| Ummeblettere |
| Gumbb zeerscht in e Joor! |
|
Basler Dybli Stamm – Fasnacht 1992
600 Johr Vorbild
Säx Johrhundert Basel zämme!
's isch klar, ass mir's zem Aaloss nämme
zem e groosses Fescht lo styge
mit em Himmel voller Gyge,
mit Wirscht und Jubiläumstaler
mit Feschtbier - no wird di Suff fataler.
Villicht duet ain, kasch driber lache,
sich e baar Gedangge mache,
wie's im Momänt um Basel stoht
und wie's in Zuekunft wyter goht.
's Grooss-Basel het dr Lällekeenig,
doch's Mindere Basel steert das wenig,
die leen dr Wildi Maa lo danze.
Dä sait: "Hängget uns an Ranze,
ihr Bonze sin im Daig gebirtig,
myne Bligg sin ihr nit wirdig!"
Vo friener kunnt die Traditioon,
ass's wichtig isch, wo aine wohn.
No hit git's Lyt wo ranzig dien,
wenn si in's andere Basel mien.
Doch in dr Regel muess me saage,
ass sich alli guet verdraage.
und allewyl dien Feschtli mache
und härzhaft iber d'Zircher lache.
Dr Rhy isch lengscht kai Gränze meh,
Die kunnt erscht no-n-em Eglisee.
Sowyt also Guet und Rächt,
doch finanziell gohts Basel schlächt.
D'Unzfriidehait nimmt iberhand,
so flichtet d'Wirtschaft halt uff's Land.
Es stehnt dr Fiskus: "Sakramänt,
jetz stand i doo mit lääre Händ.
's ainzig wo-n-ys rette ka,
mr schliesse-n-ys de Rammle-n-aa."
Doch d'Baselbieter dien sich schwär
"Au wenn Lieschtel d'Hauptstadt wär,
wurde mir sicher nid riskiere,
eusi Souveräniteet z'verliere
und überhaupt: Mir wei dr Friide.
Vor Johre hei mir daas entschiide.
Me dankt für d'Aafroog, möchet's guet,
Mit Stetder hei mir nütt am Huet!"
Die kritisch Haltig isch bekannt
vom Baselbiet: "Nie mitenand!"
Doch d'Froog isch jetz, wie das söll go
Wenn d'EG kunnt, so no-dis-no.
Europa wird sich zämmedue
doch d'Schwyz stoht wider näb de Schueh.
Vo Brüssel us wird bald regiert,
in Bärn wird nur no reagiert
und gmacht, was uns die andere saage.
Es wird nit lycht sy, daas z'vertraage.
Es jaage-n-iber d'Autobahne
40-Tönner mit EG-Fahne
und unsri Hypochonder-Buure
joomere. Si sin z'beduure.
Ohni groossi Subventioone
wurdi 's Mälche nimme lohne.
Si vollfiere Schnäggedänz,
denn schliesslig gieng's um d'Exischtänz.
Dr Jean-Pascale Delamuraz
dä gryfft das psychisch ordlig aa,
är (das z'saage dieg em laid)
haig nur no an de Winzer Fraid.
E wytere Punggt wo Skepsis weggt,
isch, ass dr Schwoob sich nit versteggt.
Dr Kohl, dä hoggt am EG-Rueder,
doch traue duet em kain, däm Brueder,
denn schliesslig hett är unverdrosse
em aigne Volgg in Rugge gschosse.
Trotz Ehrewort und groosse Deen,
kasch gseh, wie d'Styre-n-uffe gehn.
Die EG ka-n-is Vordail bringe.
Me ka si sicher nit erzwinge,
doch wird's vermuedlig au nit goh,
wenn mir nur dien dernäbe stoh!
Dr Bundesroot waiss au nit rächt,
was isch Guet und was isch Schlächt
und losst sich, mr dien das lengscht scho kenne
nit steere und duet wyter penne.
Syg ehrlig, saag, was wottsch erwarte
Vo unserem dyrschte Kindergarte?
Mir Basler mache-n-eych, 's isch wohr
als ainig Velggli ebbis vor.
Bi uns do losst me jeede lääbe
und drampt au ain emool dernääbe
denn duet me-n-em das heeflig saage
und paggt en nit grad an sym Graage.
Esoo sott's au in Zuekunft blybe!
Diend Eych das hinder d'Ohre schrybe.
Ybrigens:
Bi uns kenne Männli und Wybli pfyffe lehre
Hesch villicht Inträssi draa,
Lyt doch em Leo Roth grad aa.
Tel. 711 24 40
Gang an d'Ladärne-Uusstellig uff em Minschterplatz.
|
|
