Basler Dybli Stamm – Fasnacht 2006
Litteritis Basliliensis
Z Basel am mym Rhy,
Sotti s suuber sy!
Doch es dien aim d Luscht verdäärbe
huffewyys Babyyr und Schäärbe
An mym liebe, an mym liebe Rhy
Wenn hit dr Johan Peter Hebel
dr Rhy wurd gsee, wo Kind und Kegel
suffe, läärme, schiffe, kiffe,
drno hät är, me duet s begryffe,
schtatt syyni scheene Värsli-Zyyle
gschriibe, grad aagfange hyyle.
Mechtsch am Rhy schnäll aanehogge,
denn haut s Dy glatt uss Dyyne Sogge,
findsch niene me e suuber Blätzli,
nit wääge Meewe, Duube, Schpätzli,
nai, will sicher ain bim Ässe
sy Verpaggig het "vergässe".
Die Grangget, die haisst Littering,
am Rhy elai wär s halb so schlimm,
doch laider duet si umsverregge
alli Basler Blätz aaschtegge,
in jeeder Gass, an jeedem Egge
kasch huffewyys dr Drägg entdegge:
Rund um d Fast-Food-Reschdorand
liggd Wägwärfgschiir halt ummenand,
e-n-alte Raucher uff em Bummel
"verliert" sy Sygarette-Schtummel,
drambsch uff em Drottoir kurz drnääbe
blybsch grad am Kaugummi glääbe,
es het vor jeedem Banggomaat
e Quittigs-Zeedel-Chef-Salaat,
wenn e baar dien Bierli suffe
blybt e riise Schäärbehuffe,
Gratis-Zyttig frieh am Moorge
duet me-n-uff dr Schtrooss entsoorge,
noonem Schnyzze duet au s Greetli
gheye losse s Fazeneetli
(au d Fasnacht macht bim Littring mit,
doch das zellt fir aimol nit).
Eb jung, eb alt, eb arm, eb ryych,
e jeede dängt, isch mir doch glyych,
mir schtinggt s, my Abfall zämme z rauffe
und zem näggschte Kiibel z lauffe,
ych due lieber unverdrosse
my Hyffeli doo liige losse.
Drgeege kämpft elai mit Schwung
unseri Schtadtrainigung,
orangi Ängel wische dääglig,
laider isch die Mieh vergääblig,
am näggschte Daag scho isch d Luft duss,
wie bim alte Sisyphus.
Au Kinschtler wän eppis drgeege
mache-n-um s Bewusstsyy z heebe:
E Duurm soll s visualisiere,
damit me ka realisiere,
ass dr Drägg vo zwai drey Daag
wie-n-e Hoochhuus hoch sy maag.
Doch haile kasch e Grangged nit,
wenn s nur Symptoom-Bekämpfig git,
muesch s Iibel an dr Wuurzle-n-aagoo,
drumm sottsch so glyy wie meeglig aafoo:
Iiberwind ändlig in Dir s Fuuldier,
syg e-n-Abfall-Pionier!
Am Zyschtig goot me an d Ladäärne-Usstellig bim
Minschter und au an d Waage- und Requisite-Usstellig
bi dr Kasärne
|