Ummeblettere |
Gumbb zeerscht in e Joor! |
|
Dr Schnee isch zwor s allgeegewärtig Thema vo dr Fasnacht 2006 (au am Määntigs-Cortège het s dailwyys gschneyt), aber geege dr brächtig Zuug vo de Basler Dybli het s Wätter kai Chance ghaa. Die diväärse Blätzli-Bajass (e jeede zwor individuell, aber drotzdäm insgesamt imme-n-ainhaitlige-n-Erschyynigsbild) sinn vo alle Sytte bewundertet woorde-n-und hänn bi vyyle Zueschauer spontaani Begaischterigs-Stiirm veruursacht.
Unsere Dambuurmajor isch e Klass fir sich gsii, sowool orthopädisch als au optisch. Anderi hänn fir s glyych wie das, wo dr Urs uff syyne Schultere drait het, grad e Waage bruucht. S Reggwisyt isch au guet aakoo. Es het nit numme grilliert und glyychtet, sondern au greftig graucht, was denn e baarne in lätze Hals groote-n-isch. Doorum hämmer s an s Änd vom Zug miesse verbanne.
S Wätter het uns indiräggt denn doch no yyghoolt. Muetmaasslig wääge de nooni vollständig gruumte Stroosse hämmer meermool Stau ghaa uff dr Route, esoo ass mer gnapp d Färnsee-Iiberdraagig vom Cortège verbasst hänn und fascht no z spoot zem Znacht yydruulet wäre.
|