Basler Dybli Stamm – Fasnacht 1989
Kai Idee? - EGALidée - Jubilé!
Im ene Sääli, aifach naime,
drifft sich d'Clique, fascht im ghaime.
E Sujet will me ums verworge.
speeteschtens bis morn demorge
muess me fir ains ainig syy,
d'Fasnacht isch jo au scho glyy.
Das git Grampool, grad wie sich's gheert,
kaine dänggt und jede schneert,
e hailloos Gnusch, es isch zem Gryyne,
do schiebt sich ain zer Dire-n-yyne.
Mit Mieh ka-n-är dä Huffe gschwaige,
frogt si, was si z'händle haige;
kai Antwort kunnt, 's blybt myslistill,
me loost, was är no sage will.
E Sujet z'bstimme, so dängg äär,
syg halt all Johr wider schwär,
was hit so gschäch, syg nimm zem Lache
und sich dodriber luschtig z'mache
syg verfählt no syner Mainig;
do isch d'Clique mit ihm ainig.
Är netzt sich jetzt gschwind d'Kehle-n-aa
ass är wyter reede kaa:
"Y mecht e bsundre Vorschlag bringe,
eych z'iberzyge soll mer glinge -
sunscht kai Frind vo Mathematik
ha-n-ych mit Zahlenakorobatik
vo Nyt zerscht zwanzig subtrahiert,
dernoode fimf derzue addiert,
gwiis muess is nimme exbliziere,
mer kennte das Johr jubiliere!"
Nadyrlig - kennt's au anderscht sy? -
es stimme nid grad alli by,
es fählt däm Dail wo rächne duet
no "Adam Riese" schlicht der Muet,
's erglärt ain, die Idee syg sindig
und zwor mit folgender Begrindig:
"Alles was es git, das isch esoo,
muess jo zerscht emol entstoo,
syg's läbändig, doot, abstraggt,
vor erschte Stund aa wird im Taggt
jede Schritt genau notiert
und im Rhytmus jubiliert.
All fimf Moonet oder Johr,
(zem Dail au all fimf Daag, 's isch wohr)
findet e Jubelaloss statt,
das Gschyss ha-n-ych jetzt langsam satt.
Es sin doch - im Verglych zer Zyt
wo's d Wält git - e baar Jeerli nyt!
Das isch jo, wirft e-n-ander-n-y,
ebbe grad der Witz derby.
Es maint jo hit e jede Gloon
so Aigeloob haig Dradition
und 's Comité däts eschtimiere;
meh Batze gäb's fir 's Jubiliere
(so wird der Dradition zem Trutz,
Geburtsdaag gfyhrt nur wäägem Stutz).
Verlosse vo de guete Gaischter
isch sogar der Seggelmaischter.
Dä Batzeglemmer hofft im Stille,
sy Buebedraum wurd sich erfille,
är het im Kopf scho iberschlage:
me miesst kai gweenlig Gossdym draage,
's meeg d'Kasse ains uus Samt und Syyde
das Johr scho no grad verlyyde.
Und derzue, beschliesst der Walti,
laufe Jungi - Stamm - und Alti
à la mode de VauKaBee
im glyche Glaid am Défilée!
Hänn mir das neetig dääwääg z'due?
Nai, mir hänn im voruus gnue,
mir wänn esoo nit jubiliere,
dien e-n-andre Wäg probiere
und hoffe, ass Ihr rächt versteen:
MIR sin nur drey Daag lang d'Gleen
Wenn e Dybli frogsch: Hesch 's Gfyhl
Fimfezwanzig Joor sinn vyl?
Sait äs: Nai, das wäär vermässe,
Soone Fescht kaasch glatt vergässe,
's isch e Marschhalt nur, e nätte!
Und denn duet's im Stille bätte:
Gäll, Frau Fasnacht, bitt scheen bitt,
Mach, ass' uns no rächt lang git!
Drotz Jubileumsfyre driffsch is an der Ladärne-Uus-
stellig. (Fasnachtsmäntig zoobe bis am Mittwuch de-
morge, sygs uff em Minschterplatz oder in dr MUBA)
's Delifon 183 sait gnau wo 's isch.
|
