Vo vergangene Zytte

Dr Adam, Single mit Niwoo!
E Rippli hett men uusegnoh
und hett denn druus halt d Eva gmacht.
Und s Niwoo? Isch bachab – guet Nacht.
Jetz het dä Dropf
nur ains im Kopf.
Neanderdaaler hänn
Niwoo, wenn sy wänn.
Die Rüppel
mit Knüppel
göhn go Fraue hole
uss fremde Höhle gstohle!
Und – es isch wirgglig nit glooge –
hänn sy an de Hoor haim zooge.

Denn isch s komplizierter worde.
Nümme jagen in wilde Horde.
Nai, dr Babbe het beschlosse
und politisch Ehe gschlosse.
D Kupplerin het au
dir gsuecht e Frau.
Kai Liebi! – Vernunft
isch dy Zuekunft.
S wird bestimmt
wär me nimmt.
Und sich dy Härz derby,
muesch denn ganz grisse sy.
Wotsch dy Liebi durestiere,
muesch dy Liebschti wyt entfiehre.

Denn der Postillion d'amour
mit Dingeldangel und Glamour,
Gsellschaftsspiil mit Löösli und Pfand.
Wär druggt denn do so lieb my Hand?
Hütt im Internet
luegsch, ob s do hett
für dii e schöne Schatz,
e liebe freie Spatz.
Schloofzimmer
für immer?
Oder für ai Oobe
schwäbsch am Himmel oobe.
Und d Uuswahl isch riesegross,
aber s Glügg fallt dir nit in Schoss.

Ich suech mögligscht inneri Wärt!
Ich suech e Frau für an Härd!
Ich, mollig, mit zwai Kind,
ob ich do ächtscht au aine find?
Ligg y dernäbe,
e Frau fir s Lääbe?
Är sitzt jetz do ganz still,
dr Laptop ihm sage will.
sy maile:
Sy daile
mit dir gärn ihr Läbe,
doch Seggs syg drnäbe.
Ass Maa kasch numme flueche,
wenn Fraue Eunuche sueche.

Hesch Gäld? Kasch au de luxe sueche,
bin ere Agentur bueche.
Freu dy denn als edel VIP-Kund
über das, wo mit Niwoo kunnt.
Frauen und Manne
schlangg wie Tanne.
Gaischt und Intelligänz
und Küngelipotänz.
Sy strahle
und prahle
mit Doggdertitel
in schneewysse Kittel.
Isch es denn nüt, – neui waarte!
Zahle kasch mit Kreditkarte.

Aber – so myni Gedangge –
was sinn all die Datebangge?
Dräumerei und Illusioone,
Hoffnigen und Figgzioone.
Suechsch vorne, hinde,
Glügg willsch finde!
Muusglick linggs, Muusglick rächts –
sehsch guets, sehsch schlächts.
Und s Niwoo?
Isch es wo?
Nit richte, nit lache,
muesch Erfahrig mache!
Drum dien mer s Sujet schnäll verloh
und d Dräumer wyter dräume loh.

Und wenn de fertig dräumt hesch, goosch
an d'Uusstellig vo de Lampe bym Münster
und vo de Requisite by der Kasärne
(Mäntig zoobe bis Mittwuch demorge)