| Ummeblettere |
| Gumbb zeerscht in e Joor! |
|
Basler Dybli Stamm – Fasnacht 1981
's Debaggel Dalbeloch-Speggdaggel
Hokuspokus, y bi duss
E Million verschwindibus
Es grient d'B-80 grienspohn-grien
Und wirbt broschüüredigg und kiehn
Fir dausig Underhaltigssache.
Doch vyl isch gar nit durebache
Und 's keyt drum uff dr Dalbe-Schanze
E ganze Zirkus uff e Ranze.
Areene hänn in Basel sunscht
E guete Ruef, doch hänn kai Dunscht
Kai blaue – laider – die, wo deerte
Am Faade ziehn, am ganz verkehrte.
Es isch zem Abseggle – 's blybt kaine.
Und au dr Leu zieht schliesslig Laine.
Wie d'Artischte me verhaizt
Het aim fascht zem Hyle graizt
Im Dalbeloch herrscht Greessewahn:
Me hoolt uus New York d'CARAVAN.
Au d'GRUPPO DI BRASILIE
Syg guet fir dausig Billieh.
Und d'Peking-Oper DSCHU-DSCHIN-DSCHAU
(Du kennsch die Katzemuusig au!)
Isch usser Rand und Viererbandi:
"Kontlaggt geblochen, gloosse Schandi!"
Me wurschlet bis zem Wurschtsalaat.
Im Dalbeloch haisst's desperaat:
"Mr zaige jetzt e Peep-Show, Lyt,
Er sehn doo 's blutti Defizyt."
Herr Diräggter Ueli Hirzel
Zircher Pfau mit Änte-Birzel
's längt kai Sau, wo Näppi haisst
Und kai Gay, wo Mässer schmaisst.
Au nit Glöön, wo immer lache
Und wo niemer z'lache mache.
Und kai Muulkorb-Bäär, wo bysst.
Und e kain, wo Journaux rysst.
Und kai Hindli und kai Gans.
Und kai Dybli namens Hans.
's bruucht dää Zirkus Aladin
Halt e-n-andre Paladin.
Nimm e Spannier, Dschingg, e Dirgg,
Nur kai Zircher Chef du Cirque!
I bi nit Voogel und nit Fisch
I bi-n-e Zirkus-Trans-Fetisch
Me maint, mit "soonige" kenn nyt bassiere,
Mit Fraue byschbylswys, wo sich rasiere.
Mit Männer, wo statt Waggis-Graage
Lieber numme Raizwesch draage.
Wääge Trans und andere Vestite
Kääme Glischteler vo baide Syte.
Drum gheeri Schmuseligs vo äänedraa
Ganz sicher ins "Casino Saint Alba".
Me drybt mit Seele-Stiptease Wuecher
Und speguuliert – vergääbe-n-allerdings – uff Bsuecher.
Bim Nelson fillt sich 's Bortmeneh mit Gäld.
Was sich nit fillt, isch aber 's Zält.
Siber, Siber an dr Wand
B-80-Loch, es isch e Schand
Dr Brofässer Marcus Siber
Sammlet Noote-n-und Fimflyber
Und mecht mit däm Bulver stopfe
's Dalbeloch. Doch Malz und Hopfe,
Armi Moore, isch verloore
Und dr Siber griegt an d'Ohre.
Haile kaasch sy Gältigsdrang
Und B-80-Iberschwang
Aigetlig – i saag das kiehl –
Nummeno im Haasebiehl.
Deert kuuriert me noch und nöcher
Morbus-Plaitus-Arschilöcher.
Panem et Circenses
's gscheht 'ne rächt: Jetzt hänsis!
Hungerkingschtler rette d'Schau.
Hungere dien d'Dierli au.
Me duet bättle-n-und duet sammle.
Und 's Konkursamt duet verrammle
Zält und Wääge, konfisziert
(Gläubiger hänn's duregstiert)
's Fyr und au dr langi Seebel.
Und i froog jetz wie dr Heebel:
"Wäägerli, waas soll dää ässe
Wo das gschluggt amme-n-und gfrässe?"
Hermin', du griegsch Kit-e-Kät!
Nid d'Frau Haegeli - 's Leuli, 's nätt.
Fortwährend Anfang – Fortwährend Beginn
Nonstop nonsens – das hämmer im Sinn
D'B-80 sy dschuld und denn no 's Wätter.
Und dr Plaitegaier - 's wird allewyl nätter.
Und die Schoofseggel syge-n-aifach nit koo.
Und d'Gauggler stienge mit gwäschnem Hals doo.
Und Kultuur schryb me z'Basel sowisoo numme glai.
Das miess jo veregge, das wiss jedes Bai...
– Halt, liebi Zältler, soo goht das mitnichte!
Jetz kemmet Er bletzlig vom Zirkus ins Dichte.
D'Moraal vo däär bleede-n-und saudumme Gschicht:
De kaasch halt nyt starte, wenn nur bisch e Wicht.
De kaasch nit uff d'Bai und ins Zält ebbis stelle,
Wenn nit ohni Netz Du uff Zäh hesch gleert zelle!
D'Ladärne-Uusstellig findet in dr Muba-Halle 6 statt und
zwor am Zyschdig vom Nyni demorge bis am Elfi znacht
am Mittwuch zuesetzlig vom Nyni bis am Elfi demorge.
|
|
