| Ummeblettere |
| Gumbb zeerscht in e Joor! |
|
Basler Dybli Stamm – Fasnacht 1973
450 Johr
Fusion Rieche-Basel
Fuffzähhundertzwaiezwanzig
Het d'Stadt Basel – 's stinggt ganz ranzig –
Pfäffige-n-im Bischof gstohle
Und em gsait: "Kaasch's wider hoole,
Wenn D'is Rieche duesch verkaufe."
Waisch, wie mir die Heere daufe?
Das sin alles akkuurati
Jasser arab el Patati.
Wenn Du fusioniersch, isch's immer
Glatt und fir dr ander schlimmer.
Aber d'Stadt het mit de Johre,
Vyl vo ihrem Glanz verloore.
Denn me sait hitt no vo Buure,
's syge Schelme vo Naduure.
Z'Rieche het das immer gstumme
Und mir Basler sin die Dumme.
Waisch, wie die dert mit de Matte
Ghandlet hän, däm sait me batte.
Wo me 's "Baue" het erfunde,
Duet dr "Esel streck dich" pfunde.
Vyli Hektar suure Boode
Kemme-n-iber Nacht in Moode.
Millione wärde gschefflet
Und mir Basler hän is glefflet.
Mainsch es haig in Rieche numme
Flotts und Scheens gää? Bisch e Dumme!
Landvegt, Waibel, Bammert, Schuugger,
Schäärmuuser und hol's dr Guugger
Die, wo uusschälle-n-und saage:
"D'Glogge het jetz vieri gschlaage!"
Sibner-, Scharf- und andri Richter
Sin so Blooggaischt-Beesewichter.
Aber denn au Fleh und Wanze,
Wo aim bisse hän in Ranze.
Mähltau, Mischtle-n-und so kooge
Schildlys und au Mys (unglooge),
Maizgi, Aengerling und Schnoogge.
So-n-e Dorf het au sy Hoogge.
Holzwirm bebberle-n-im Dääfer
Und 's mien sibe Schwoobekääfer
Noonem Grieg by Nacht und Nääbel
Flichte vor em Ländsgi-Sääbel
Haim ins Raich. Es sin Lumbaazi,
Frontebrieder, Bruuni, Naazi.
Au vo de "Zwaihundert" zelle,
Wo-n-is hän verkaufe welle,
Zwai so eländdummi Sieche
Luut em Haimetschyn ze Rieche.
Hitt git's kaini Kieh und Gaisse
Meh, wo z'Rieche-n-ummestaisse.
Und dr ainzig Kykeriky
Soll dää uff em Kirchdurm sy.
Ych find das e ganz e digge
Und ebitz zem Giggel bigge.
Haltsch Dr hegschtens no-n-e Puudel
Und "Dr hinggend Boot" vom Schudel.
Mängge Sunntig isch me amme
Mit em Babbe-n-und dr Mamme
Samt em Schmätzginetz und Balle
Plus em Raif in d'Kaffihalle.
Hitte-n-isch das alles passé.
Vo dr Erle het me-n-assez.
Anche nella Mannelotschi
Baade nur no Dschingge oggi.
Und ins Brohuus (d'Nase rimpf!)
Knattre Fyrstiehl-Lääderstrimpf.
's Kino isch uff d'Schnure keyt.
's Kuur-Huus (les Bains) abverheyt.
Und au d'Ville-Bauerey
Isch im Stil e Sauerey:
Mängge Brotz wählt, 's isch penybel,
Laider "Louis Impossible".
Nynzähnullacht hän die Lämmli
Alles welle, nur kai Drämmli.
Uus däm starrgg versnobte-n-Ort
Miechi 's Dramm e Biezer-Hort.
In dr Orangerie vom Clavel
Hoggt dr Guisan und loost Ravel.
Hitte darfsch dert durelaufe,
Blebbs, und muesch kai Billet kaufe.
Dooderfir het d'Gmaind – trara!
's erschti Frauestimmrächt gha.
Rieche haisst au "Gropfehuuse",
Denn si schnyde-n-aim dert uuse
Alli Grepf und wenn si lytte
Mit de Glogge, duet's bedytte
Ass scho wider – muesch nid lache?
Ain dr Graage kaa zuemache.
Doo längt nyt zem Juubyliere,
Nur, wenn's ain wott durestiere.
Die sin wirgglig nit ganz bache
Wo do druus e Zug wän mache
Und e Fescht mit Ehrepfluudde
Und mit Reede, mit so luutte
Vo dr Haimet und mit dääne
Gwäggi uff de blaue Fähne.
Drei Dääg fyre, drei Dääg suuffe.
's drummle-n-au e ganz e Huuffe.
Schmeggsch verschwitzti Gmaindreet meggle.
Sehsch dr Cagliostro seggle
Und dr Wettstai plus zäh Ritter
(d'Armbanduhre wirgge schitter).
Uns isch's rächt, ass das het gää:
Mir dien's gärn als Sujet nää!
Am Faasnachts-Zyschtig goht me-n-in dr Halle 8
An d'Ladärne-n-Uusstellig. Si isch vom Nyni demorge
bis am Elfi z'nacht offe.
|
|
