| Ummeblettere |
| Gumbb zeerscht in e Joor! |
|
Basler Dybli Stamm – Fasnacht 1968
Aadie Fasnacht!
Wenn's Vieri schloht, do wird dr Aggtiv bsässe,
Und alles Unmues vo de letschte Wuche-n-isch vergässe.
Dr Morgestraich kiehlt aim zwor gly denn's Mietli,
Wenn Gammler Dir dr Blatz verspeere mit de Cowboy-Hietli,
Und gaili Maisser, so Spaghetti-Debbe,
Sich hinderruggs vergryffe-n-an Dym Maitli sine Schebbe.
Und au zmidag wird d'Stimmig ganz nit besser,
Wenn's aabeschifft und d'Goschdym wärde nass und nesser.
Was laatscht drhäär und deent rächt gruusig?
Jo, De hesch Rächt: Es isch e Guggemuusig!
Was graicht dr Faasnacht nit zem Sääge?
's isch wie De saisch: die primitive Wääge!
Wär duet beraits am Morgestraich versaage?
Dä Spannier, wo nit kunnt go d'Lambbe draage!
Wär sait, wo d Glygge derfe starte?
Wär zaichnet d'Bandwurm-Route-n-y in d'Karte?
Wär promoviert zem "Stammverein" e "Grubbe"
Und umkehrt nit? Wäm isch das alles schnubbe?
Wär sunnt sich wie-n-e Balkon-Pfau im Kiechli?
Wär pfuscht im Rädäbäng, däm Faschings-Fiehrer-Biechli
E schludrig Baseldytsch, wo gruusig?
Wär isch verdoria so luusig
Und ka nit e Versicherig ins Lääbe riefe
Fir Kalbfäll, wo's verjagt? Wär sott das priefe?
Wär losst vo Glygge sich au gar nyt gfalle?`
Vom Huuswirth aber alles (dängg an d'Basler Halle!)?
Wär hangt am alte Biljeh-Vorverkauf-Systeemli,
Als wär das 's glainschti vo de Drummeli-Probleemli?
Wär git sich grooss mit glaine Subventione
Und duet, als schänggti äs de Glygge Millione?
Wär macht d'Frau Faasnacht fascht e bitz zur Sau?
Mir wisse's alli und Du sicher au.
Statt in're Faasnachtssääligkait go z'schwelge
Dänggsch an das Zyg und bisch bim Marathon 5 Stund lang uff de Felge.
Bim Glyggehalt macht niemer Blatz und kaasch nit hogge.
Und will nyt z'suuffe griegsch, fohsch afoh bogge.
Hesch ändlig ständlige Dy Stange, do briehlt dr Zugchef: "Uuse!"
Jetz kunnt e Dschumbbel an Di - 's schmeggt no Bier Dy Bluuse.
Dy Glepfer lytt am Bode, heersch Dy Ranze mure.
Doch muess halt d'Glygge-n-aifach no bim Lotz schnäll dure.
Dr Faasnachts-Stausee in dr Aesche
Het sich au das Mool wider gwäsche.
De laufsch zwai Schritt und dno muesch halte.
Zem Gligg hän iber dryssig Värs die "Alte".
Und 's Volgg glotzt stuur; e kain duet lache.
E Viertelstund fixiersch dr "Drache".
Do briehlt am Stainebärg e deggorierte Bäller:
"Hopp, laufed gfelligscht ebitz schnäller!"
"Und nit in d'Braiti, schliessed zämme!"
Mai, gisch däm Brueder amme Nämme!
's isch wie im Dienscht: Zerscht muess me warte,
Und denn haisst's seggle, kuum duesch starte.
Zem Gligg goht's by dr Handelsbangg denn abeszue.
Doch d'Präss isch gange, 's dimberet und si het gnue.
Und vo Dym Zug sehsch morn demorge
Null Zyle-n-in Dym Blettli. Kaasch's verworgge.
Denn was die Brieder aim dien weje,
Kaasch sowiso in Ochsnerkibel keye.
Bim Mory dien si scho dr Bode rible
Und d'Drämmler in d e Schine grible.
Dr Stainebärg isch läär und schitter.
Und d'Schmir lipft sich e Bruch bim Sammle vo de Gitter.
E Reveränz vom Dambourmaier
(Dä arm Siech isch au uff de-n-Aier.
Sy Larvegrind wigt 20 Kilo).
Jetz kunnt dr Lotz. Er ka's nit syloh,
Und zieht servil sy Dschäbber.
Am liebschte gäbtsch em jetz e Gläbber.
Und d'Muumie, die stehn hinder ihm in ainer Raje.
Und mir sin rycher um e dire Maje
Mymoose, denn si sin vo geschter.
So ändet 's scheenscht vo allne Feschter.
Denn schwänggsch in d'Stammbaiz wägem Aesse,
Doch an dr Faasnacht griegsch nur myse Sputt zem frässe.
Kasch ändlig Dyni miede Schaiche stregge,
Do briehlt vor Wuet my Frind, dr Megge:
"Verdammi, 's isch zem Deyfel hole,
Jetz het mr ain voruss my Drummle gstohle!"
Doch ändlig kunnt denn 's Scheenscht vom Daag, vom ganze,
- Dr Dambourmajor sehsch fascht danze - :
's wird gässlet, laufsch wo Du wotsch dure,
Bisch z fride-n-und muesch nimme mure.
Dä ganzi Katalog vo Missligkaite
Ka Dir kai Buuchweh meh beraite.
Als Schyssdräggzigli wirsch ins Imbergässli gwätscht,
Wo 's Echo vo de Kibel dir ans Buuchfäll dätscht.
Jetz erscht bisch säälig, jetz wirsch bsässe,
Und alles Unmues vo dr "Faasnacht" isch vergässe.
Am Faasnachts-Zyschdig goht me-n-in d'Basler Halle an d'Ladärne-n-Uusstellig.
Si isch vom Nyni demorge bis am Elfi z'nacht offe.
Buechdruggi G. Börli
|
|
