Basler Dybli Alti Garde – Fasnacht 1989
Mr mache sit 25 Joor dr Gloon
"Drei Joor Gartezwärgli-Glygge!"
Wenn das heersch, griegsch graad e Bygge.
Winzling vo Geburtsdääg sinn
Coram publico nit "in".
"Fimferli machsch uff dr Drummle!"
Heert me 's Comité als brummle.
"Fimf Joor Happy-Birthday-Gschpässli!
Goht's eych no?" frogt 's Imbergässli.
Hesch dr Rädäbäng scho glääse?
Mänggi Grubbe macht e Wääse
Wääge-n-em Dezennium.
Alti Haase nämme's grumm.
Wenn si fimfezwanzig wääre,
Wurdi niemer sich beschwääre.
Oder fuffzig. Oder meh!
Ych dängg doo an d'Vaukabee.
Hitte hänn au d'Basler Dybli
(friehner ohni, jetzt mit Wybli)
Juubileeum: "Fi, fa, foo,
Aber nit in Rääge koo!"
Fimfezwanzig Morgestraich!
Valium und grydeblaich.
Fimfezwanzig mool e Bummel!
Drummeli und GV-Rummel.
Fimfezwanzig mool e Zug!
Quer dur's Fägfyr, ohni Lug.
Ääne, dääne, du bisch duss:
Dausig Värs vom Pegasus!
Fimfezwanzig Aladin-
Wunderlambbe, stargg bis fyn!
Und im "Stäärne" in dr Aesche
Het die erschti Fyr sich gwäsche.
Nancy, Chalon (Franggrych Oscht);
D'Glyggezytig "Diggi Boscht";
Ständeli und Bunti Eebe;
Hundsverlochete: ain heebe!
Fimfesibzig Fasnachts-Dääg!
Und mir allewyl no zwääg.
Und ass nit dr Stamm nur laufi,
Kunnt die Jungi-Garde-Daufi.
Fir die eltere Semeschter,
Wo hitt pfyffe als wäär's geschter,
Und wo ruesse, ass es gracht,
Wird die Alti Garde gmacht.
Fimfezwanzig Joor lang Gloon
Mit em Senior, Babbe, Sohn!
Well mr hitte zämme gehn,
Simmer: 120 Gleen.
Kain isch stolz uff unser Bstoh.
D'Hauptsach isch: Mir sinn no doo!
Alli wisse, au die Neie,
Wie schnäll ebbis kaa verheie.
Hänn mir 's Gligg ebitzli gleast?
Was d'Frau Fasnacht uns erwyst,
Isch drotz Pflänz und Schnäggedänz
Hitt: e dolli Reveränz.
Wenn di aine ständig blogt
Und di allewyle frogt:
"Hesch das bschaide Schüübilee-
Ziigli vo de Düübli gseh?"
Denn saisch zu dääre Kueh:
"Loss mi doch emool in Rueh,
's fyre nur die dimmschte Kälber
's Goldig Kalb – vulgo: sich sälber."
1964 Basler Dybli 1989
Wenn e Dybli frogsch: Hesch 's Gfyhl,
Fimfezwanzig Joor sinn vyl?
Sait äs: Nai, das wäär vermässe,
Soone Fescht kaasch glatt vergässe,
's isch e Marschhalt nur, e nätte!
Und denn duet's im stille bätte:
Gäll, Frau Fasnacht, bitt scheen bitt,
Mach, ass' uns no rächt lang git!
D Ladärneuustellig ka vom Mändig znacht, am 13. Hornig,
bis am Mittwuch demorge, am 15. Hornig, bsuecht wärde. Si
findet je nach Wätter in dr Muba oder uff em Minschterblatz
statt. Uuskunft gits Delifon Nr. 183 ab Fasnachtsmändig am
Zwai zmidaag.
|
