Basler Dybli Stamm – Fasnacht 2009
Wenn dr fätti Spägg duet schwinde
kaa me fätti Maade finde
Es schläggt s die greeschti Gaiss nit wägg
Maade het s in jeedem Spägg.
In guete Zyte duet s nit schaade
s het gnueg, au fir Schmarotzer-Maade,
drumm nimmt me si nur sälte woor,
si sinn fir uns kai richtig Gfoor.
Doch groote d Zyte mool in s Myyse,
– e Polit-, Finanz-, e Umwält-Gryyse –
und muess me d Giirtel änger schnalle,
denn dien so Maade bees ufffalle.
Jetz zaigt sich aismools, wär am beschte
läbbt uff andre-n-iiri Keschte,
weeli Lyt nur raffe, nämme
ooni sich im gringschte z schämme,
wär sich fiiredrängt am maischte
ooni wiirgglig eppis z laischte.
Mir wänn doo nit nur lamentiere
sondern die Maade bräsentiere:
| |
S haut uns doch glatt us unsre Sogge,
wenn Bängger-Maade Gäld verzogge,
sich denn dr Bonus leen uffstogge
und d Wiirtschaft doodrmit dien schogge.
Uff de Wältmeer kaa s bassiere,
ass Piraate-Maade Schiff entfiere
und ungeniert drmit brobiere,
fätti Leesegäld z kassiere.
D Miethaizkeschte styyge fyys,
de-n-Autifaarer goot s au myys,
s fraie sich nur still und lyys
d Maade-Schaich am Eel-Hoochbryys.
D Waggis dien s uns Basler nyyde,
ass sii wäg Fluuglärm-Maade lyyde,
s kemme drum, zem das z vermyyde,
d Fluugi als wie mee vo Syyde.
Damit in China d Milch duet schmegge,
leen si 's mit Melamin lo stregge,
und wenn drvoo au Kinder verregge
duet s die Maade nit verschregge.
Fir jeede Schyssdrägg kaasch persee
vom Comité e Reegle gsee,
mir mainte drum, s syg als wie mee
s "Fasnachts-Maade-Comité".
E Maade läbbt s ganz Joor im Spägg,
e Noomaade-n-aber dänggt sich: "Lägg,
blybt vom Frässe nur no Drägg,
denn schlyych ych mi vo doo ewägg!"
In dr nationaale Hoochmuet-Phaase
geen Nati-Maade-n-uff e Joggeli-Raase,
hopple-n-iiber s Fäld wie d Haase
und gheye jämmerlig uff d Naase.
D SVP stoot fir Bloggaade,
schiggt alles Fremd ewägg go baade,
bysst d Evi Widmer-Schlumpf in d Waade,
und blybt sälber doch die greeschti Maade.
S hänn Stroomer-Maade so Allyyre,
dien d Liberalisierig fyyre,
und frässe sich denn, dangg em dyyre
Stromnetz satt an de Gebyyre.
Är bruuch e-n-iibergroossi Schoose
und mecht au uff d Vernunft nit loose,
esoo faart in dr Offroad-Doose
e Maade mit Brofyylneyroose.
An jeedem Event het s Maade drbyy,
siirpfle Gybbli und Rosé-Wyy,
maine, si wuurde die Beschte syy:
Glepfer-Promis und VIP.
Vom grooss Kanton fliege-n-obaabe
freyziigig schwaarzi Maade-Raabe,
wo sich an unsrem Woolstand laabe
und uns die letschte Jobs abgraabe.
|
Es git zem Gligg bi soo Exzäss
rainigendi Hailprozäss:
E Stiggli Spägg ab eppe zwanzig
Maade wird ganz aifach ranzig,
und denne losst sich s nimm vermyyde
s fuuli Flaisch halt uusezschnyyde.
E jeede Mechtegärn-Boliddigger
profiliert sich jetz als Griddigger
und poschtuliert e strängscht Verbott
wo s Maadetum beände sott.
Doch d Bollidigg, die gryfft vyl z schnäll
zem Zwaihandschwäärt statt zem Skalpäll
und haggt e mänggmool und nit z gnabb
au s gsundi Flaisch vom Gnoche-n-ab.
Emänd doo frogt me, wird dr Schaade
nit gar no greesser als mit de Maade?
Drum sott me-n-allewyyl au doo
zrugg ze Mass und Bsinnig koo.
E Maade goot – eb fätt, eb maager –
am Zyschtig in s Ladäärne-Laager
uff em Minschterblatz und au
zer Kasäärne-Waage-Schau
|
