| Ummeblettere |
| Gumbb zeerscht in e Joor! |
|
Basler Dybli Stamm – Fasnacht 1980
Hool's dr Deyfel!
Im Fägfyr vo dr F 80
Waas isch 's Johr dure bassiert?
Wäär het naime zvyl kassiert?
Woo hän groossi und au glaini
Deyfel (nit nur z'Basel maini)
Ebbis boosget oder gmacht,
Woo me driber schwätzt und lacht?
Deyfeley und Höllebruet!
Mir lehn Dampf ab - das duet guet!
Dr Spil-Deyfel
Dängg doch numme an die dumme
Deyfel und an all die Summe
Woo die Glaistadt-Potentaate
Keyt hän in die Automaate
Souverään, mr mien di loobe:
Hesch ene e Rigel gschoobe!
D'Baizer – armi Deyfel, hösch!
Luege gschoggt uss ihrer Wösch.
Mene, mene gopferdeggel
Gaissmaa, bisch e dumme Seggel
Vom Pfyffe z'lääbe-n-isch e Schand.
Doch schmlimmer no: 's moolt's ain an d'Wand
Was mainsch, wenn jede dumme Siech
In Basel 's glych an d'Hütte miech?
Am Lotz sym Huus säächtsch als Sgraffito
E Daumier-Karikatuur-Litho.
Und d'Haaseburg hätt uff em Schild
E groosse gstriggte Strumpf als Bild.
E verdeyflete Krimi-Wettbewärb
Reinecker, hesch Lunte groche
Und mit dääre "Jury" broche.
Wettbewärb mit Selektion
Sin nit numme Bschiss, sin Hohn.
Dr erschti Brys griegt ganz e schlimmi
Gschicht, dr zwait isch gar kei Krimi
Und dr dritt – fir Stil und soo –
Het e Primmeler bykoo.
Uff em Stadion hän jetzt
D'Künggeli d'Schäärmys ersetzt
's het ain by dr Nadig welle
Kirzlig d'Chromosoome zelle.
Hätti är das blybe loo
Wäär er nit in Spittel koo.
Au e Benthaus-Angebott
Findet si nit bsunders flott.
's maint dr Pfyl im Theres-Köcher:
In däm Club het's mr zvyl Löcher!
CIBA : POB = H2O
In dr Noot - wenn Aemter liege -
Frisst dr Deyfel amme Fliege.
's Gwässerschutzamt, das het gfagglet
Und e Brichtli aanegstagglet:
D'Ciba laiti zwar sit Johre
Gift ins Wasser, doch vo Gfohre
Oder ass die Gille stinggi
Klaagi nur die linggschti Linggi
Au im Deyfel sy Grossmuetter
Isch geege das Fuetter
Have you au scho in that Spunte
On the Seybi with your Junte
Something Gruusigs aabegmampft,
Sygs e ghaggte Hund, wo dampft
Oder aifach so-n-e Häm-
Börger à la mode du Säm,
's het die Baiz by mir kai Luck:
Please, go home, McDonald Duck!
Die sin gaischtig soo verluust
Ass im Deyfel doo drab gruust
Dr Fahrner schloot ans Gryz e Frau.
(Das Gmäld isch under aller Sau.)
Dr Geerk häät's gärn, als lusche Dyssi,
Fir 's Kunschtmuseum. Mir fir d'Schyssi!
Wurdsch Värs vom Geerk als Dünger näh
Wurd's allewyl Seyblueme gää.
Ob gfahrneret, ob geerkelet,
Ob gmoolt, ob dichtet: 's ferggelet!
Gaudeamus igitur
Alt Semester h.c. iur.
Bisch pangsioniert? Griegsch AHV?
Gosch am Stägge und bisch grau?
Hesch dr Migros-Schuel-Verlaider?
Denn stürz di in d'Sunntigsglaider
Und gang aifach juschtemänt
Uff d'Alters-Uni als Studänt!
Jede-n-Urgrossvadder kaa
Dr Doctor pfruend senilis haa.
Dr Ritschard sait: Gang läng mer 's Gwehr
Dää Dschingge-Sänder steert mi sehr
Uff em Pizzo Ventquatro
Hänn si d'Lääde-n-aabegloo.
Jetzt isch Sense und isch gnue
Und im Aether wider Rueh.
's raimt sich halt uff Turicum
Nur ai Wort, und das haisst "dumm".
Die Reu' ist lang, der Wahn ist kurz:
Schlawinski, machsch jetzt Kassesturz?
D'Ladärne-Uusstellig findet in dr Muba-Halle 8 statt und zwor am
Zyschdig vom Nyni demorge bis am Elfi znacht und am Mittwuch
zuesetzlig vom Nyni bis am Elfi demorge.
|
|
