Basler Dybli Stamm – Fasnacht 2004
haute cuisine à la -minu-te
Dr Megge froggt im haimko s Schuggi:
"Was hesch mer hitt fir Znacht gmacht, Schnuggi?"
Ääs maint "Y haa nyt kenne rischte,
hitt kunnt die Sändig in dr Kischte!
S längt grad no zem ebbis z bstelle:
hesch Pizza oder Döner welle?"
"S glyych wie du – ych fang a boole –
gohsch mr no-n-e Bier go hole?"
Gschwind wird s "Vorwärts"-Gnepfli druggt,
vom letschte Film zem Näggschte zuggt,
äär kunnt by Tele Basel aa,
und deert isch grad dr "-minu" draa.
Dää verrootet diir elai,
was d Vischere hitt kocht dehai;
s isch passend mit dr Jooreszyt,
bsunders rar und exquisit:
e Fischkopfsuppe federal,
poliddisch absolut neytraal.
D Produkt im Vordergrund plaziert
wird dr s Zeedeli diggtiert:
säggs Kaarpfe und dr wyssi Hai,
bunde mit me Strusse-n-Ai.
S Schuggi maint, das schmegg doch schytter,
und gumpt drum grad zwai Sänder wytter.
Deert will dr Jamie O. grad zaige,
und eso die Rächte gschwaige,
was e Haiwoogschanggi bruucht,
ass dää sich fir sy Läbtig schluucht.
Sy Rezäpt, Lyt z integriere,
duet die Falsche inschpiriere,
mit verjääste Kech und Waare
wänn die doch nuur Sozialhilf spaare.
Die Art, dr Girtel änger z schnalle,
will em Schuggi nit rächt gfalle:
"Dasch doch nyt fir my Figuur!"
dänggt äs sich bim Zäppe suur.
Jetzt gsehts Ain am Riebli schelle,
wo sait, du muesch sy Scheller bstelle,
sy Rezäpt wurd das bedinge,
sunscht dääts trotz Garantie nit glinge.
Rezäpt und Scheller gäb s im Set
diräggt ins Huus per Internet.
Uff Bildli gsehsch dert Schritt fir Schritt
e jeede Griff und jeede Schnitt,
am Änd vom Khech merggsch numme-n-ains:
e frisch gschellt Riebli bruuchsch gar kains.
Dr Megge hipft zem näggschte Sänder,
deert kemme Kech uss färne Länder,
sy dien imme-n-e Studio
kecherle vor Publiko,
derbyy no glatti Frooge stelle,
fir "Richtig" kamme Quizpinggt zelle.
Zem Byspyl, wäär zerscht kennt entdegge,
no was das Gschlaaber dääti schmegge.
S Schuggi klaagt: "Wie fyys die Froog isch!"
Är findet: "Soja-Sauce, logisch!"
So asiatisch bitzelächt,
maint äär, wär doch fir Bsuech grad rächt.
"Was Bsuech?" froggt s Schuggi ganz närvees,
"Kai Angscht: miir bstelle s bim Chinees!"
D Menü vo de Basler Finf-Stärn-Kinschtler kasch an dr
Ladäärne-Usstellig uff em Minschterblatz go probiere.
Dr Fast Food findsch an dr Requisite-Usstellig bi dr
Kasärne
|