Basler Dybli Jungi Garde und
Dyblinäscht – Fasnacht 2010
Binggis-Beach – kai Zuedritt iiber 18
Summerfeerie, soo goot s de maischte,
kaa me sich am Strand nimm laischte:
Kai Stutz und s bringt z vyyl Cee-Oo-Zwai,
hyyr blyybt me halt emool dehai.
Drfir git s jo dr "City Beach"
(Wie sait me däm uff Basel-Dytsch?
ächt "Stadt-Strand" ooder "Strand in dr Stadt"?
s deent baides scho nit ganz so glatt,
drumm wämmer doo halt aggzeptiere
d Anglizisme z toleriere.)
Bi dr Mäss, hooch uff em Dach,
deert git s kai Klaage wääge Krach,
kaasch spoortlig uff e Beachball haue
und gnussvoll e scheeni Sandburg baue,
kaasch im Beedli ummeplantsche,
s Mammi kaa sich e Dringg lo pantsche,
kaasch Di noo-n-em Schwimmingpuule
im Palmeschatte-n-ummesuule,
kaasch gmietlig imme Sässel tschille,
blybsch z lang, denn wiirtsch emänd no knille,
kaasch luschtvoll e Stängel glimme losse,
hesch kai Stängel, blyyb unverdrosse,
kaasch Di doo an jeedem Egge
mit Sponsor-Mischterli yydegge.
Kuurzum, e richtig Baredyys,
doch gheert me-n-au Gritigg, ganz lyys:
Fir uns Binggis haig s schynts Mängel,
grad wäg de vyyle glimmige Stängel.
Im Sponsor isch das nimm ganz ghyyr,
sy Imitsch isch iim lieb und dyyr,
d Gritygg wird iim doo umbiqueem
und als wie lenger zem Probleem.
Dr Sponsor macht bim Wirt drumm Drugg,
dä ruederet au ghoorsamscht zrugg,
het schnäll die wyssi Faane gschwänggt,
e Kameel, wär Beeses dänggt.
Ab sofort haisst s brudaal: "No Kids!"
drumm aadie, "Beschts, wo jee hets gits."
Aber Hallo? Wo simmer denn doo?
Wär isch uff soo-n-e Bleedsinn koo?
S zellt nimm dr gsundi Menscheverstand,
d Sponsoore hänn s Zepter fescht in dr Hand,
bestimme-n-elai, wär deerf was,
wie perväärs isch denn das?
Jetz hämmer doch gmaint, syt dr Euro Null-Acht
syyge d Beheerde-n-ändlig verwacht
und wuurde soonigem halbsyyde-driebe
Sponsoore-Dryybe dr Riigel schiebe.
Doch unsri Stadt, me kaa s eraane,
wird regiert vo lutter Banaane,
eb gääl, grien, root, blau, ainerlai,
am beschte schiggt me-n-alli hai.
Mir mache jetz e "Beach for Binggis",
bisch iiber achtzää griegsch grad Ginggis
und fliegsch diräggt vo hinde fiire
im hooche Booge zrugg vor d Diire.
Und bisch emänd nit nur erwaggse,
mechtsch gar e Sponsor-Väärsli gaggse,
denn saage mir ganz unverfroore:
Du hesch eerscht rächt nyt doo verloore!
Bi uns soll s kain au nuur brobiere
uns us Profitgyyr z diskriminiere,
d Reegle mache mir elai,
und basst s Dr nit, goosch gscheyter hai!
Am Zyschtig goot me-n-an Ladäärne-Beach
uff em Minschterblatz und au in s Waage-n-
und Reggwysitte-Beedli bi dr Kasäärne
|
