Basler Dybli Stamm – Fasnacht 2017
Hau ab, du Sagg!
Hommage an d Trumps, Erdogans,
Assads, Jong-uns, Le Pens, Petrys, Wilders,
Farages, Grillos, Straches, Blochers und alli
andere Narzischte vo dääre Wält
Lägg, bin yych e tolle Siech,
bii dr Scheenscht, dr Gscheytscht, dr Grescht,
leend mii an s Rueder und ych miech
fir mii (und eych) nur s Allerbescht.
Ych bii dää, wo alles kaa,
waiss als ainzig alles rächt,
e reegelrächte Supermaa,
die andere sind alli schlächt.
D Wält bi uns, die lyyt im Aargge,
z vyl Neys, z vyl Fremds, me fyylt sich bschisse,
drum bruucht s so ain wie mii, e staargge
Siech, wo s Rueder no kaa rysse.
Und haan ych d Macht mool an mii grafft,
kaa ooni Ruggsicht schalte, walte,
denne haan yych s ändlig gschafft,
und loogisch duen yych d Macht jetz bhalte.
Die Masche ziet, s git nit vyyl z hoffe,
in mängem Land lauft s drum scho grumm,
dr Wääg zer Diggtaduur isch offe,
und e mängge dängt sich drum:
Lägg, isch daas e dumme Siech,
e Mischig us men Eegoischt,
wo fir sy Voordail alles miech,
und me brächtige Narzischt.
Loogisch drängt so ain nit lätz
in d Bolitygg, ze Wiird und Eer,
dää Bedriib mit Gschwaafel, Gschwätz,
dä lyyt sym Naturell halt seer.
Är verspricht, s wiird alles besser,
populistisch isch är gschiggt,
sy Entourage wird als wie gresser,
wo immer stramm stoot und braav niggt.
So drampt är frey uf allem umme,
liegt, bedriegt, ass d Balgge biege,
Hauptsach, äär het vo de Dumme
d Wäälerstimme kenne griege.
Und schafft är aimool soo die maagisch
fuffzgbrozäntig Wääler-Gränze
denne kaan är, das isch draagisch,
sy schaamloos Répertoire gredänze:
Jetz waiit e ganz e frische Wind,
Scho als eerschts goot äär uf s Ganze,
duet alli hooche Beschte gschwind
syyne treyschte Lyt zueschanze.
Syy Verspräche vor de Waale,
wo men iin jo draa mecht mässe,
die machen iim au gaar kai Gwaale,
die het er lengschtens scho vergässe.
Bewäärti Reegle wäärde broche,
mit Gryttigger het är glyy Grach,
drum duet är d Meedien underjoche,
Toleranz isch nit sy Sach.
Freyhaitsrächt sind uusegmischtet,
mit neye Gsetz und stränger Hand
wird gnaadeloos geeg d Geegner grischtet,
zem Machterhalt im ganze Land.
Und ooni mit dr Wimpere z zugge
bhauptet är, es miess soo syy,
au wenn e kaine mee kaa mugge,
syg s doch jo e Demokratyy.
E Gauner isch s, ab dr Lagg,
es isch aim niene mee zem Lache,
es schreyt in uns: Hau ab, du Sagg!
Was soll me nur mit soo aim mache?
Mer steggen en mit Sagg und Pagg,
kopfvooraa, denn git är Rue,
in e groosse Juute-Sagg
und binden oobe ganz fescht zue.
Und loos, schnäll uf die näggschti Boscht,
d Adrässe lyyt jo uf dr Hand,
mer schiggen en, egaal was' koscht,
per Äxpräss ab ins Pfäfferland.
Die Ydee, die hämmer ghaa,
fir ass' dr Wält wuurd besser goo,
denn wo dr Pfäffer waggst, deert kaa
kai Narzisse Wuurzle schloo.
Narzischtige Wäägen und Reggwysyte git s
bi dr Kasäärnen und pfäffereti Lädäärnen uf
em Minschterblatz.
Und wemme Gligg het, denn findet men au
iirgend naime noon en ainsami Boscht, zem
Päggli uffzgää. S kennt d Wält rette...
|
