Neys vom Daag

S Comité het e wunderscheeni Blaggedde 2018 vorgstellt, gschtaltet vo dr Clelia Zoller: Gang go luege!. D Fasnacht 2018 lauft under em Motto "D Boscht goot ab".

D Blaggeddenuusgoob isch den am 6. Jänner im Dybli-Käller. Bitte diend per Email vorbstelle, dr Stamm an blaggedde@basler-dybli.ch und die Junge an jg-blaggedde@basler-dybli.ch.

Mit em glungene Wiehnachtsässe geschtert zoobe isch s Glyggejoor 2017 z Änd gange. Mer wintschen alle besinnligi Fyyrdääg und e guete Rutsch in s neye Joor.

Am Wuchenänd isch wiider Glygge-Grimpeli uf dr Schitzematte. Die Junge händ iiri Samschtigs-Grubbe-Spiil am 12:00, 13:00, 13:40 und 14:40. Und dr gmischti Stamm am 12:00, 13:00, 15:00, 16:00 und 16:40. Wär nit sälber schuttet, kunnt ko fääne.

Mer wintsche baide Mannschafte vyyl Erfolg und wenn si – hoffedlig – wyter kemme, denn e wyteren Yysatz am Sunntig!

Fir das wytumme beliebte Thema git s jetz im Mitgliiderberyych wiider e Syte mit allen Aagoobe und em Lingg zem Yysatzblaan.

Doo e baar wichtigi Ergääbnis vo dr GV:

- D Vanessa isch die ney Vizeobfrau, dr Räscht vom Vorstand isch unveränderet.

- Dr Inschdruggdoorebyydrag sich von 90.– uf 50.– reduziert woorde.

- Mer bikemmen e Standarte (joo, dä Punggt isch jetz noo gfyylte 25 Joor syt em eerschtmooligen Aadrag äändlig aagnoo woorde).

- D Senioore, wo s syt dr Fusion vo de Schwlger mit der Alte Garde nimmi git, sind us unsere Statute gstriche.

Am Frytig isch GV (Diireffnig isch am siibeni, aafoo duet s offiziell am achti). D Yylaadig und Byylaage wie au d Protokoll vo de letschte GVs findsch im Mitgliiderberyych.

Die ney Homepage vom Duubeschlag isch online. Lueg uf duubeschlag.ch.

Dambuurechef isch ney dr Claude, är wäggslet s Amt mit em neye Stellverdrätter Michi.

Pfyffercheffin blybt d Patricia, neyi Stellverdrätterin isch d Selina (d Vanessa het anderwyttigi Ambitionne, doodrzue erfaare mer im Juni mee).

Mer händ e neyi Pfyfferinschdruggdere: D Maya Burtscher – Häärzlig Willkumme!

Es git kai neye Maarsch, mer nutze s Joor, zem s aggduell Répertoire z schlyffe.

Am Mittwuch noo den Ooschtere staarte mer in die ney Saison. Am achti zoobe sind d Pfyffer- und Dambuuresitzigen im Käller. D Iebigsstunde feen denn e Wuche speeter aa.

D Aggtioon Lastminute Fasnacht isch au Disjoor erfolgryych gsii, grad esoo, ass fasnacht.ch driiber brichtet het.

Am 2. Sunntig isch die Jung Garden underwäggs. Y waiss nooni gnau, wenn si die Frey Strooss druab kemme, alli Fäns sind drum um die säggsi baraat. Update: Si kemme ca. am siibeni!

Dr Stamm isch denn am 3. Sunntig draa. Besammlig sich scho am viertel vor nyyni. Achtung! Sälle Sunntig isch au grad no d Umstellig uf Summerzyt! Ca. am siibeni mache denn au mir d Paraaden in d Stadt.

D Fasnacht isch verbyy. Mer händ allergattig Wätter vo Duurrääge bis Sunneschyyn erläbbt, aber e rächt Dybli kimmeret das nit. Alles rund um d Fasnacht und e Huffe Fottene findet men im Archyyv.

S wätter het gnabb ghalten und mir hän deerffe d Regierig und iiri Gescht am Yypfyffe begriesse. Doorum isch denn au alles e bitz andersch gsii als sunscht. Y saag do numme Megaphon...

Aber s het alle sglabbt und au unseri Gescht händ e Faschtewaiie und e Gleesli Wysse bikoo.

Soodeli, Goschdym, Laarve, Ladäärnli und Inschtrumänt sind baraat, mer steen kuurz vor de drey scheenschte Dääg. Die aggduelle Wätterprognoose diemmer ignoriere, es isch jo allewyl no besser uusekoo als wie als prognoschtiziert (Duume drugge!).

Wie all Joor wämmer au die Fasnacht im Archyyv mitverfolge, d Rädäbäng-Yydrääg sind scho uffgschalten und am Määntig git s denn au d Zeedel und e Huffe Fottene.

Am Mittwuch vor dr Fasnacht mache mer am halber achti dr Käller uf fir alli, wo no iirgend eppis wänd richte, aabasse, laggiere etc. ooder au numme noonemool gmietlig wänd zämmeheggle.

Das Wuchenänd simmer in s Drummeli gstaartet. Unsere Papageno, e Stigg komponiert vo unsere baiden Inschdruggdr Florain Stähli und Jonas Schöni, iiberzygt sowool musikaalisch wie au optisch, dangg unsere scheene faarbige Goschdym. Lueg sälber!