Vo vergangene Zyte

Me ka mi ässe

Syt dr Schöpfig – hesch vergässe ?
hett dr Mensch in Sache Aesse
scho fascht alles zämmegfrässe
Gitts ächtsch drum jetz en Art e Brugg
punggto Food in d Urzytt zrugg?
wird me zum Urmensch, s wär fatal
villicht no gar zum Kannibal ?
mit primitivem Tämpramänt
das basst jo ganz guet emänd
zue mene gwysse Bresidänt
oder besser grad zue allne drei
vo Amerika, Nordkorea, und dr Türkei
die sinn jo karaggderlig nit grad vyyl wärt
und gaischtig zymmlig unterernäärt...
Aber do druff simmer jetz nit versässe:
es goot allgemein drum, was d Lyt esoo ässe
s'gitt Normali, wo alles yynebiige
und au kulinarischi Diefflieger syyge
Askete wo vo Luft und Liebi lääbe
Verschläggdi, wo immer am glyyche glääbe
Versnobbti, wo im Michelin-Himmel schwääbe
Vegetarier, die flaischloose Indianer
und Veganer, die pflanzliche Insulaner
denn Astronaute wo sich nit ums Ässe schääre
will sy sich jo numme vo Pillen ernääre
Hättsch vo allne dääne je e Gascht
also ehrlig gsait, denn griegtsch en Ascht...!
drum isch's doch im Grund gnoo wirgglig guet
was d Coop Schwyz fyr uns alli duet:
Sy hänn kulinarisch speziell im Visier
d'Verbindig vom Mensch zum ganz glaine Dier
und bringe fyr d'Gniesser vo dr neyen Art
als Gaumefraid ganz zart und apart
alles was am Boden am krabblen isch
meegligscht frisch uff unsre Disch
Was kreucht und fleucht in Wald und Fäld
Isch e gastronomisch bsundri Wält
qualitätsmässig spricht hi au nyt drgeege
ebbis z ässe, au wenn sich's no duet beweege
oder kenned er ebbis, wo sich frischer verkauft
als e Naarig, wo no ne bitzeli lauft
Und scho sinn alli in the mood
seggle wie gsteert nach däm «Novel Food»
leen sich vo jedem Käfer erbrässe
wenn er sy so aaluegt mit Inttässe
und ene lieb sait: «Du, me ka mi ässe !!»
No stelle d Schwyzer – gar nit dumm
megamässig uff Insäggden um
Vom gweenligen Aesse isch me clean
Auf geht's – zum Kakerlaken-Protein !
Und dangg de vyyle Krabbelviecher
isch jo d'Aessens-Usswaal au vyyl ryycher
Aber s goot nit wie bis jetz nur um Schnäggli
nai fyr die exquisity Gschmäggli
bruuchts Grille-Börger und Mählwürmer-Bäggli
und wenn im-ene Schrangg e Wanze hoggt
holt kaine mee d Putzfrau – und niemerts isch gschoggt
nai, d Mamme rieft wie halber besässe
jee, do inne do hetts ebbis z ässe
und findsch im Kuchichäschtli Schaabe
no duesch di jetz an dääne laabe
nyt isch me gruusig oder haarig
im Gegedail, das isch jetz alles Naarig
D Vogelwält wird suur – dr Mensch dä macht dr Netti
zwängt sich z'mitts in ihri Nahrigsketti
frisst Insäggde scho ganz gyttig
und macht de Veegel d'Wirmer strittig
Bis jetze griege d' Fisch dehai no d'Fliege
gly kasch sälber nimme gnueg dervoo griege...
Und als bsundere Hit deggd ys Coop unser Dischli
mit Blattlüüs, Flööh und Silberfischli
Wirsch aber ab däänen nit sofort verschregge
denn si leen sich im Gmiess ganz guet verstegge
E faarbige Käfer ka sich erwiise
als dekorativi Friandiise
Scho sitt Ewigkaite isst me Schnägge
was spricht denn jetz gege Flöö und Zägge
Und in dr Baiz uff dr Menukarte
dien no anderi Delikatässe warte
S gitt e Schwoobekäfer Cordon Bleu
oder e Heugumper-Pot-au-Feu
Fyr dr ganz muetig Gniesser e Mega Gricht
isch e Biene – wo grad sticht !
Aber wieso muesch denn in e Laade laufe
zum alli die Krabbelviecher z kaufe ?
Dehaim im Garte und im Käller
findsch all die Insäggde doch vyyl schnäller
und bald isch doch die allerneyschti Moode
E Rägewurm, ganz frisch uss em Boode
Obwolls scho lang e Sprichwort gitt
«Was y nit kenn, das friss y nit»
Isch schynts bym Coop e Huffe los
Und d Nochfroog nach Raupe zimmlig gross
Gitts nämmlig naimen ebbis Neyis
no paggds dr Mensch mit luttem Geuss
Novel Food – das muess me haa
sunsch nimmt no dää vo nääbedraa
und ebbis Neyis isch immer schigg
Verdruggsch sone Käfer, griegsch grad e Kick
und dänggsch ganz stolz fyr di drnääbe
so kenntsch au im Dschungelcämp yberlääbe
D Migros sait zwoor – mir sinn nit derby
aber im Stille schetzt me das anderscht yy
denn in dr Zyttig suecht me – und das isch s Korräggde
im Versteggde e Productmanager fyr Insäggde...

S Fazit vo dääre neye Naarig:
S' Ganzi isch kai Offebaarig
Me ka si ässe – aber au vergässe
Denn isch me allzue stargg versässe
Immer mee so Viecher z'ässe
no waggsd mit der Zyt trot allem Gäld
langsam nyt mee uff dääre Wält
oder s hätte die Dierli bletzlig Inträsse
und das wär ho nit emoll vermässe
sich z weere und dr Spiess umzkeere
statt gfrässe z wärde – uns Mensche frässe...!!

Und wenn de gnueg soo Maade gfrässe hesch,
no goosch an d'Usstellig vo de Lampe bym Münster
und vo de Requisite by der Kasärne
(Mäntig zoobe bis Mittwuch demorge)