Basler Dybli Jungi Garde und Dyblinäscht – Fasnacht 2002
Gross – Grossi – Groosis
S schrybts bald jeede uff si Faane:
"S Alte wägg – Neis muess aane!"
Dä Spruch, dä losst mi, nundefaane,
maischtens gar nyt guets eraane.
Y reed do nit vo Presidänte
(wo schnäädere wie Schnääderänte),
nit vo Schwyzer Fluggsellschafte
(wo s finanziell halt nimm vergrafte),
nit vo Blaggedde-Kinschtler-Rugge
(womme duet e 2 druff drugge),
nit vom Auf der Mauer Joscht
(dä schrybt, als syg är nim bi Droscht),
und scho gar nit vom Combino
(däm fäält s glaub scho e bitz am Nyywo).
Nur eppis Neis isch wirgglig stargg:
Unsere Sanggt-Jakobs-Pargg!
Stargg isch dr Pargg, nit eppe dr Naame,
wo prangeret uff allne Faane.
Dä Naame dien die Offizielle
jeedes Mol pointiert verzelle,
dr alti Naame wird verdruggt,
d Sponsoore wäärde sunscht veruggt.
Doch kaine loost uff Trotteli,
s isch und blybt halt s Joggeli.
Und deert laufe grossi Sache,
wo aim wiider Fraid dien mache:
Dr Chrigel Gross und syyni Manne
styyge deert in d Marmor-Wanne,
leen sich vom Luxus seer verwenne.
Mer meegen es jo alli genne.
So soorge si mit frische Gliider,
dass d Schlachte ze St. Jakob wiider
gwunne wäärde – s isch e Fraid –
nur d Gäägner diemmer mänggmool laid.
All Samschtig diemmer d Faane hisse,
geen vor grossartiger Kulisse
uff Glappsitzblätz (zwor seer dyyre)
unsren FCB go fyyre.
Nur blooge mi jetz alti Gaischter:
Längt s ächtscht hyyr zem Schwyzer-Maischter?
Doch Schutte isch nit alli Wält,
s nei Joggeli koscht halt vyl Gäld,
drum längt e groosen FCB
zer Finanzierig niene mee.
Uff dr Suechi no mee Wärt
dänggsch an Open-Air-Konzärt,
willsch Muusigstars uff Basel logge –
wär koo isch haut mi uss de Sogge:
D AC/DC het me gsichtet
(s het fascht kaine driiber brichtet),
was fäält, das isch e Superstar,
nit d Liebeskääfer, das isch klar,
s git nummen ain, är blybt ganz logger,
dr Brian Adams (Altstarrogger).
Är isch dr Greescht, zmindescht im Sinn
vo dr Sakia und dr Géraldine.
Doch s Greescht find ych, nit iiberdriibe,
isch dr Raase-Flägge bliibe.
Drotz Uffgebott vo grosse Staare
miesst me immer no z vyl spaare,
gsuecht wird drumm e dritti Quelle,
vo dääre will y jetz verzelle:
Wenn ych als Binggis stier bi gsy,
bim Groosi bin i denn verbyy
und ha, drotz allem "Me git nyt",
bikoo e glaine Glaikredit.
Au doo het me dä Trigg probiert –
Wo het das nummen aanegfiert?
Bi groose Summe bruucht s e Pfand,
drum het me halt no kurzerhand
en Uffbau gmacht mit soonige
dyyren Alterswoonige.
Jetz draime Groosi und Grossbappe
mit root-blaue Dächlikappe
uff den Eereblätz, de hooche,
alte Maischter-Zytte nooche.
D Rächnig, die isch zletschtamänd
nit ganz uffgange, wil si händ
bi allne Plään doch glatt vergässe
d Naduur z beachte und z vermässe.
Verbaut me d Sunne, denn git s doch
im Stadion e Schatteloch.
All Haimspiil mien mir uns jetz zämme
fir dä "scheeni" Raase schämme.
Nit im Joggeli, aber uff em Minschterblatz findet vom Mäntig
znacht bis am Mittwuch demoorge d Ladärne-Usstellig statt.
|