Dr Basler Dybli Stammverain

Informatioone fir Intressänte

Mir suchen im Stammverain allewyyl no Pfyffer, Dambuuren und Vordrääbler (Frauen und Männer). Bisch 18 Joor gsii, drnoo bisch häärzlig willkomme, uns kenne zleere. Mäld Di aifach emool unverbindlig bim Obmaa (au under em Joor).

Bisch nooni achtzää, drnoo lueg doch emool bi dr Junge Garden yyne.

Pfyffen und Drummle leeren als Erwaggsene

Mir mache als immer wiider emool e Pfyfferkurs fir Erwaggseni (gnueg Intressänte voruusgsetzt) fir die, wo nooni oder eerscht e bitz kenne pfyffe. Dailnäämer vom Pfyfferkurs mache scho vom eerschte Joor aa Fasnacht, allerdings zeerscht halt no im Vordraab. Wenn s zweenig sinn fir e Pyfferkurs, drnoo goosch in aini vo de Pfyfferschuele und machsch solang bi uns im Vordraab mit.

Wenn De lieber leersch drummle, denn kunsch am beschten emool als Vordrääbler zue uns und goosch parallel in e Drummelschuel (z.B. bim Rolf Schlebach oder bim Walti Büchler).

Rächt und Pflicht als Mitgliid

Bi uns sinn Pfyffer, Dambuuren und Vordrääbler alli glychberächtigt. Dr Vordraab duet sich – statt wichentlig z iebe – perioodisch ze gselligen Aaloss dräffe. Alli drey Grubbierige dräffe sich als am Mittwuch zoobe (noo den Iebigsstunde) im Dybli-Käller.

Finanziell muesch mit folgendem rächne: Dr jäärlig Byydrag fir Aggdyvmitgliider koschtet 110.– (Pfyffer 200.–, Dambuure 230.–) Frangge. Dr Fasnachtsbyydrag isch 375.– Frangge und beinhaltet d Larve, dr zuegschnitteni Goschdyymschtoff (Naaie duesch sälber oder gisch es uff aigeni Keschten epper anderem), s Zmoorgen am Moorgestraich und die baide Nachtässen am Määntig und am Mittwuch. Au dr Bummel isch inbegriffe.

Nääben em Finanzielle git s wytteri Mitgliidschaftspflichte. Die wichtigschte baide sinn: Källerdienscht (ai bis zwai Wuche pro Joor) und en Engagement immen e Team. Mir dien alles in Teams organisiere, es git ains fir s Sujet, fir d Fasnacht (Route, Ässe, Bummel), fir d Ladäärne (Uff- und Abbau etc.), fir s Drummeli, fir unseri Meedie (Glyggezyttig, Archyyv, etc.), fir dr Käller, fir die Jungi Garden und fir sunschtigi Events (Schyyweekend, Summerprogramm, Wiehnachtsässe, etc.). Esoo isch jeedes Mitgliid yybunden und kaa sich deert engagiere, won iim am maischte draa lyyt.

Am Aafang isch me nummen e provisoorisch Mitgliid. Do het men alli Rächt und Pflichte, aber an dr Generalversammlig deerf me nooni mitstimme. Noo dr zwaiten absolvierte Fasnacht duet denn d Glygge iiber e definidyyvi Uffnaam beschliesse.

Wenn und woo iebe mir?

Pfyffer und Dambuuren iebe jeewyls am Mittwuch zooben im Dybli Käller, und zwor vom achti bis geege die zääni. Wäärend de Schuelfeerie hänn au mir kaini Iebigsstunde (umso mee Zyt het me, zem dehaime z iebe). Wär uusnaamswys verhinderet isch, mäldet sich vorhär bi dr Pfyffercheffin bzw. bim Dambuurechef ab.

Drzue mache mer als spezielli Iebigsaaloss (mänggmool au e Weekend), wo mer unseri Märsch bsunders intensyyv kenne schlyffe. Au s Gsellige kunnt drbyy nit z kuurz.

Unsere Pfyfferinschdruggder isch d Florian Stähli, d Dambuure wärde no vom Jonas Schöni gschliffe. Wie me die baide kaa erraiche, findsch uff dr Kontaggd-Sytte.