Basler Dybli Schwelger – Fasnacht 2005
Dramp druff – Deggel dra dr Pfuus isch duss, dr Deggel druff
E Sujet muess ane! Mir mache Sitzig.
Dä Aaloss isch glatt und aigentlig witzig.
S wird vyl gschwätzt und au vyl glache,
me suecht e Sujet iber luschtigi Sache.
Iber Krieg oder gar politisch?
Nai, nid scho wider eso kritisch!
Privats, au us dr Politik?
der Couchepin, gheert me, isch schynts z digg.
Oder us em Wirtschaftsläbe?
so vyl Entlassige sin drnäbe!
Iber s Comité, die komische Gstalte?
heer mr uff, das isch scho-n-e-n-Alte!
Iber Zircher wämmer nid grooss klage,
di mien scho schwär an GC draage!
Aine flischteret mr ebbis in d Ohre.
Das wär zwor bildend, aber unverfrore.
Und dr neyi Zugfahrplan
legt nid nur dr Cortège lahm!
S isch jedes Johr das Spiil;
e Suecherey im groosse Stil.
Dr Chris von Rohr mit sym "meh Drägg"
isch scho verby und zwyt ewägg.
E Sujet muess aane, ganz elementar,
es muess dr Hammer sy ganz klar;
schen soll s no sy un darf nyt koschte,
(am beschte kaufsch s Goschdym im Oschte)
denn hitte griegsch jo nyt meh gschänggt.
drum hämmr aagschträngt noochedänggt.
Doo sait aine, waisch ych wett
e Sujet iber s Recycling vo PET.
PET isch ginschtig – PET isch guet.
Das Sujet bruucht au nit vyl Muet.
es git kai schlächte Punggt, kai haiggle,
und d Larve kasch am Änd recycle.
PET recycle das isch wichtig
und im Grund gnoo jo au richig.
Unser Sujet isch jetzt klar:
PET isch guet recyclebar!
Sammle jo nid eelig PET
oder e Fläsche, wo Essig drin het.
Das steert bim widerbruuchbarmache.
Sammlisch lieber anderi Sache.
Grossi, diggi, dinni, blaui,
grueni, bruuni – sogar graui.
Farb und Form spiilt gar kai Rolle,
nur wenn sammlisch, bisch e Tolle.
No ha-n-y gsammlet wie-n-e Wilde.
Bi jetz iber PET schampar "im Bilde".
Iberall Fläsche in dr ganze Wohnig
Ych ha no zwenig – es längt mr nonig.
Bim Baschtle sag ych ze mynere Frau:
"Mir hänn z vyl PET, mainsch Du nit au?
Dä Bärg vo Fläsche isch enorm,
und d Larve het scho lang e Form.
S macht mer Kummer, liig wach bis am Morge,
will ych das alles muess sälber entsorge.
Muesch nid sortiere oder trenne,
kasch aifach an die Boxe renne.
Do stoht: Luft druss und Deggel druff!
Bi zwaihundert Stigg macht mii das Muff.
Ych leeg die Fläsche uff dr Bode,
stand ganz fescht druff, das syg jetz Mode.
Bugg mi – dr Ranze isch aifach im Wääg
das alles no uff myni alte Dääg!
Y bugg mi sytwärts, s goht mer schytter
s wird mer ibel, doch hilft s nit wyter.
Jetz isch mer klar ganz ohni Buff:
My Luft isch duss – dr Degel druff!
Mir gheere zue de Basler Dybli
Die hän Männli und hän Wyybli
Drummle und Pfyffe lehrsch au deert
Bi de Junge, wenn s nid steert
D Ladärne-Uusstellig isch wie allewyl vom Mäntig zoobe
bis am Mittwuch dmorge uff em Minschterplatz
D Wääge und d Requisite ka me bi dr Kasärne go bschaue
|