Au im 2007 simmer mit zwai Mannschafte-n-am Glygge-Grimpeli aadrätte. D Voorsetz vo ALBUM[2006-14|letscht Joor] hämmer nadyyrlig umgsetzt: Die gmischti Mannschaft het ändlig e bitz e zivyylere Namme bikoo und isch als Friidens-Dybli uff s Fäld (d Männer-Mannschaft in dr Schutter-Kategoryy het wiider Samba Dybli ghaisse). Und vor allem unseri neye schwaarze Lyybli (ändlig het s wiider fir jeedem Dailnäämer e perseenlig Exemblaar glängt) hänn uns stolz gmacht.
D Resuldaat vom Samschtig sinn denn au super gsii: Drotzdäm ass mer aimool grad mit baide Mannschafte glyychzyttig im Yysatz sinn gstande-n-und mer mängmool numme weenigi Minute hänn ghaa, fir zem näggschte Matsch uff em andere Fäld z renne, hänn d Samba Dybli ains vo drey Schpiil gar gwunne. Und d Friidens-Dybli hänn souverään mit drey glaare Siig dr eerschti Grubbeblatz beleggt.
In dr Zwischerundi am Sunntig isch denn laider au fir d Friidens-Dybli kuurz vor em Yyzuug in Halbfinaal fertig gsii. Im eerschte Matsch hämmer drotz 2:0-Fierig dr Uusglyych miesse-n-aggzeptiere-n-und im zwaite Schpiil het dr Ball drotz uusichtsryychschte Meegligkaite-n-aifach nit in s geegnerische Gool yyne welle. D Pinggt fir zwai Unentschiide hänn denn halt nit glängt. Jänu, brobiere mer s näggscht Joor wiider ...
|