Dr Dybli-Käller in dr Stiftsgass 9

Dr Dybli-Käller kaa me miete!

Syg s fir e Familiefescht, e Glassezämmekunft, en Apéro, e Jassturnier ooder was au immer, unsere Käller kaa me miete!

Aafroogen und Reservation

Reservatioons-Aafroogee kaa me bim Stephan Hämmerli mache via Email.

Konditioonen und Bryys

D Källermieti wird in Absprooch feschtglait (fir privaati Aaloss vo Glyggemitgliider gilt e reduzierte Bryys). Im Bryys inbegriffe sind d Mieti vom Lokal und zwai Hälfer/inne vo de Dybli, wo hälfe koche, serviere, dr Uuschangg bedienen und dr Käller wiider diend uffruumme.

Nit inbegriffe sind s Dischdegge, Dischdiecher und Deggoration. Fir das muess me sälber soorge (Gschiir isch vorhande).

Wenn s e lengeri Aaglägehait sott wäärde, diend mir fir en Aaloss au e Freynacht-Bewilligung (ab de zwelfi bis speetischtens am zwai demoorge) yyhoole, das koschtet separat no Fr. 260.00.

Ässen und Dringge

Gedrängg, d.h. Bier, diväärsi Mineral, Wyy (roten und wysse) und Kaffi, het s bi uns im Käller und muess doo bezooge wäärde. Wenn Dir wänd aigene Wyy ooder e Glepfwyy mitbringe, drnoo koschtet s e Zapfegäld.

Mir verfiegen iiber e guet uusgrischteti Kuchi, händ Gschiir, Fondue Chinoise Pfännli und au Dischgrill. Fir s Ässe miend Iir allerdings sälber soorge (allefalls mit eme Party-Service).