Basler Dybli Jungi Garde – Fasnacht 1989
Was mainsch, dää Flohn:
25 Johr dr Gloon!!
(Mir Junge sin zwor erscht 10)
Liebe Lääser, stohsch jetzt am Stroosserand
Und zwyflisch womeeglig am aigne Verstand?
Was het au e Gloon mit däm Süschee z'due?
Gäll, die Froog bloggt Di und losst Dir kai Rueh!?
Gwiis hesch scho vermuetet und Dir dänggt
Ass es mit em Jubileum zämmehänggt.
Aber wie und wiso lychtet Dir nit y.
Zem's begryffe muesch aber kai Hälle sy:
Am Cortège wird als Gloon marschiert,
Will dä so träffend symbolisiert.
No unserer Mainig isch d'Assoziation
Zue "freywillig Schaffe" ebbe-n-e Gloon.
(Aber lang nit alli, eb Maa, eb Wybli,
Sin Arbetsdier doo bi de Dybli).
Fescht stoht: D'Fasnacht hätt nimm vyl z'lache
Wenn kain mee wurd dr Gloon go mache.
Und wurd kain mee dr Gloon fir d'Madame spile
Miestisch in dr Regio no Ersatz go schile.
Iibrig blybti am Änd numme no dr Karneval
Dä vo Mainz, wo singt und lacht, und Masggeball!
(Und dä Bruch no Basel z'importiere
Hänn 's letscht Johr scho-n-e baar welle probiere.
Fascht hätt's de Gnuschti welle glinge
Dervo ka dr Schoellkopf e Liedli singe!)
Die grässlig-abscheyligi Horrorvision
Isch fir 's Schaffe die ideal Motivation.
Also fiere die Gleen ohni dummi Schnure
Fir d'Fasnacht jede-n-Ufftrag dure:
Zem Bischpyl bim Requisit-Konstruiere,
Ladärne-Spanne, -Laggiere, -Montiere.
Au das muess dr no under d'Nase rybe:
Glych lauft's au bim Zeedelschrybe!
(Und 's git, gwiisermaasse als Alibiaktion
Spezialgleen fir d'Süscheekommission.)
Und wenn me ebber bruucht zem Goschdymnaie
Nimmt me aifach d'Mammene uus unsre Raie...
Zämmefassend waiss ych bschaide z'brichte:
Uff uns Gleen ka kai Clique verzichte!
Zue Läbzyte aber griegsch nyt gschänggt,
An so Gleen wird erscht bim Jubiliere dänggt.
Die Idee isch glych genial wie billig,
Das muess Y zuegäh (wenn au widerwillig!).
Du kasch villicht iber so Gleen numme lache,
Will Du sälber kai Fasnacht duesch mache
Liggsch mit däre Aasicht aber dernäbe:
Dr Gloon spilsch au Du - im Alltagslääbe!
Sag, wie stoht's mit Verwandte, Bekannte,
Kollege, Nochber, Unggle-n-und Dante?
Die, wo D' greylig findsch zwischedure
Und glych dr Gloon machsch ohni z'Mure...?
Uus guetem Grund het aber kain dr Maage,
Dir fräch "Gloon" in's Gsicht go saage.
Vo soo aim ka me nur profitiere,
Drum will me Dii, Gloon, nit verliere.
So-n-e Gloon syg halt aifach unentbehrlig,
Gstoht 's Dante Trudi mir ganz ehrlig...
Du machsch ere Bsiechli, wo Dir stingge,
Bringsch em Unggle d'Anit-Rheuma-Fingge,
wenn är gmietlig vor em Färnseh hoggt.
Und falls en trotz Fingge 's Rheuma bloggt,
Machsch Essigwiggel, probiersch's mit "Chemie"
Holsch dr Bringgmaa fir e Schlamm-Therapie.
Em Grossbabbe hilfsch dr Raase stutze,
Em Gotti z'Rieche duesch d'Fänschter butze,
Dernoo hilfsch en Schangi sy Waage wäsche,
Dr Grossmamme draisch Du d'Ykaufsdäsche,
Zem Schluss tapeziersch dehaim no d'Wänd.
Bref: D'Gloonerie nimmt und nimmt kai Änd!
Gib's zue, Du benimmsch Di numme-n-esoo,
Will uff kai Fall Dii wottsch enterbe loo!
Ych glaub, Du hesch 's Gloon-Prinzip kapiert,
Au ass es iberall guet funktioniert!
(Vom Bruefsläbe wämmer iberhaupt nit reede,
Wie's dert lauft das waiss wohrschynlig jeede)
Zuegää: 's Gloon-Läbe isch kai Schlägg,
Doch schläggt das kai Gais ewägg:
Als Gloon spiilsch dr Dubel rund um d'Uhr,
Derfir hesch e freehligi Natur!
Wenn e Dybli frogsch: Hesch 's Gfyhl
Fimfezwanzig Joor sinn vyl?
Sait äs: Nai, das wäär vermässe,
Soone Fescht kaasch glatt vergässe,
's isch e Marschhalt nur, e nätte!
Und denn duet's im Stille bätte:
Gäll, Frau Fasnacht, bitt scheen bitt,
Mach, ass' uns no rächt lang git!
Wurdsch gärn drummle oder pfyffe lehre, dernoode
mäldsch Di am beschte bim Obmaa (Tel. 43 82 71
zobe noo de siibene)
An d'Ladärne-Uusstellig sottsch nadyrlig au no goo.
's Delifon 183 sait Dir gärn wenn, wie und wo!
|
