| Ummeblettere |
| Gumbb zeerscht in e Joor! |
|
Basler Dybli Jungi Garde und
Dyblinäscht – Fasnacht 2009
Statt in s luschtig Daschebuech
kunnt d Myggi Muus in d Schwyz uff Bsuech
Es het vor mee als 80 Joore
dr Disney Walti e Muus geboore,
die Muus, die isch e ganz e schyggi,
drum daufft är si denn glyy mool Myggi,
("Myggi Muus" mit vollem Namme)
und ass si nit elai isch amme
het d Myggi Muus so noodisnoo
vom Walti vyyli Frind bikoo:
Bim Donald Dugg und syyne Neffe
isch är dr Luuser und si sinn d Cheffe,
als Frindin fir die gwisse Stunde
het dr Myggi d Minni gfunde,
dr Dyysedriib luegt in dr Noot
ass technisch alles wiider goot,
fir dr Ryychtum schaffe wagger
– maischt vergääbe – d Panzergnagger,
und zem naime kenne pfuuse
woone-n-alli z Äntehuuse.
Im Daschebuech hesch unsri Frinde
dreyhundert Mool scho kenne finde
und au im Film kaasch mee und mee
d Äntehuusener lauffe gsee.
E soone Driggfilm isch rächt holprig,
d Figuure sinn e bitzli stolprig,
will zem d Beweegig uusezhoole
me si millioonefach miesst moole.
Fir dr Walti isch das e Quaal,
Computer wääre-n-eerschti Waal,
doch fir e graafisch scheen Ergääbnis
und filmisch yywandfrey Erlääbnis
muesch d Computer brogrammiere
suntsch duesch Di grauehaft blamiere.
Fir soone Job bruucht s Spezialischte
fir neyschti Super-Computer-Kischte,
wo iiri Foorschig de-n-Algorithme
zer Animatioon dien widme.
Drum het dr Walti e Projäggt
mit dr ETH uusghäggt
(deert haigs die beschte Graafig-Grägger
und geniaali Computer-Hägger)
und schiggt d Myggi kuurzerhand
mit syyne Frind in s Schwyzerland
fir e – s deent e bitz groosskotzig –
computergraafischi Uffmotzig.
Wo d Helvetia drvo het gheert
fyylt si sich grad schampaar geehrt
und laadet d Myggi samt Bagaasch
uff e Schwyzer Rund-Voyaasch:
Es hänn dr Tigg, dr Trigg und Tragg
s Pfaadi-Zyyg baraat im Sagg,
und faare samt Fyyselschwaiff-Fäänli
im Boschtauti und Yysebäänli
(aber ooni Donald, däm Versaager)
diräggt in s Contura-Bundeslaager.
Myggi und Minni geen Hand in Hand
mitenand in s Heidiland,
si spiile deert e bitzli speeter
wie s Heidi und dr Gaisse-Peeter,
und schynts haig me no spoot am Oobe
si gheere lache-n-im Heystogg oobe
(si gniesse s, dehaim deerft das nit syy
wäg dr amerikaanische Pryderyy).
Dr Daaniel Dyysedriib macht gligglig
an dr ETH e Neyentwigglig:
E Dambuurmaioor soll in de Gasse
nie me e Maarschaafang verbasse,
fir sy Stägge git s drum e feyn
Marschaasaage-Hälferleyn.
Do duet me-n-im Daaniel grad e neye
"Dipl. TM-Ing. ETH" verleye.
D Panzergnagger schweere fyyrlig,
ass si d Schwyz seer schetze, nadyyrlig,
zem Byspiil Schoggi, Kääs und Angge,
aber Nai! Ganz sicher kaini Bangge!
Mir sinn d "Union Bangge-Gnagge Suisse",
unsri Weschte blyybe wyss!
Drey Daag speeter, s isch nit zem lache,
gheert me-n-e Schwyzer Groossbangg grache,
si haige mit Immobyylie-n-und soo
us Äntehuuse sich iibernoo.
Soo kenne d Myggi und iiri Gselle
luschtigi Schwyzer Gschichtli verzelle,
s isch drum z befiirchte, aimool mee,
ass me die glyy im Kino kaa gsee,
dangg Schwyzer ETH-Perfäggtioon
in scheenschter Computer-Animatioon.
Am Zyschtig goot me an d Ladäärne-Usstellig
uff em Minschterblatz und au an d Waage- und
Requisite-Usstellig bi dr Kasärne
|
|
