| Ummeblettere |
| Gumbb zeerscht in e Joor! |
|
Basler Dybli Stamm – Fasnacht 1978
Dr Wolf und die sibe Gaissli
Groossi Glygge, die sin mächtig.
Ihri Zig sin lang und brächtig.
E Picasso moolt d'Ladärne.
Und me sait sich Si im "Stärne".
Obmaa wärde kaasch nur wenn
Doggteriert hesch. Hegschtens denn!
Y gang zem Lotz – sait soone Heer –
Mit ihm go reede. Läng mer 's Gwehr!
D'Mafia vo dääne Glygge
Het uff glaineri e Bygge.
Und si findet 's Drummeli.
Bleed und dumm bis dummeli.
Well si muess pausiere amme.
Schaad, by soome Babbe-Mamme!
Liebe Doggter Hotzeblotz
Die wänn nur Dy Monschter-Glotz
Well si glaube, 's drai sich alles
Numme um dr aige Dalles
Spanne gschwind die greeschte zämme.
Mir verzichte doo uff Nämme.
In dubio por ybidumm:
Olympus, bebbi vaukabum.
Well immer Zwaite machsch bim Dängge
Peeter, hilft me Dir bim Rängge
D'Mafia maint, dr dummi Peeter
Mergg das nie oder erschte speeter.
Und si schyre und si mache
Bis är heert dr Sässel grache.
Denne kunnt sy Glanz-Idee:
Glaini Glygge haisse "B"!
Peeter, sottsch nid uff die loose
Griegsch dr Bolle suscht in d'Hoose
Wäär an dr Fasnacht 's letschti Johr
Z'glai gsi isch, dää losst jetz Hoor.
Wäär nid 15 Maa mit Drummle,
15 Pfyffer ohni z'bschummle
Gha het, isch nümm Stamm-Verain.
Und ans Monschter darf er kain.
Uff d'Pensionierig aane wotsch
Ass kaine sait, De sygsch e Dotsch
Sibe Glygge sin bedroffe
Im Heer Lotz ins Offside gloffe.
Doch denn hän die "glaine" Sibe
Ihm veraint dr Bummi gribe.
Siebene auf einen Streich.
Dr Draum isch uus. Was blybt isch Saich.
"Gopferdeggel!" schreyt do 's Ella,
"Dasch e Salto mortadella"
Die Sibe-n-Uffrächte hän gstritte,
Als wääre si vom Deyfel gritte.
Die sibe Schwoobe, sibe Zwärgli
Hän Bärg versetzt und nid nur Bärgli.
D'Gaissli hän verschluggt dr schlimm
Peeter, vulgo Isegrim.
"Peeter und dr Wolf", vom Chef
Dasmool nit vom Prokofjew
Am Schluss hän butzt die sibe Kooge.
Dr Lotz, dä het dr Schwanz yzooge.
Sunscht hätte mir in unsrer Noot
s verrüggtisch gemacht, wo numme goht:
E Monschter fir die glaine Sibe,
E-n-aigni Kupfrigi verdribe.
Dr David sait zum Goliath
Y glaub, Herr Lotz, Si sin schachmatt
D'Quintessänz vo dääre Metti:
s het Substanz koscht ganz e Schwetti.
Blibe-n-isch, ass alli "Stamm" sin.
s git kai "A" und 's git kai "B" drin.
Subvention griegt jeede glych.
Me darf ans Monschter – fyhlt sich rych.
Au d'Mafia sott 's Bäärefäll
Erscht noo-n-em Blattschluss daile, gäll
Und jetzt d'Moraal vo dääre Story
(Es isch kai Määrli, 's isch e wohri):
D'Frau Fasnacht, das isch 's O and A,
Kaasch aifach nid zem Naare haa.
Und suechsch uff "Comité" e Raim,
Probier's emool mit "Altershaim".
Und fir dr Peeter wär jetzt gnau
Dr Zytpunggt doo fir d'AHV
Y bi froh ass niemer waiss,
Ass ych Giftzwärg-Dybli haiss
D'Ladärne-Uusstellig findet in dr Muba-Halle 8 statt
und zwor am Zyschdig vom Nyni demorge bis am Elfi znacht
und am Mittwuch zuesetzlig vom Nyni bis am Elfi demorge.
|
|
