Vo vergangene Zyte

Kai Aanig !!

Die ganzi Wält, die kunnt in Panik....
kai Mensch hett mee vo nyt en Aanig !!
zwoor maint so mängge Siebesiech
was me ächtsch ohni ihn au miech
doch sprichsch en denn perseenlig aa
zum uusezfinde, was er kaa
no muesch gar nit lang go graabe
dä gitt d Milch scho vorhäär aabe
will er nämmlig, jedi Wett
vo wirgglig nyt en Aanig het !
Und s'gitt sy yberall, was wänner
so Alleswisser-Supermänne
sy reede hi - sy reede häär
s'Reede fallt ene nit schwär
gootss denn aber an e Blaanig
merggsch glyy, die hänn doch gar kai Aanig...
Bischbill derzue gitts wirgglig gnue
s hänn alli mit "kai Aanig" z due:
Mee als e Joor, faart s Dram nach Weil
jetz hett me gmerhht, dasch nit so gail
Ai Gmoscht vom Morge bis am Oobe
abr d'Faargescht kasch nit loobe
nur Schnäpplijäger - und kuum Schwoobe !
Dytschi will me yynelogge
die byybe aber dusse hogge
kai Aanig, worum sich die so bogge..
Dr Morin jaggts grad uss de Sogge
kai Aanig haig är, es dät em laid
das haig em vorhäär niemerts gsait..
Fascht s glyychi hämmer jo erläbbt
by säm biirewaiche Verkeerskonzäpt !
dä hänn scho vorhär im Grosse Root
wo's so euphorisch duuregoot
vom erschte bis zum letschte Maa
alli kuum en Aanig kha !
und worum sy denn nit glabbt, die Blaanig
vo däm hett dr Wessels hitt no - kai Aanig !
Au sy Stadtbildkommission isch nit uff Droot
kai Aanig, was die vo Farbe verstoot
wenn's um d'Liechtreflaame vo dr Manor goot
wo giren und root - schynts s'Stadtbild bedroot
jä, dennsotte doch scho lang die Niete
die grien/root Regierig grad au verbiete !
Kai Aanig wieso die schönschte Fraue
by de Misswaale so drnääbehaue
und by Frooge zur Schwiz - s schloot ai uf e Maage
vyylmool aifach numme "kai Aanig" saage
glaubsch, bym Matterhorn sait jetzt bald soone Laama
kai Aanig - isch das dr Fujijaama ??
Kai Aanig wieso Jungi bim SMS sände
immer mee Abkürzige dien verwände
s gitt nur ai Erkläärig, wo ybrigblybt
die hänn doch kai Aanig, wie me s ganz Wort schrybt...
Unsri Luftwaffe wird langsam dezimiert
trotzdäm gitt sich drMaurer dezidiert
die beschte Fluugi mess ma ha lutt Blaanig
froggsch en aber fyr was ? hett er sälber kai Aanig...
Demokratie isch im Grund gnoo nit schlächt
nur wenn's um d Ussyebig goot, denn waisch nit so rächt
hesch mänggmool kai Aanig und kunsch ins Schwimme
ob me naime joo oder nai soll stimme
kunnts für die ainte denn falsch uuse
und duets im Bundesroot drab gruuse
no kasch sicher sy, dass me lääse kaa:
s Volgg hett wieder emoll kai Aanig kha !
wenn d'kai Aanig hesch, muesch au nit loose
uff däm Longchamp syni Waalprognoose
die geen doch je lenger, je mee in d Hoose
statt drnääbe z'tippe, s duet mer laid
hätt dä lieber scho gly "kai Aanig"...gsait !
Und denn by Schwiz Meteo - dass y nit lach
dä Wätterfrosch Buecheli uff em Dach
gitt sich allwissend in Sache Wätter
und verzellt derby e mängge Schmätter
dails warm, dails kalt, dails kunnts go schiffe
das bedüttet - s blybt glyych, mer hänns begriffe
und - kai Aanig wieso - aber s'scih no glatt
z Basel findet mänggmool au gar kai Wätter statt
wenn das wieder bassiert, no dängged draa
die hänn wieder emoll - kai Aanig kha...
Duesch queer duur Basel duurewandere
vo ainere Baustell zue der andere
wenn de denn Zyt hesch und bym Aanegaffe
dr ainzig froggsch, wo'd gseesch bym Schaffe
was er do miech - no sait er, nit glooge
"kai Aanig - do mien sy dr Chef go frooge"
Dangg Spändegälder gitts sone grossi tolli
wyttläufigi Aalag zmitts im Zolli
luegsch yyne, foosch jedesmool afoo flueche
Viecher kasch dert maischtens vergääbe sueche
kai Aanig - was mag ächtsch dert inne sy
zum Affe z finde, bruuchts Fantasie
glaubsch die hogge doch dinne und sinn am Penne
und hänn kai Aanig, dass sy aigentlig au uusekenne...
By dr FIFA - dääre Fählkonstruktion
vo Misswirtschaft und Korruption
hoggt zoberscht ooben uff em Thron
dr Blatter Sepp - wie Gottes Sohn
kuum isch ewägg, dä starggi Maa
haig e nach dr Razzia
vo gar nyt mee... en Aanig kha !
und au "kai Aanig", nit vyl schlauer
gitt sich dr Kaiser Beggebauer
kai Aanig, wie das not wytergoot
kai Aanig, ob nit in letschter Noot
dr Blatter Sepp - mit göttligem Root
au bletzlig wieder ufferstoot...!

Kai Aanig, wo mer jetz glandet sinn
vyllicht jo scho zmitts in dr Fasnacht drin
do hett me trotz allem, wo me ka see
mänggmool doch au kai Aanig mee
yber was me aigentlig lache kaa
und das goot au unsere Zeedel all
mer hoffe zwoor er dien-en verstoo
und sinn mee oder weeniger noochekoo
Vyllicht gitts aber doch no so Wääse
wu auc nach e baarmool Duurelääse
zum Schluss heersch saage in ainer Panik
"sauguet! - nur vom Süschee ha n y kai Aanig"!

Und wenn de wotsch en Aanig bekoo vo Kunscht
goosch an 'Usstellig vo de Lampe bym Münster
und vo de Requisite by dr Kasärne
(Mäntig zoobe bis Mittwuch demorge)