Ummeblettere |
Gumbb zeerscht in e Joor! |
|
Basler Dybli Stamm – Fasnacht 1977
100 Johr Fidleburger
100 Johr isch d'Basler Gmaind
Jetzt scho happy und veraint
s'Gwärbmuuseum bringt e Schau:
Biecher git's und Umzig au.
Und dr Christoph Merian
Het dr Gäldverschänggigs-Wahn
S'kaa nur aine Gäld verschängge,
Wenn er's z'ring verdient, muesch dängge
Wenn's e Fescht z'feschte git,
Denne macht dr Bebbi mit.
D'Burgergmaind het juubiliert
Und e Feschtzug duregfiehrt
Laider isch dä ? fi-fa-foo!
Aber nit in Rääge koo.
Es schaidet sich dr Spreu vom Waize
D'GGG duet sälber baize!
Denn das Zigli isch zem Gähne:
Alles numme Hauri-Fähne!
Nostalgy in Rainkultuur.
Baslerstab antik und stuur.
Doch fir d'Stadt, es isch e Schand
Basst dä nit, hegschtens fir s'Land.
Lieber no-n-e Geisen-Raab
Als esoone Baslerstaab
100 Johr lang – oh herjee! –
Basler Fasnachts-Dummidee
s'Drummeli isch Larifari
Sit däm neje "Charivari"
Fir d'Pensionierig länge sott's
Im liebe-n Obmaa Peter Lotz
100 Johr isch nid lang, dänggsch,
Wenn d'am Obmaa-Beschtli hänggsch.
Wenn zwai Bletter fuusioniere,
Goht im Lääser das uff d'Niere,
Bis au d'Hagemänner springe
Iber ihri aigni Glinge.
GAW, gäll du duesch blybe,
Ass dr Nekroloog kaasch schrybe.
Inserät wiene Plantaasche
BaZet haisst die ganz Blamaasche
100 Johr lang Psycho-Thriller,
Mit em FC Närve-Killer.
Muusfäld, dir isch's hitte wehler.
Jetze zitteret dr Theeler
E Konto wiene Maharadscha
Het dr Benthaus dangg Guarnaccia.
Uffe haisst uff Aenglisch: Up!
Uuse-n-aber: Liga-Cup!
Hitte haisse d'Stänzler Bobby
Und in Lieschtel oobe Lobby,
Zwai und zwai git fimf, waisch nimme
By de Wahle und bym Stimme?
100 Johr Verwaltigsroot
E-n-Arschloch blybt – dr Lang, dää goht
Flugi bruuche langi Pischte
Im Zolli duet's e-n-Abschuss-Lyschte
S'Zwängi-Baseldytsch vom Suter,
Vo däm Sprooche-Reform-Luther
Wird grammatikalisch geehrt.
Jede Basler het das gsteert,
Well me soo halt nimme schneert
Und das ins Museum gheert.
Dativ, Umluut, Konsonante
Baseldytsch fir alti Dante
Dr Schöllkopf schifft mit vyle Gniffli
Sit 100 Johr um Groossroot-Riffli
Er dripplet sich mit syner Schnure
An jedem Ehre-Boschte dure
Und kaa, wenn är lengscht nimme kaa,
No immer goo als Fährimaa.
E Gipsabguss wär ebbis Glatts
Vom Niggi uff em Wettstaiblatz
Sit 100 Johr sehsch d'Eros-Schnäpfe
Um d'Gloorematte-n-ummeäpfe,
Si haisse Florence und nimm Bethli
S'isch allewyl no s'Fazeneetli,
Wo si drmit dr Kundschaft wingge
Ai Drittel Bebby ? zwai sin Dschingge,
Aini wo dr Waggel macht
Will cento Franchi in dr Nacht
In 100 Johr isch vyl bassiert.
Mir hän nur ainiges aagfiehrt
Doch sehn Ihr sälber an däm Muschter:
D'Vergangeheit isch zimlig duschter.
Und d'Geegewart isch nid vyl häller,
Nur läbt und stirbt me-n-ebitz schnäller.
Dien d'Basler Dybli nid uusrotte
Das sin doch die, wo so gärn spotte
D Ladärne-Uusstellig findet in dr Halle 8 statt und
zwor am Zyschdig vom Nyni demorge bis am Elfi znacht
und am Mittwuch zuesetzlig vom Nyni bis am Elfi demorge
|
|