| Ummeblettere |
| Gumbb zeerscht in e Joor! |
|
Basler Dybli Stamm – Fasnacht 1974
Hundert Johr Basler Zolli
Vor genau aihundert Johre
Het dr Doggter Bischoff gschwoore,
's miess e Basler Zolli aane
Mit Giraff und Paviaane,
Störgg und Lämmergaier, Raabe,
Plus modärnem Bääregraabe,
Jagdschlessli fir Reh und Hirsch,
Ass de mainsch, sygsch uff dr Pirsch.
Muusigpavillon-Konzärt
Mit Dschingbumm, es het kai Wärt.
Euleburg und Baiz mit Gweih
(Syner Zyt e Gääg und nei).
Roschtigi Fasanerie!
Drotzdäm goht kai Bulver y.
Dryssig Johr blybt das e myse
Zolli voller Not und Kryse.
Doch bevor er ganz verdorbe,
Sin denn gstopfti Genner gstorbe.
Und die hän zem Erb ygsetzt
Unsre Zolli, wo me schetzt.
's het Legaat und Fonds und Goobe
Gää vo Schwyzer und vo Schwoobe.
Hoch, wie Säxer imme Lotto!
Fascht e weeni noo-n-em Motto:
"Wär rych isch, stirbt uus Heefligkait,
Der Zoo-Diräggter het das gsait. "
Der Verschwändnagel fiehrt y,
Ebbis wie-n-e Circus Knie.
Und är hoolt mit vyle Speese
So-n-e Kraal voll Singhaleese.
He (diger), dr näggschti Boss,
Setzt sich gly uff's hoochi Ross.
Doch no heecher, sait me, sygy
Dä, wo spilt die erschti Gygy.
Haini, machsch e Motsch und Molli
Und verzichtsch uff unsre Zolli.
Nyn Johr het me – wieschti Choose –
Dir dr (Ziri-)Marsch halt bloose.
Dorum findsch dy Job, dy neue,
By de Säxilyte-Leue.
Hitte-n-isch dr Schlang am Rueder.
Und es spritzt e fuule Brueder,
Aer syg nur Brofässer worde
Mit sym Gross-Gorilla-Orde,
Well im Goma är haig amme
D'Bruscht gää wie-n-e Affe-Mamme.
Ehredöggter sin – jo wääger –
Gscheyti oder Affepflääger.
D'Schuehschnääbel – wird aanegschribe –
Het dr Fingge-Bally gribe.
Und 's Vivarium – doo lyt's –
Stammt e bitzli vo dr BIZ.
"Muusfäld" stoht im Affehuus.
Rysst är's ab? Kunnsch du doo druus?
Ass kai Bangg het Eesel gschänggt,
Wo an d'Börse-Kunde dänggt!
Aber 's Pissoir koscht zäh Rabbe.
Dorum git de Fils dr Babbe
Gly e Frangge bar uff d'Hand:
"Zum Verschiffe mitenand!"
's isch e Garte voll Verböttli,
Sait e kaibe Lumbbegröttli:
Achtig, Dienschtwääg! – Bääre springe!
Please be careful! – Dien nit singe!
Dire zue, mir dien do haize!
Kaini wilde Dierli raize!
"Jo nit fiettere!" rieft dr Babbe,
Denn es kunnt ain mit dr Kappe.
"Hän Si Zugger?" frogt dä schlimmi
Wärter. – "Sit de Spritze nimmi",
Sait dr Megge und kaut sälber
's harti Broot statt d'Wisentkälber.
Will e Grossfamilie yne,
Wird das dyr, so will's mir schyne.
Nur Studänte-Proteschtierer
Kemme billiger ze Dierer.
Bisch vom Blebs, gohsch still an d'Kasse.
Aber d'Dalbaneese passe:
Die vom Daig wähle – y saag! –
Johann Beck, dy Ehredaag.
Und im Schwarzwald oobe loobe
Unsre Zolli zoobe d'Schwoobe.
D'Waggis kemme mit vyl Buss
Und mir hän kai Blatz und Gnuss.
Die im Nylpfärdhuus dert ääne,
Das sin Zircher, wo dien gähne.
Unsri Zolli-Wääg – sans doute –
Wachse wie-n-e Fasnachts-Route:
Vita-Parcours "Brähms Dierlääbe";
All baar Schiss e Woog dernääbe.
Luegsch verschwitzt uus dyner Wesch,
Ob scho wider abgnoo hesch.
Sit dr Grindig sin vyl Sache
In dr Wält nimm durebache:
Anti-Gnepf draisch hit statt Roose.
D'Maitli Sammetmännerhoose.
Statt em Jupe e Ländeschurz;
's aint isch z'lang und 's ander z'kurz.
Nixon haisst hit: Bänder-Zehrig.
Bille nimmsch geege Vermehrig.
Maa im Mond, bisch nimm vom Heebel.
Jura libre, schlyfsch dr Seebel.
Hit bisch ohni Grubbe-Sex
Und au Porno "out" und "ex".
In där Zolli-Nostalgie
Dänggsch, wie gruusig ass dr Rhy
Amme het bedröölelet.
Hit wärsch froh: Er öölelet!
Sic transit gloria pfundi.
Multos annos gehn vor d'Hundi.
Was is aber immer blybt, das isch die dolli
Lange-n-Erle-n-im Quadraat: Dr Basler Zolli!
Am Fasnachts-Zyschdig goht me-n-in dr
Halle 8 an d'Ladärne-n-Uusstellig. Si isch vom
Nyni demorge bis am Elfi z'nacht offe.
|
|
