Ummeblettere |
Gumbb zeerscht in e Joor! |
|
Basler Dybli Stamm – Fasnacht 1997
Franggestai, bald bisch nimm elai
Vor dryssig Johr het e Profässer
E Härz verpflanzt mit Kuchimässer
Und die ganzi Wält het gafft
Eb är das tatsächlich schafft
Es isch em denn au wirgglig glunge
Und alli hänn si fraidig gsunge
`s Lied vom ewig kenne lääbe
Das isch dr Startschuss gsi vom Strääbe
Meh Macht z`haa als der liebi Gott
(Logisch, ass das e jeede wott!).
Hit draage d`Getter wyssi Kittel
Und ihre Himmel isch der Spittel.
Me heert efang die schlimmschte Gschichte
Ass si welle Mensche zichte
Wo eme-n-Ideal entspräche
Und alli Laischtigsgränz bräche.
Me wott hit Wääse fabriziere
Do fohsch vor Gruuse grad a friere.
In Labors lääbe Kreatuure
Wo numme so uff d`Freyhait luure.
Polymeri Ainhaitswääse
Wo alli Sprooche kenne lääse
Mit Plastikauge, Sulzerglänk,
Gummihoode – do hesch`s Gschängg.
Und Silikon fir all die Stelle,
Wo me-n-ippiger het welle.
Ohre, wo uff Myys dien lääbe
Ka me sich an Mölli glääbe.
D`Chirurgie kennt kaini Gränze
Si amputiere hit scho Ränze.
Organspänd isch e haiggel Thema
Bi dr Beschaffig fehn d`Problem aa
`s git z`wenig Daili uff em Märt
Drum hänn si so-ne-Huffe wärt
Und wie immer in so Fäll
Isch d`Mafia unwohrschynlig schnäll.
In Länder vo der dritte Wält
hoole die fir wenig Gäld
Milke, Lunge, Härz und Niere
Wo me bi uns duet implantiere.
Wo naime-n-uff eme-n-OP`s-Disch lande
Und ohni Lääbere dien verwache.
So sache dien die Gängschter mache!
– Ohni Läbere, kasch`s nit verschwyge,
Hesch Mieh, e rächti Wälle z`byge? –
Uff em Human-Ersatzdailmärt
Hänn Hirni bald der greeschti Wärt
Well der Wahnsinn schynts grassiert.
Der Bodemaa hett`s demonschtriert.
Däm sin, so wie-n-er ummemuult
D`Zälle raiewys verfuult.
Zwischefroog:
Het äggscht der Peter Boodemaa
friener emool e Hirni ghaa?
D`Medizin isch sicher wichtig
Und begränzti Forschig richtig
E jede wo-n-e Lyyde hett
Will uuse-n-uus em Granggebett.
Der Brys derfir, dä spiilt kai Rolle
Wenn`s sy muess, schepft me-n-uus de Volle
Doch wo isch d`Gränze vo der Ethik
Und isch es wirgglig dringend neetig,
Ass alli Mensche hundert wärde?
Stell dir vor: das Buff uf Ärde!
D`Menschhait wurd sich noodisnoo
Uff de Schaiche-n-ummestoh.
D`Granggekasse mien verdyre.
Au styge-n-alli unsri Styre.
Denn jede Maa und jedi Frau
Wett jo schliesslig AHV.
Bim Ränte-n-Alter achtesibzig
Frogsch di, isch das wirglig witzig?
Arbetsloosi meh und meh
(Kinder macht au kaine meh)
Bi däre Zuekumft, däre draischte,
Ka sich kain me Goofe laischte.
Undsowyter, undsowyter
Das Szenario dunggt is schytter
Me ka dailter Mainig sy
Iber Forschig und Chemie.
Iber Medizin und Getter,
Iber Spinner oder Spetter.
Doch ains isch sicher wie der Dood:
Wenn d Entwigglig wyter goht
Und mir d`Ibersicht verliere
Und`s ganz nimm kenne kontrolliere,
Denn isch em Doggter Franggestai
Sy Kreatur nimm lang elai!
Mir alli gehn mit em Franggestai und wytere Mediziner au no an
d`Ladärne-Usstellig uff em Minschterplatz. Kunsch au?
|
|