Ummeblettere |
Gumbb zeerscht in e Joor! |
|
Basler Dybli Stamm – Fasnacht 1969
Soll y oder soll y nit? D'Widerverainigung
Wenn 's Land und d'Stadt dien zämmekoo,
Dno sehn das d'Basler Dybli soo:
Me duet ain vo de Basler Senne
Im Dienscht mit Ehrige verwenne.
Er muess im Lauch e Front abschrytte -
Zem Glygg nur dschumbble-n-und nit rytte.
Er pfyfft uff Gin änd pfyfft uff Tonic
Und dänggt: Die kenne mi schynt's noonig.
E Hand im Sagg und kai Grawatte,
So stelzt dr Luuggi iber d'Matte
Und wird - vo Scheenebuech bis Ammel -
Dr erschti Basler Buure-Rammel.
E Bann-Daag z'Basel! Heersch sy drummle,
Wenn si dur's Gundeli dien bummle
Und uff em Määrt e Mai-Baum setze
Zem Arioli sym Ergetze?
Und uff dr Pfalz bim Fraue-Beedli
Schlehn Oberwiler Fungge-Reedli.
Dr Monschterbilljeh-Vorverkauf
Isch im Nusshof. Dr Aierlauf
Isch in dr Gärbergass. Bim Koscht
Verkauft e Baasaar Buttemoscht.
Und d'Rootstaab-Glygge - ai dr Potz! -
Die schrybt e Brief an Peter Lotz.
Si welle jetz au Subvention,
Sunscht mieche si niemeh dr Gloon;
Und 's Kien-Fyr gheer an Morgestraich;
Und Abmarsch-Ort syg: Grummi Aich.
"Mir chööme ganz grooss uuse hüür
und pfyffe 'd'Britte' mit vill Gspüür,
Denn d' Freie-Strooss het lang gnue zangget
Und glitte-n-an dr Änglisch' Grangget."
D' Frau Kechli in der Dalbe-n-usse
Briehlt: "Maa, y glaub es kemme d'Russe!"
Doch dää sait: "Schuuggi kumm's go gniesse,
By Furgets isch e Hochzyts-Schiesse."
Dr Manz macht Määrli hampflewys
Und griegt drfir dr Hebel-Prys.
Und ass au 's Basler Dramm rentiert
Wird's uff dr Aschp-Hof uffegfiehrt.
In d'Haaseburg gohsch wägem Sekt,
Will äär wie Ziegelhoof-Bier schmeggt.
"E Groossrichter, dää bruucht nit au
E groosse Richter z'sy" sait d'Frau
Vom Alfons Burget in dr Hard
Bim Bummel zue dr Body-Guard.
Und d'Nazy kunnt nur no am Frytig
Als Bylaag vo dr Lüdi-Zytig.
Dr Kluuser und dr Schlipfer git
E Graft- und Tonic-Wy-Verschnitt.
Wenn's gracht isch das kai Gwitterli,
Nur 's Rhyfescht uff em Gitterli.
Und 's Gryffe-Mähli - 's deent fascht gspunne -
Isch z'Buggte-n-amme-n-in dr "Sunne".
Die neye Grytte vo dr Schmir,
Die siize nimm, die saage: Ihr!
Und d'Bolizeygehilfe stehne,
Will mir uff Buus si dien vertlehne.
Fir d'Kääserey mecht Diegte gäärn
E-n-affierbachsche Wienachts-Stäärn.
Dr Dirematt spilt - 's isch fascht zvyl -
Sy Shakespeare-Stiggli z'Raigoldswyl.
Ans Sunnewänd-Fyr im Litzelhoof
Muess jede Basler Schielergoof.
D'Fridmatt, die schloot inkognito
Dr Boxring Haasebiehl k.o.
Es wird - und 's wunderet aim weenig -
Dr Guschti Bäärner Schwingerkeenig.
Und 's Sälberständig Baselbiet
Haut's ins Exil uff Himmelried.
Dr Basler-Staab drait - hool's dr Guugger -
Jetz sibe rooti Gilleruugger.
Dr Odermatt, dä kepflet d'Balle
Ins Goal vom FC Wasserfalle.
Und Muni kaufsch - es het kai Wäärt -
Uff unserem Andreas-Määrt.
Dr Glaueschnyder z'Arboldswil
Wird Dr. h.c. med. et phil.
Und d'Uni macht in Gälterkinde
E ney Kolleeg im Garbebinde.
Waas mainsch, wenn si in Glooschterfiechte
E Spilmaa-Coca-Party miechte?
Drum froog bim Stimme, ob das witt,
Kurz: soll y oder soll y nit?
Am Fasnachts-Zyschtig goht me-n-in d'Basler Halle
an d'Ladärne-n-Uusstellig. Si isch vom Nyni demorge
bis am Elfli z'nacht offe.
|
|