Ummeblettere |
Gumbb zeerscht in e Joor! |
|
Basler Dybli Schwelger – Fasnacht 2004
Fir jedes Drepfli e Drugg uff s Gnepfli
Dr Rubli zaigt uns ganz gekonnt
im Räge e Schlächtwätterfront
Uff em Dach hets nur fir das
e Kischte uus Metall und Glas
Au s Meteo het sy Superstar
e roote gnopf, das isch jo glaar
jetz muesch di aber wirgglig heebe
pletzlig ka dä mit mir reede
Bi Räge, Sunne oder Schnee
kasch mii im Schwyzer Färnseh gseh
Ych bi ains vo däne arme Drepfli
vo de vier roote METEO-Gnepfli
Ych bi dä Rooti oobe rächts,
druggsch mi, gits Wätter, schuurig schlächts
und linggs - dasch nit politisch -
sitzt au no aine, wirgglig kritisch
Druggsch dä rooti Gnopf linggs oobe
haglets zem Gligg nur bi de Schwoobe
Dä unde rächts, fescht under Drugg,
dänggt nur an ains: däm gib ychs zrugg
Elai sin mir nit uff dr Wält
rooti Gnepf gits fascht wie Gäld
nur nimmsch uns aifach nimme wohr
und do drin bstoht die grossi Gfohr
E roote Gnopf isch richtig wichtig
isch är doch wirgglig zimlig gwichtig
denn wenns brennt und jeede rennt
druggsch dä Gnopf wo jede kennt
Au an vyle Automate
hets e Gnopf, root wie Tomate
mit ere wichtige Funktion
ains uff e Kopf isch ihre Lohn
Scho syt langer, langer Zyt
mache mir das Spiili mit
D Reed isch vo de Gnepf de Roote
kasch es alle Lyt verroote
S git jo nyt, wo s jo nit git
drumm macht e Mängge aifach mit
und isch e Lääbe lang, dä Dropf
e glaine roote, druggte Gnopf
A propos rooti Gnepf und soo
uff s Wätter kasch di nimm verloo
S Klima macht is grosse Kummer
hesch es gspyyrt im letschte Summer
Politiker und Wiirtschaftslyt
die kenne fir das Wätter nyt
Dr Blocher isch zwor grad im Hoch
doch das losst au scho wiider noch
Wo d Buure s Wätter kund hän doo
hesch Di no kenne druff verloo!
Das sin no Prognose gsi
die schenne Zytte sin verby!
Eb Hectopascal, Isobare,
duesch lieber nid in d Bärge fahre
Eb Diefdrugg oder "leichte Schauer"
no Meteo bisch au nit schlauer
Bucheli, Rubli, d Bonert au
das Gstaggel das verstoot kai Sau!
Scho rächt confus däng ych mir doo:
Hättsch lieber ai Bier ganz wäggloo!
Wenn de vor Saich nimm wytter waisch
und numme no Versprächer saisch,
denn syg still - saisch lieber nix
suscht "wätteret" dr Kurt Felix
Doch d Rettig noht in rooter Form
Die Wirggig vo däm Gnopf - enorm
Ai feschte Drugg und denn isch Schluss
piff, paff, puff - und du bisch duss
Das wär emol fir alli guet
wenn d Hektik e Momänt uus rueht
wenn nyt me goht - und alles still
und kaine ebbis vo mir will!
ZEM GLIGG GIT S NO DIE ROOTE GNEPF
FIR ALLI ARME GSTRESSTE DREPF!
Mir gheere zue de Basler Dybli
Die hän Männli und hän Wyybli
Drummle und Pfyffe lehrsch au deert
Bi de Junge, wenn s nid steert
Am Zyschtig goot me an d Ladäärne-Uusstellig bim Minschter
und au an d Wage- und Requisite-Uusstellig bi dr Kasärne
|
|