Ummeblettere |
Gumbb zeerscht in e Joor! |
|
Am 14. Jänner isch dä Aaloss gstiige, wo im Vorfäld ainiges z reede het gää. Aagfange het s an ere Sitzig vo dr Junge Garde noo dr Fasnacht 2005, wo me beschlosse het, wiider e-n-intäärns Bryssdrummle-n-und -pfyffe zmache. Wil mer im 2006 jo kai Drummeli hänn ghaa, isch an dr Pfyffer- und an dr Dambuuresitzig beschlosse woorde, ass au dr Stamm wuurd mitmache. Do hänn sich d Schwelger nit welle lumpe losse-n-und hänn eebefalls spontaan zuegsait, dä Aaloss z organisiere.
Isch das villicht e bitz lyychtsinnig gsii? Im Dezämber sinn nämmlig alli langsam nervees woorde. Wo findet s jetz statt? Hämmer e Ruum mit Biini? Was isch alles erlaubt zem uffiere? Es het sich nämmlig zaigt, ass vom Stamm die weenigschte Luscht hänn ghaa, sich musikaalisch coram publico z blamiere.
Zem Gligg isch s Reglemänt doo seer liberaal gsii. Me het aigendlig kenne mache, was me wott. Und doorum het au eppe d Helfti vom Stamm (die ander Helfti het in ere statistische-n-Anomalyy vo ghyffte Familiefeschtli uusgrächnet an sällem Daag Zueflucht gfunde) zämme mit de maischte Junge-n-und de maischte Schwelger e glungene Nomidaag mit musikaalische wie unterhaltsame Bräsentatione-n-erläbbt. Lueg sälber, wytteri Fottene kaasch uff dr JG-Homepage aaluege:
|