letschti Änderig: 2014-05-30 22:57:25 +0200
Home   

Vo vergangene Zytte

Linie
AGGDUELL KALÄNDER KONTAGGD ZYTTIG ARCHYYV MITMACHE
Linie
STAMM JUNGI GARDE SCHWELGER ALTI GARDE KÄLLER MITGLIIDER
Linie

 Ans Ändi
     

E Bindel Basler Dybli Fasnachts-Zeedel

Iiberbligg
Status
 
Ummeblettere
Gumbb zeerscht in e Joor!
 
Gumbb in s Joor ...
2014   2013   2012
2011   2010   2009
2008   2007   2006
2005   2004   2003
2002   2001   2000
1999   1998   1997
1996   1995   1994
1993   1992   1991
1990   1989   1988
1987   1986   1985
1984   1983   1982
1981   1980   1979
1978   1977   1976
1975   1974   1973
1972   1971   1970
1969   1968   1967
1966   1965   1964

Basler Dybli Stamm – Fasnacht 1972

D'MÄSS-MÄSS
Mr kreiere e Inter-Fair fir Fachmässe

Basel het – 's merggt's jede Gnoche –
Mäss-Bluet gschläggt und Mäss-Bluet groche.
D'MUBA däät de maischte gniege,
Doch dr Bebbi muess sich fiege,
Denn es goht um d'Interässe
Vo de Fach- und Inter-Mässe.
Und drum stampft me, ums Verroode,
Allbott aini uus em Boode.

Und me suugt sich uus de Finger
ITMA-, MEDEX-, SWISSPACK-Dinger,
INTERFEREX plus DIDACTA.
Sin si umme-n-und ad acta,
Macht me ILMAC und IGEHO.
Und druff aabe denne au no
INEL, NUCLEX und dr Start
Vo dr Pop- und Kitsch-Mäss ART.

IFM zaigt Fördermittel,
IPHARMEX im wysse Kittel
Alles Apideegger-Sämpf
Und PRO AQUA Umwält-Grämpf.
Speeter macht mit grossem Stolz
D'Schrynerey e Fachmäss HOLZ.
Denne findsch vor luuter Krääne
Und well d'Baggerschuufle gähne

D'BAUMASCHINEMÄSS fascht nimme.
Und zem Kaviar, däm schlimme,
Kaasch druff in dr MUBA usse
Wodtka suuffe by de RUSSE.
No dr SURFACE (Oberflechi)
Folgt – fir die ha-n-ych e Schwechi –
Schnäll IMABA und denn sehr
Rasch d'HIT- oder PROFIT-FAIR.

Aini findet nie e-n-Änd:
D'BAUMÄSS – die daagt permanänt.
Und scho sehsch die alte, raare
Sache vo de-n-ANTIQUARE.
Druff wird's jedem wider wohler:
's kunnt e Mäss fir GIPSER, MOOLER.
Und wenn mainsch, jetzt haig me's ghaa,
Foot dä Saich vo vorne-n-aa.

D'Mässe haisse-n-immer glych.
's wärde-n-au die Glyche rych!
Immer gehn die glyche-n-Affe
Wäägem glyche Mischt go gaffe.
's ainzig, wo sich ändre duet,
Das isch d'Johrzahl – griegsch e Wuet.
Futsch isch Malz und futsch isch Hopfe:
D'Mässe dien is d'Stadt verstopfe.

Hotelzimmer findsch e kaini
Und au Uushilfsgreft nit aini.
D'Parggmyseere stinggt zem Himmel.
Und im Drämmli griegsch dr Schimmel.
In de Baize frisst me Schicht.
Und wenn di dr Haaber sticht
Und de hätsch uff Schäbbe Gluscht,
Findsch kai Blatz im Cafi Bruscht.

Mir hän 's ganzi Johr nur Mässe.
Drum goht d'MUBA nimm. Vergässe!
Doch es fählt is – ohni Späss –
Immer no die wichtigscht Mäss.
Dass si an dr Faasnacht laufi
Heebe mir si uus dr Daufi.
D'MÄSS-MÄSS zaigt – de muesch nit lache –
Was fir Mässe no kenntsch mache.

Sehsch vo de Regglaame-Gselle,
Was fir Ständ me uff kennt stelle:
Gärschter, Bleedlinger und Pfludder
Und dr Zutter und dr Hutter
Zaige dir fir fimf Stai bar
Grafik-Inzucht (L'art pour l'art).
Ain isch nit ganz afflerbache:
Moolt 's ganz Johr nur Faasnachts-Sache.

Doch dr Fürscht git sich perverser:
Macht e Stand mit Kelim-Perser.
's Mäss-Plakat – e Plaite-Gaier –
Stammt vom Leupin, nit vom Maier.
Ass dr Schnulzbi MÄSS-MÄSS-Mogge
Paggbabyr moolt, duet di schogge.
Vor de Stitz dien si, wie Wiener,
Gratzfiess mache-n-und dr Diener.

Suscht kaasch, wie an andre Mässe,
Deguuschtiere-n-und au frässe.
Und es git uff jede Fall
Vo de-n-Uussteller e Ball.
Miss MÄSS-MÄSS wird so-n-e Rehli
(Minu, kennsch si?) uus dr Hehli.
D'Stadt isch wider nit rächt zwääg
Und goht fremd fir vierzäh Dääg.

Jetz isch fertig mit em Gspasse,
Suscht duet d'MUBA-Mieti-Kasse
Dur em Walthard syni Gselle
No fir d'MÄSS-MÄSS Rächnig stelle.
Und au 's Comité – oh Clou! –
Mecht e Buschle Passepartout,
Well dr Lotz gärn wott probiere
E FAASNACHTS-Fachmäss durezfiehre.

Und es isch dorum au z'hoffe,
Ass dr Kienbi nit isch gloffe
Uns ins Offside, denn dä Boss
Vom Drey Keenig und vom Tross
Bluemeverain-Verkehrsverain
Briehlt suscht: "Gutzi, Gutzilain!"
Und denn wääre mir am Arsch:
"Gutzi, MÄSS-MÄSS, vorwärts, marsch!"

Am Fasnachts-Zyschdig goht me-n-in dr Halle 23
an d'Ladärne-n-Uusstellig. Si isch vom Nyni demorge
bis am Elfi z'nacht offe.
 An Aafang

(C) 2002-2014 Basler Dybli Glygge