI (11.2. ab 17:00h) zellt au!
|